+9 °С
Ачык
Гәзиткә язылуVKOKTelegram
Барлык яңалыклар

Туганнарның табылган чагы...

Миякәтамак авылында Мәһәдиевларның шәҗәрә бәйрәме узды.Шушы авылда гомер кичергән, узган гасырның шанлы елларында тормыш көтеп, балалар үстергән, сугышларын да, ачлык-ялангачлыкларын да, җимерек­лек­ләрен дә үткәргән Мәгъмүрә һәм Гатаулла Мәһәдиев­ларның дөньяга таралган, инде бишенче-алтынчы буынга җиткән оныклары, туруннары бергә җыелды.

Туганнарны бер зур табын артына җыеп сөй­ләшү, танышу (күпләре бер-берсен ишетеп тә белми бит!) Миякә­тамакның абруйлы шәхесе, танылган педагог, тарихчы, бүген авыл старостасы йөген тартучы хезмәт ветераны Җәвит Мәһәдиевның күп еллар күңелендә йөрткән хыялы иде. Ниһаять, авылдагы улы, мәктәп директоры Газинур, туганнан туган энекәше, урындагы малтабар Уралның зур ярдәменә таянып, Җәвит Гатаулла улы изге ниятен тормышка ашырды.
Чараны ул “Мәһәдиев Җәләлетдин Мәһәди улының шәҗәрәсе” дигән зур гына китабын бастырып каршылады. Бәйрәмгә кайтучыларның барысы да әлеге китапка кер­телгән. Мәһәдиевлар чыгышлары белән Татар­станның Апас районыннан. Аларның Башкортстанга килеп урнашуына да озакламый 300 ел була. Бу елларда Мәһә­диевлар, чын-чынлап, илгә генә түгел, бөтен дөньяга таралып өлгерә. Шәҗәрә бәйрәменә кунаклар Татарстаннан, Уфадан, Нефтекамадан, Әлшәй, Бәлә­бәй, Миякә, Туймазы районнарыннан һәм башка төбәкләрдән кайткан иде. Араларында мактаулы исем йөртүчеләр дә бар.
Очрашу Җәвит Мәһә­диев тырышлыгы һәм барлык авыл халкы көче белән төзелгән яңа мәчеттә башланды. Хәер салу, дога кылудан соң, Бөек Ватан сугышында ятып калган һәм Җиңү белән кайткан авылдашларны зурлап искә алу булды. Әйткәндәй, обелискта Мәһәдиевлар фамилиясе зур урын алган.
Хәмерсез, әмма бик мул аш табыны миякә­тамаклылар өчен изге урынга әверелгән салкын тау чишмәләре янында корылды. Монда бәйрәм­нең төп өлеше, гаилә сабантуе узды. Туганнарның са­гынг­ан, табылган чагы бик күңелле һәм хискә бай булды.
Читайте нас: