Гәзиткә 1938 елдан тугрылык саклый!

Ә бит Әбүбәкер аганың тормыш юлын барлагач, аның үзен дә “Кызыл таң” шәхеслә­ре рәтенә кую мөмкинлеге ачыклана. Гәзитебез белән аның “Коммуна” исеме белән йөргән 1938 елдан бирле таныш ул. Бу вакытта Батыргә­рәевлар гаиләсе язылган гәзит мәктәп укучысы Әбүбәкернең дә тормыш юлдашына әйләнә.
Әлеге дәвердә бераз өзек­лек була, әлбәттә. Анысы инде Бөек Ватан сугышы белән бәйле. Әбүбәкер Батыргә­рәевны фронтка 1942 елда алалар. 2нче Украина фронты гаскәрләре составында Воронеждан Австриягә кадәр сугышчан юл үтә, Харьков, Днепропетровск, Польшадагы Краков шәһәрләрен азат итүдә катнаша, Җиңү көнен исә Прагада каршылый. Яугир Батыр­гәрәевның сугышчан батырлыклары орден-медальләр белән билгеләнгән.
Тыныч хезмәткә ул 1947 елның язында кайта, аннары озак еллар дәвамында
БашЦИК исемендәге совхоз­ның Сынны бүлекчәсендә эшли. “Кызыл таң”ны үзаллы рә­вештә гаиләсенә алдыра башлавы да шушы чорга туры килә.
Әйтүебезчә, Әбүбәкер ага­ның гәзитебездән бүген дә аерылганы юк.
— Шулай озак еллар укып барып, мин “Кызыл таң”ның үзем өчен 12 юнәлештә мәгъ­лүмат бирүен ачыкладым, — ди ул. — Алар тормышның барлык өлкәләрен дә иңли. “Кызыл таң”га тугры калуым­ның янә бер сәбәбе: анда бит авылдашым Муса Мөлеков эшләде. Гәзиткә язылу якташларга, милләттәшләргә таяныч булуның бер төре дә бит ул.
Бөек Ватан сугышы яуги­ренә дәүләт тарафыннан уңайлы торак бирелсә дә, Әбүбәкер ага туган авылы Сын­ныда калган. Монда ул кы­зы Рәүзәнә тәрбиясендә яши.

Фәнүр ГЫЙЛЬМАНОВ,
“Кызыл таң”ның үз хәбәрчесе.
Благовар районы.