Эшкә чумган кешеләрнең җырлы-моңлы мәлләре

— Илдар Мәкәримович, Әдә­бият елы кыю адымнар белән атлап китте. Аңа эстафетаны лаеклы тапшырган Мәдәният елы туймазылыларда нинди тәэссо­ратлар калдырды дип әйтә аласыз?

— Районыбыздагы мәдәният уч­реждениеләре Мәдәният елы кысаларында оештырылган барлык чараларда да актив катнашты. Конкурс-бәй­ге­ләрнең исемнәрен атап китү дә җитә: предприятиеләр, оешмалар, уку йортлары арасында — “Йөрәктән — йө­рәк­кә” үзешчән сәнгатьтә катнашучылар, авыл мәдәният йортларының театр коллективлары арасында — “Театр марафоны”, Кандракүл буенда узган “Яшьлек дулкыны” фестивальләре, мәдәният учреждениеләре иҗат кол­лективларының “Дуслык моңы”, “Иң яхшы мәдәният хезмәткәре”, тальянда уйнап жырлаучыларның “Үзем уйныйм, үзем жырлыйм!” конкурслары.
Республика конкурсы нәтижә­ләре буенча Собханкул мәдәният йорты — авыл биләмәсе терри­ториясендә урнашкан иң яхшы мәдәният учреждениесе, ә Кан­д­ракүл авылы китап­ханәчесе Роза Шәйхетдинова иң яхшы мәдәният хезмәткәре дип танылды. Моннан тыш, Кәкребаш авылы мәдәният йорты “КЛУБок*XXI века” дип аталган республика конкурсында катнашып, “Милли әдәбиятка сакчыл мөнәсәбәт өчен” номинациясендә дипломга лаек булды. Ә үзәк китапханә сайты “Виртуаль Башкортстан” республика конкурсында беренче урын яулады.
Узган ел туймазылыларның республика, төбәкара, бөтенрусия, халыкара конкурсларда һәм фести­валь­ләр­дә яхшы чыгыш ясавы белән хәтердә калды. Кандра авылы кызы Алинә Гыйззәтуллина ел башында “Нәүруз гүзәле” республика бәйгесендә Гран-при яулады, ә декабрьдә Мәскәүдә үткән “Татар кызы-2014” конкурсында Русиянең иң матур татар кызы булып танылды. Нөркәй авылы мәдәният йорты житәкчесе Айдар Хәсәншин Казанда узган “Татар моңы” яшь башкаручылар конкурсында — лауреат, “Родина” район мәдәният сараеның “Җидегән йолдыз” вокаль ансамбле дипломант булдылар. “Сәфәр” үрнәкле бию ансамбле Чабаксарда IV Бөтенрусия конкурсында җиңде. Ел, чыннан да, уңышлы булды. Русия һәм республика конкурс-фестивальләрендә катнашучылар арасында 30дан артык лауреат һәм дипломант булуы — районның Мәдәният елына керткән өлеше.