Күршеләр килә!

Гастроль афишасын Туфан Миңнуллинның “Нәзер” комедиясе ача.

Спектакль геройлары, ике дус — Хикмә­тулла белән Хисмәтулла сугышта нәзер әйтәләр: бу мәхшәрдән исән-сау кайтсалар, бер атнага хатыннарын алышып торачаклар. Исән кайталар, әмма хәзер нишләргә? Нәзер әйткәч, үтәргә тиешсең...

Гастроль барышында тамашачыга драма­тург­ның тагын ике әсәре тәкъдим ите­ләчәк. “Гөргөри кызын бирә” пьесасын Туфан Миң­нуллин махсус Түбән Кама театры өчен 1990-91 елларда иҗат итә. Әсәрдә халыкның йолаларны онытуы, яшьләрнең гореф-гадәтләрне санга сукмавы мәсьәләләре күтәрелә.

“Кызлар кызык итәләр” комедиясендә студент яшь­ләрнең төзелеш отрядында туган хәл-вакыйгалар сурәт­ләнә. Өч егетнең нияте җитди — эш кыйратырга, акча тупларга, гашыйк булмаска. Әм­ма яшьлек үзенекен итә — сүзләрендә тора алмый яшьләр!

Нәбирә Гыйматдинованың “Бүре каны” драмасында Аю Кәрим гаиләсендәге хәлләр тасвирлана. Гаиләдә көтеп алын­ган малай туа. Тик, нигә­дер, йомшак күңелле булып үсә ул, бүреләр заманында югалып калыр төсле. Чарасыз­лыктан ата кеше, бүре аулап, аның канын баласына эчерә. Малайның киләчәк язмышы шуннан соң ничек корылуын сурәтли әсәр.

“СыСыСыРда ясал­ган...­нар” комедиясендә (Ләбиб Лерон) тамашачы ялган “экстрасенслар”ны күзәтәчәк. Ике алдакчының исәбе — халыкны дәвалаган булып, акча җыю. Көлдерә дә әсәр, уйландыра да. Беркатлылык кемдә генә юк икән?

“Яра” драмасында (Аяз Гыйләҗев, Мансур Гыйләҗев) — сугыш фаҗигаләре. Солдат егет яуда исән кала, туган ягына кайта, тик аны әти-әнисе танымый, сөйгән яры да инде башкага киткән...

Спектакльләрне сәхнәгә куюга театрның баш режиссеры, Татарстанның халык артисты һәм атказанган сән­гать эшлеклесе, Дамир Сираҗиев һәм Марсель Сә­лим­җа­нов исемен­дәге пре­мияләр лауреаты Рөстәм Галиев әзерләгән.
Түбән Кама татар дәү­ләт драма театры 1989 елда “Нефтехим” берләш­мә­сенең театр студиясе буларак оештырыла. Театрга нигез салучыларның берсе — аның бүгенге сән­гать җитәкчесе һәм беренче баш режиссеры Рөстәм Галиев. Беренче артистлар: Гөлгенә Зәй­нул­­лина, Гөлназ Фәхразиева, Гөлнур Галиева, Олег Фазыл­җанов, Илшат Мостафин, Илдар Закиров, Фарил Вафиев, Рәис Галиев, Мингали Мө­хәм­мәтшин, Рәзил Сибгатуллин.

Беренче сезон Туфан Миң­нул­линның “Ак тәүбә, кара тәүбә” пьесасы буенча куелган “Кызлар кызык итәләр” музыкаль комедиясе белән ачыла.

1994 елда театр шәһәр мәдәният идарәсе карамагына күчә һәм “Татар яшь­ләре театры” итеп үзгәр­телә, 1997 елда “Түбән Кама татар драма театры” статусы ала, ә инде 2007 елда аңа “дәүләт театры” статусы бирелде.
2012 елда театрга күре­некле драматург Туфан Миң­нул­лин исеме бирелде.

Үткән елларда 70тән артык әсәр сәхнәләш­терелгән. Репертуарда татар, урыс, чит ил драматургларының әсәрләре урын алган. Түбән Кама татар дәүләт драма театры халыкара фестивальләрдә катнашкан, театр белгечлә­ренең, тәнкыйтьчеләренең югары бәясен алган, дан яулаган. Аерым артистларның казанышларын да билгеләп үтү артык булмас. Әйтик, Анатолий Иванов әсәре буенча куелган “Гөнаһлы мәхәббәт өрәге” спектаклендә Мария ролен башкарган Гүзәл Шәмәрданова “Тантана” театраль премиясе кысаларында “Иң яхшы хатын-кыз роле” номинация­сендә җиңү яулаган. Артистлар Рәфил Зәйнуллин белән Юрий Павлов Татарстан Хөкү­мәтенең иң яхшы мәдәният, сәнгать һәм кинематография хезмәт­кәрләренә ярдәм йөзеннән бирелә торган Грантына лаек булганнар. Шул ук грантның “Профессионал” номинация­сендә театрның баш режиссеры Рөстәм Галиев һәм “Перспектива” номина­циясендә яшь артист Гүзәл Шәмәрда­нова бүләкләнгән. Туфан Миң­нуллинның “Гөргөри кияүләре” әсәре буенча куелган “Гөргөри кызын бирә” музыкаль коме­диясендә Үринә ролен башкарган Физәлия Гыйниятуллина “Тантана” театраль премиясе кысаларында “Икенче пландагы иң яхшы хатын-кыз роле” номинация­сендә җиңү яулаган.

— Уфада беренче тапкыр чыгыш ясасак та, Башкортстанга килүебез беренче түгел. Туймазы татар театры белән алмаш гастроль­­­ләр үткәргә­небез, Октябрьский якларында булганыбыз бар. Үзебездә Уфа “Нур” татар дәү­ләт театрын, Мәҗит Гафури исемен­дәге Башкорт академия драма театрын, Салават, Сибай театрларын кабул иткәнебез бар. Чит якларга күп йөрибез, Мәс­кәү тамашачысы да безгә ят түгел. Шулай булса да, гаст­роль­ләрне дулкынланып көтә­без, гастрольнең уңышлы узуы­на, Уфада дуслар табуга өметләнәбез, — ди театрның сәнгать җитәкчесе.

Шулай була күрсен, дуслар булыйк. Көтәбез!