“Тел-мәдәниятебез үсештә!”

2006 елда Хөкүмәт карары белән Архангель районында “Максим Горький” латыш тарихи-мәдәни үзәге төзелә. Ул шушы халыкның гореф-гадәт­ләрен саклау, йолаларны тер­гезү белән шөгыльләнә. Рес­пуб­­ли­каның латыш милли-мәдәни үзәге, район мәдәният йорты, хакимиятнең яшьләр бү­ле­­ге, китапханә, мәктәп, Баш­корт­станның “Мәр­хәмәтле­лек” ветераннар йорты белән даими хезмәттәшлек итә. Ел саен би­редә латыш милли бәйрәм­нәре — “Шәмнәр көне”, “Мэтени”, “Пасха”, “Аналар көне” чаралары оештырыла. Ә республика күләмендә үткә­релгән “Лиго”, “Мартыни”, “Туган тел көне”, “Рай­нис шигърияте көне” бәй­рәмнә­ре чит төбәкләрдән килү­челәрне дә җәлеп итә.
— Үзәк эшчәнлеген телгә алганда, тәү чиратта, балалар өчен оештырылган чараларны атар идем. Теләге булганнар “Авотс” җәйге балалар латыш лингвистик лагеренда ял итә ала. Моның өчен махсус рә­вештә Латвиядән укытучылар чакырыла. Күптән түгел үзәк бер төркем балалар бе­лән, латыш мәдәниятен үсте­рүне күз уңында тотып, “Уфага рәхим итегез” дигән экскур­сиядә катнашты. Шулай ук, үзәк “Атбаллс”, “Бититес” балалар фольклор ансамбльләре белән берлектә Төбәкара яшь­ләр сабантуенда һәм республика күләмендә оештырылган башка чараларда еш катнаша. Быел, мәсәлән, “Бититес” ансамбле Башкортстан халыкла­рының эстрада җыр­лары һәм биюлә­ре II республика яшьләр фес­тивалендә катнашты. Эшчән­леккә күбрәк яшь­ләрне, балаларны җәлеп итәргә тырышуыбыз — телебезне, гореф-гадәт­ләребезне саклауны, аларны яшь буынга җиткерүне күз уңында тота, — ди үзәк җитәк­чесе Людмила Муценэк.
Чыннан да, үзәк бик еш балалар өчен төрле чаралар оештыра. Уеннар, конкурслар рәвешендә үткән бу бәйрәм­нәрдә укучылар теләп катнаша. Мәсәлән, “Латыш тарихи-мә­дә­ни үзәге дусларын чакыра”, “Фольклор иленә сәяхәт”, “Җыр­лыйбыз да, уйныйбыз да” бәйрәмнәре укучыларда тирән тәэссоратлар калдырган. Моннан тыш, латыш халкының мил­­ли ашларына, гореф-гадәт­ләренә багышланган чаралар да узып баручы елда еш үткә­релгән.
— Һәр елны Латвиядән укы­тучы килеп, балаларны туган телгә өйрәтә, латыш хал­кының мәдәнияте, тарихы, гореф-гадәт­ләре белән таныштыра. Латыш халкы вәкилләре республикада бик күп булмаса да, безгә телебезне, мә­дәния­тебезне саклап калу өчен бөтен шартлар тудырыл­ган, — ди Людмила Николаевна.
Чыннан да, латышларның биредә яши башлавына чагыштырмача аз вакыт узган. Шулай булуга карамастан, урындагы халык белән берлә­шеп, алар­ның да гореф-гадәт­ләрен өйрән­гәннәр. Әйе, кеше күңеле бик күп мәдәниятләрне сыйдыра ала. Әлбәттә, теләге бар кешегә анда, үзенең милли кыйммәт­ләреннән тыш, башка халыклар­ныкына да урын табыла. Киң күңелле, башка мил­ләт вәкил­ләрен хөрмәт итә бе­лү­челәр яшә­ве белән аерылып тора ул безнең республика.