“Әй театр, илһамым син минем!”

1972 елда оештырылган театрга 1994 елда “халык театры” дигән дәрәҗәле исем өстәлә. Җитмешенче еллардан аңа респуб­ликаның атказанган мәдә­ният хезмәт­кәре Зәй­түнә Зәйнашева җитәкчелек итә. Театрның кырык елдан артык эшчән­легендә, др­матургия­нең йөзек кашы булырлык әсәрләр (“Ай тотылган төн­дә”, “Кыз урлау”, “Кара йөзләр”, “Гөргөри кияүләре”, “Ана хөкеме”, “Башмагым”, “Мәхәббәт кошлары”) белән беррәттән, яшь авторлар­ның әсәрләре дә куелган.

— Әлбәттә, олпат дра­ма­тург­ларның әсәрләрен сәхнә­ләштерү зур көч таләп итә. Ләкин, минем фике­ремчә, классиканы уйнарга кирәк. Ул безне — артистларны да, тамашачыларны да — уйланырга мәҗбүр итә, җаваплылык өсти. Елына икешәр спектакль куябыз. Халык теләп йөри, премьераларыбызны көтеп ала, — ди Зәйтүнә Зәйнашева.
Театр республика дәрә­җә­­сендәге конкурсларда җиңү яулый. Әйтик, 2006 елда “Кыз урлау” 156 театр катнашкан “Алтын тирмә” театрлар фестивалендә Гран-прига лаек булган. Өч елдан соң әлеге фестиваль Гафури районында үткән. Гомумән алганда, мондый фестивальләрдә “Иң яхшы хатын-кыз роле”, “Иң яхшы ир-ат роле” номина­ция­ләрендә гафуриле­ләр даими җиңеп килә.

Театрның утызга якын артисты бар. Араларында укытучыларны, эшчеләрне, тәрбиячеләрне, пенсионерларны һәм башкаларны очратырга мөмкин. Әйтик, 80 яшен тутырган Флүрә Садыйкова театр ачылган көннән алып сәхнәдә. Рәзилә Хәбибуллина, Рима Зверева, Әнвәр Газизов, Рамил Сәйфуллин һәм башкалар тамашачыларның яраткан артистларына әйләнгән. Театр район халкын мәдәни агарту юлында зур эш башкара. Шулай ук “Красноусол” курортында ял итүчеләр дә аена ике тапкыр Гафури артистлары белән очраша.

Спектакльләрдән тыш, сәхнә осталары алар алдында концерт белән дә чыгыш ясый. Районда өлкән яшь­тәгеләр оештырган “Ханым” клубының җырлары республика халкын да әсир иткән. Быел сентябрь­дә Уфада узган “Яратам сине, тормыш!” конкурсында “Фольклор коллективы” номинация­сендә лауреат булып кайтканнар.

Агымдагы елда театр тамашачысын бер-бер артлы ике спектакль белән куандырган. Лек Вәлиевның “Кәләш әйттергәндә” комедиясен сәхнәгә гыйнвар ахырында чыгарсалар, мартта якташлары Мөнир Куна­финның “Люксембургка барып кайтканчы” дигән комик фарсының премьерасы бул­ган. Соңгысында эчкечелек проблемасы күтәрел­гәнгә, ул бүгенге көнгә бигрәк аваздаш.

Пьесаның шулай аталу мәгънәсен, серен спектакль башында ук авыл Советы рәисе аңлатып үтә. Имеш, Бөек Ватан сугышы гарасатын кичеп кайткан бер авылдашлары Люксембург дигән бәләкәй генә ил хакында сөйли икән. “Их, шунда барып кайтырга!” дип хыяллана, ди. Һәм салмыш чаклары атналарга сузылган вакытта ире турында сорашканнарга аның хатыны “Люксембургка китте” дип кенә җавап бирә икән. Аннары бу сүз халык теленә кереп китә. Гомумән, спектакль көлдерә дә, елата да...

Әлеге ике спектакль — Зәйтүнә Зәйнашеваның чираттагы уңышы. Театрга янә талантлы яшь көчләр җәлеп ителгән. Димәк, буыннар бәйләнеше дәвам итә, театр яңа сулыш ала.