-14 °С
Болытлы
Гәзиткә язылуVKOKTikTokINSTAGRAM
Барлык яңалыклар
Мәдәният һәм сәнгать
14 апрель 2015, 20:46

Авыл мәдәният учагы белән ямьле

Анда эшләү өчен оештыручы, режиссер, сценарист, грим салучы, кием әзерләүче һәм башка бик күп һөнәр иясе булу таләп ителә.Шундый гаҗәеп һөнәр бар — халыкка бәйрәм, күңел ачу чаралары оештыру. Гадәттә, аны сайлаган кешеләр бөтенләй икенче камырдан әвәләнгән, башка җептән тукылган була — алар өчен тормышның матди ягы мөһим дә түгел сыман, үз вазыйфаларын ихлас һәм риясыз башкаралар, рухи азык алудан ямь табып яшиләр. Еш кына әлеге һөнәр ияләре авыл мәдәният учакларында хезмәт сала.

Туймазы районының Кандра-Котый авылы мәдәният йорты җитәкчесе Гөлнара Шакирова һәм аның кечкенә коллективы белән танышкач, менә шуларны уйладым. Узган көздә Туймазыда үтәчәк “Кызыл таң” көннәренең берсе шушы авылга тәгаенләнгәч, аның белән, иң элек, телефоннан аралаштык. Йомышымны әйткәч, тавышына ник бер ризасызлык чыксын, киресенчә, бөтен эшен читкә куеп, җентекләп сөйләште. Ә эш-мәшәкатьләре җитәрлек иде. Бик зурлап шәҗәрә бәйрәме үткәрергә әзерләнә­ләр икән. Гадәттә, андый чараларда нәсел агачы тәкъдим ителә, ә Кандра-Котыйда ул авыл шәҗәрәсенә әверелгән. Әнисе ягыннан тамырлары шушы авылдан булган Марат Гайнетдинов тәкъдим иткән материалны өйдән-өйгә йөреп диярлек тулыландыралар. Чара авылдашлар бәйрә­менә әверелә.
Гадәттә, мондый кичәләр­нең һәркайсына әзерлек бер-ике айдан да ким бармый. Эш фикер туплау, сценарий язудан башлана һәм, тамаша тәмамланып, мәдәният йорты тынып калгач та бетми. Өйгә кайткач, күзгә йокы керми, үзең оештырган чараны анализ­лыйсың, уңыш-табышларны барлыйсың, кимчелекләр өчен көенәсең. Боларны мин очрашып сөйләшкәч белдем, әлбәттә.
Сәнгать җитәкчесе Зөлфия Шәймәрданова шушы авылда яшәп эшли, ә Гөлнара Шакирова менә өченче ел инде берничә чакрым ераклыкта урнашкан Кандрадан килеп йөри.
— Беркемне дә диярлек белми идем. Үз алдыма авылдагы сәләтле кешеләрне ачыклау, иң мөһиме — аларны мәдәният учагына җәлеп итү бурычы куйдым, — ди Гөлнара Вәҗип кызы эшли башлаган чор турында.
Мәдәният йорты хезмәт­кәрләренең зур тырышлык белән халыкка бәйрәмнәр оештыруын күргән-тойган авылдашлары битараф калмый, әлбәттә, акрынлап фикер­дәшләр табыла. Алия Нә­фыйкова, Зәйтүнә Кәри­мова, Венера Габделбәрова, Ми­нзадә Әбрарова, Ринат Мөхәммәтов, Кифая Идиятуллина, Сәфинә Кәримова — авыл сәхнәсенең “йол­дыз”­лары. Узган елда район смотрында Ибраһим Абдуллинның “Их, Уфа кызлары!” дигән пьесасыннан өзек сәхнәләш­тергәннәр. Яңа елда театрлаштырылган тамаша күрсәт­кәннәр. Гөлнара Вәҗип кызы “Умырзая” хатын-кызлар вокаль ансамбле турында аеруча горурлык белән сөйли. Ә авылдашлары Наҗия Гәрәева һәр чарага шигырен дә, җырын да яза. Аның иҗат кичәсен авылда да, Кандрада да зурлап үткәр­гәннәр. Кыскасы, һәр бәйрәмдә мәдәният учреждениесе халыкны кү­ңелле тамашага чакыра. Кандра авыл Советы рәисе Айрат Сафиуллин белән Фәр­хетдинов исемен­дәге хуҗалык рәисе Лилия Кәшфуллина да бу юнәлештә күп көч сала. “Парус”, “Юлдаш” кибетләре хуҗа­лары Вәсилә Батыршина белән Венера Ситдыйкова бик теләп матди ярдәм күрсәтәләр. Кандра “Юбилейный” мәдә­ният сарае микшер пульты белән тәэмин иткән. Кандра-Котыйда шул­кадәр бердәм үзешчәннәр коллективы тупланган ки, Яңа ел каникулларында күрше авылларга җиде тапкыр гастрольләр белән чыкканнар.
Гөлнарадан бу эшкә ничек килүе белән кызыксынам. Шаран районы­ның Иске Тамьян авылында күпбалалы гаиләдә туып-үскән төпчек кыз җырга-моңга тартыла, бигрәк тә оештыру эшләре кулыннан килә. Тик ул вакытта Гөлнара мәдәният-сәнгать юнәлешендәге уку йортларына ниндидер музыка коралында уйный белгәннәрне генә кабул итәләрдер дип уйлый. Ленинградта тегүче, кияү­гә чыгып, Кандрада төп­ләнгәч, тагын башка һөнәрләр үзләш­тереп, “Юбилейный” мәдәният сараенда берничә ел вокал түгәрәген җитәкләгәннән соң гына күңеленә якын эшнең нәкъ менә шушы булуын аңлый ул. Стәрлетамак мәдәни-агарту училищесын кызыл диплом белән тәмамлый.
— Мәдәният йортында эшләү үзенчәлеге шунда, үзеңнең җыр­лый, бии яисә ниндидер уен коралында уйный белүең файдалы, әлбәттә, тик күбрәк оештыручы, режиссер, сценарий язучы, грим салучы, кием әзерләүче һәм башка бик күп һөнәрләргә ия булу таләп ителә, — ди Гөлнара Шакирова.
Әлбәттә, тыныч күңел бе­лән, дөньяңны онытып эшләү өчен ышанычлы терәгең булу кирәк. Ире Радик, уллары Айнур белән Илдар — Гөлна­ра­ның зур ярдәм­челәре. Ниндидер реквизит әзер­ләү, музыка сайлау һәм башка эшләрдә алар да катнаша.
Заманында миллионер кол­хозның үз көче белән төзет­кән, бүген дә шәһәрнекенә тиң искиткеч күркәм мәдәният йорты гөрләп торганда, авыл яши дигән сүз. Яшәсен әле авыллар.