-22 °С
Болытлы
Гәзиткә язылуVKOKTikTokINSTAGRAM
Барлык яңалыклар
Җәмгыять
4 октябрь 2014, 03:00

Синдәдер ул иң олы йөрәк!

2 октябрьдә Мәгарифне үстерү институтында республиканың иң яхшы педагогларын бүләкләү тантанасы үтте. Укытучылар көне алдыннан оештырылган бәйрәмгә “Мәгариф” өстенлекле гомумдәүләт проекты кысаларында уздырылган иң яхшы укытучы конкурсында җиңүчеләр, республика бәйгесендә җиңү яулаган иң яхшы башкорт һәм урыс теле укытучылары, республика Президенты грантына лаек булган яшь педагоглар чакырылган иде.

Педагогик эшчәнлектә зур күрсәткечләргә ирешкән талантлы укытучыларның хез­мәте ил күләмендә югары бәяләнеп, 2006 елдан акчалата премия бирелә башлады. Әлегә кадәр аларның саны 1613 кеше булса, Русия Пре­зидентының 200 мең сумлык гранты белән быел янә 35 педагог бүләкләнде. Грант яулаучылар арасында Октябрьский, Баймак, Уфа, Дүртөйле шәһәрләреннән, Миякә, Әлшәй, Авыргазы, Илеш, Тәтешле, Зилаер, Стәрлебаш, Балтач, Чакмагыш, Кушнаренко районнарыннан математика, физика, информатика, инглиз теле, география, башлангыч сыйныфлар укытучылары бар иде. Әлбәттә, истәлекле вакыйга кичерүче тәҗрибәле белгечләр­гә дә бәйгедә катнашучы 264 укытучы арасыннан иң көч­леләре булып билгеләнү җиңел бирелмәгәндер. Иң яхшылар исемлегенә кертелүгә алдынгы карашлы, уку-укыту программаларында техник чараларны киң куллана, һөнәри осталыгын бәйгеләрдә күрсәтә белгән, фәнни-тикшеренү хез­мәтләре, иң мөһиме, укучы­ларның уңышлары сокланырлык булган укытучылар гына дәгъва итә ала.
— Укытучы булу абруйлы да, бик авыр да. Ул мәктәптә генә түгел, өйгә кайткач та шул изге һөнәр кешесе булып кала. Бигрәк тә, авыл укытучысы иң беренче чиратта үзе барысына үрнәк күрсәтә, әхлаклы булырга өнди. Алар бүгенге турында гына уйламый, киләчәкне кайгырта, — диде үзенең җылы котлау сүзләрен җиткереп, Дәүләт җыелышы-Корыл­тайның Мәгариф, мәдәният, спорт һәм яшьләр сәясәте буенча комитеты рәисе Эльвира Аеткулова.
Әлеге тантанада “Иң яхшы башкорт теле укытучысы” һәм “Иң яхшы урыс теле укытучысы” республика конкурсла­рында җиңүче 50 педагог дипломга һәм Башкортстан Хөкүмәтенең акчалата премия­сенә лаек булды. 2007 елдан башлап бирелүче бу премия­нең күләме 2009 елда 50 меңгә кадәр күтәрелде.
Сәрия Яруллина Кыйгы районының Иске Мөхәммәт мәктәбендә 20 елдан артык башкорт теле һәм әдәбияты укыта. Йөзендә сөенеч балкыган авыл укытучысы рәхмәт сүзләрен яраткан укучыларына да, үзе тәрбияләп үстергән биш баласына да, район хакимияте җитәкчеләренә дә җиткерде.