“Бердәмлек” берләштерде!

Концерт залы артында автобуслар тезелгән. Аларга беркетелгән ил тамгасына игътибар итмәсәң дә, милли киемнәр барысын да танытып тора. Менә Һиндстан кунаклары чалма урау белән мәшгуль (Панджаба шәһәреннән фольк­лор сәнгате клубы килгән). Тән төсләре белән башкалардан шактый аерылып торучы Көньяк Африкадагы дусла­рыбыз төймәләрен барлый, чәчләренә кадалган каурыйларын ныгыта...
Сәхнә артында — төсләр, телләр чуарлыгы, күңелле аралашу. Телне аңламаган очракта, шат елмаеп баш кагалар. Әйтик, Кытайдан килгән Фенг Лон белән шулай булды. Ярый ла тиз арада тәрҗемәче ярдәмгә килде. Әмма аны да аңлавы шактый авыр, шулай да бер нәрсә яхшы аңлашыла: кы­тайлылар үзләрен Башкорт­станда рәхәт тоя.
Таҗикстаннан килгән “Гөл­шан” дәүләт эстрада-этник ансамбле егетләре чагу киемнәре белән әллә кайдан балкып тора. Кулларында — ике кыллы думбыралар. “Сезнең өч кыллы думбы­рагыздан әллә ни аерылмый да!” — ди егетләр.
Арай Кинҗетаева Казах­станның Алматы шәһәреннән килгән.
— Их, Уфаны күреп өл­гермәдек! — дип уфтана чибәр Арай, җил аударырга тырышкан ак каурыйлы биек баш киемен сакларга тырышып. — Бер каланча кебек һәйкәл янында гына (Дуслык монументы. — А. Ю.) экскурсиядә булдык... Тагын берәр килеп булса, музейларны, башка истәлекле урыннарны да күрәсем килә...
Казах кызлары (“Назик” фольклор-этнография ансамбле) “Ай, былбылым” җыры белән килгән, исәпләре — татарча җырларга.
Үзбәкстанның төрле шә­һәрләреннән 15 кешедән торучы коллективның тәэссорат­лары яхшы, районнарда Сабантуйларда катнашканнар. “Уртак йолаларыбыз да, милли ризыкларыбыз да байтак. Туганнар кебексез. Барысына да, бигрәк тә безне кабул иткән кунакханә хуҗаларына, рәхмәт белде­рәбез!” — ди үзбәкләр бер­тавыштан.
Әзерлек вакытында бергә булганлыктан, сәхнә артында коллективларны аерып та булмады. Дуслашып өлгергәннәр шул! Әмма сәхнәдә һәркем үз илен тәкъдим итте, үз мәдәнияте белән таныштырды. Уфа урамына Бразилия карнаваллары рухы кертеп “Cadica Dance Company” бию коллективы башкаруында самба ритмнары яңгырады. Әле генә динами­калы, әле генә талгын көйләр Кытай мәдәнияте белән таныштырды (“Ланчьжоу йолдызлары” бию коллективы). Азия халыкларының мәдәни мирасын Көньяк Африкадан килгән кунакларның экзотик чыгышы алыштырды — алар яңгыр чакырырга өйрәтте. Халык биюләре, җырлары, тради­цияләр, милли ри­ваятьләрдән сюжетлар — болар барысы да тамашачыны төрле милләт­ләрнең яшәеше, гореф-гадәтләре белән та­ныштырды.
Әйткәндәй, фестиваль 2014-15 елларда Русиянең Шанхай хезмәттәшлек оешма­сында рәислек итү елы планына кертелгән, шуңа да анда катнашучылар — ШОС һәм БРИКС илләреннән иҗат коллек­тивлары. Соңгы елларда бәйрәм “Русия мәдәнияте” федераль программасы кысаларында уза.
Өч сәгать дәвамында концертны алып баручылар Фаягөл Дәүләтъярова белән Дмитрий Каретко тамашачыны катна­шучы илләр, коллективлар тарихы белән таныштырды. Ахырда фестивальдә кат­нашучылар бергәләп сәхнәгә чыкты.