“Кайттым сиңа, авылкаем, мин бит бу, таныдыңмы?

Мөхәммәтнең балачагы һәм үсмер еллары Ишкарда үтә. Авылның шифалы һа­васы, Сарьяз суы киле­шәме, ул бәләкәй чагыннан ук шигырьләр яза. Беренче шигырьләре “Башкортостан пионеры” гәзитендә, “Ялкын“ журналында басыла. Урта мәктәпне тәмамлаганнан соң Кушнаренко авыл хуҗа­лыгы техникумында белем ала. Студент чакта да язуын ташламый, гармунчы һәм җырчы буларак, үзешчән сәнгать түгәрәгендә шөгыль­ләнә. Техникумнан соң туган авылында агроном булып эшли, аннары армия сафларында хезмәт итә.
Армиядән соң техни­кумның тәҗрибә бакчасында, аннан “Башсельхозхимия” берләшмәсендә хезмәт сала. Уфада булачак тормыш юлдашын — Баймак кызы Линараны очрата. Аның белән матур гаилә корып, ике улга гомер бүләк итәләр.
Туксанынчы еллардагы үзгә­решләр чорында гаилә данлыклы “Зилаер” совхозына күчеп килә. Биредә Мөхәм­мәткә агроном вазыйфасын ышанып тапшыралар. Ул күңелендәге иҗат утын сүн­дерми. Шигырьләре еш кына “Атайсал”, “Илеш-Баймак”, “Һакмар” гәзитләрендә дөнья күрә. Моннан тыш, ул мәдәни чараларда, концертларда актив катнаша, “Йән­гүзәл” шигырь сөючеләр түгәрәгенең актив әгъзасы була. Бер үк вакытта көйләр дә иҗат итә. Аның җырлары Фәнүнә Си­раҗетдинова, Венер Абдуллин, Эльвира Әскарова башкаруында радио-телевидение аша еш яңгырый.
Мөхәммәт Минбә­гый­сов­ның Ишкар авылында узган иҗат кичәсендә дә аның бик күп шигырьләре яңгы­рады, җырлары башкарылды. Туган җиргә, туган авылга, тормышка мәхәббәт белән сугарылган шигырь­ләрне мәктәп укучылары, Уфа дәүләт сәнгать академиясе студенты Динар Тимершәехов сән­гатьле итеп сөйләде. “Ерактагы кояш яктырак”, “Бу җырымны сиңа багышлыйм”, “Кеше булып кал”, “Кыңгырау чәчәге” һәм башка җырларын авылның үзешчән сәнгать осталары Лена Галиева, Илшат Әх­мә­тов, “Ахирәтләр” клубы әгъ­залары Флизә Шәй­дуллина, Роза Рә­кыйпова, Клара Фәрхет­динова, Зөлфи­рә Мортазина, Альбина Ялалова башкарды. Мин үзем Мө­хәммәт Минбәгыйсовка атап язган шигыремне укып ишеттердем.
Кичәгә бик күп авылдашлары һәм туганнары килгән иде. Аларның һәммәсе Мө­хәммәткә изге теләген җит­керде, иҗат чишмә­сенең беркайчан да саекмавын теләде.
Чараның иң дулкынландыргыч мизгеле, мөгаен, Мөхәммәтнең бергә укыган сыйныфташлары, сыйныф җитәкчесе Клара Фәрхет­динова белән очрашу булгандыр. Озак вакытлар күреш­мәгән сыйныфташлар истә­лекләре белән уртаклашты, мәктәп елларын, укытучыларын сагынып искә алды.
Бу очрашу авылдашлар күңелендә озак сакланыр, Мөхәммәт үзе дә киләчәктә туган ягына ешрак кайтып йөрер һәм яңадан-яңа ши­гырьләре белән безне сөен­дерер, дип ышанып калабыз.