Күгәрчен “бөркетләре” очарга әзерләнә

– Безнең Айдар спорт ярышларында мәктәп данын яклаучы оста чаңгычы да, көрәшче дә. Көрәш буенча районда беренчелекне яулап, республика бәйгесендә көч сынашты. Укучыларым укуда да тырыш. Виталий – физика, тарих, җәмгыять белеме, Азат белән Илнур башкорт теле буенча олимпиадаларда катнашып килде, — ди ун­бер­­ләрнең сыйныф җитәкчесе Гөлшат Садыйкова.
Егетләрнең барысы да БДИ буенча, төп фәннәрдән тыш, физиканы сайлаган. “Безнең укытучыбыз Айрат Насыйк улы Яһүдин дәресне тиешенчә аңлата һәм бик кызыклы үткәрә”, – ди егетләр бертавыштан. Илнур бүгенге көндә бик кирәкле һөнәр үзләштермәкче: ул тракторчы-механик-инженер булырга ниятли. Азат Стәрлета­мактагы төзелеш техникумына юл тотачак. Виталий Күмертаудагы авиация техникумында белем алырга, ә Айдар башкалабызда урнашкан аграр университетка укырга керергә җыена.
Әйтергә кирәк, бүгенге көндә Күгәрчен районында 23 белем бирү учреждениесе эшли. Аларның 13е — урта, 10сы — төп, ә 8 мәктәп филиал булып тора. Быелгы уку елында 9нчы сыйныфны — 388, унберенчене 204 укучы тәмамлый. Мәктәпне тәмамлаучы егет һәм кызларның БДИны уңышлы тапшырып, үзләре сайлаган уку йортларында югары белем алып, Күгәрченнең һәм республиканың лаеклы шәхесләре булачагына ышанычыбыз зур.