Балыкчыларның яраткан урыны булачак ул

Шушы көннәрдә Карман ГРЭСы хезмәткәрләре Буй елгасының Карман сусаклагычына балык җибәрде. «Карман балыкчылык хуҗалыгы» җәмгыяте белән килешү буенча сулыкка суүсемнәр белән тукланучы 2 тоннадан артык яшь балыклар - толстолобик һәм ак амур чыгарылган.
Карман сусаклагычындагы экосистеманы һәм гидрофаунаны күп тапкырлар тикшерүләр шуны раслый: ГРЭС сулыкка тискәре йогынты ясамый, суның төп химик күрсәткечләре балыкчылык нормативларыннан тайпылмый, сулык республикада химик һәм биологик күрсәткечләр буенча иң чисталардан санала.
Әлеге балыклар матур ярларда кармак белән утырырга яраткан һәркемнең табышы булачак. Биредә 23 төрле балык бар, хәтта себер осётры да очрый. Тасма һәм ак амур үзенең тәм сыйфатлары белән дан тота: аларның ите витаминнарга һәм кыйммәтле микроэлементларга бай һәм диңгез балыкларыннан калышмый.

- Су объектларында балык популяциясен тергезү өчен ел саен су биологик ресурсларын ясалма тергезү буенча чаралар уздыру күркәм традициягә әверелә бара. Хәзерге вакытта күп кенә компанияләр тирә-як мохитне саклау өлкәсендә экосистемаларны һәм биотөрлелекне саклау, табигать ресурсларын тергезү буенча чаралар комплексын үз эченә алган стратегик бурычларны гамәлгә ашыру кысаларында әлеге эшне башкара, - дип сөйләде республиканың табигатьтән файдалану һәм экология министрының беренче урынбасары Илдар Гарифуллин.

Шунысын да билгеләп үтәргә кирәк, чара су биологик ресурслары балансын саклауга юнәлтелгән һәм төбәктә "Экология" гомумдәүләт проектының "Уникаль су объектларын саклау" төбәк проектын гамәлгә ашыруга ярдәм итә.

Фото: ecology.bashkortostan.ru