“Пожарка”сы булмагач, янгыны да чыкмасын иде дә бит...

Русиядә бик күп гасырлар элек үк янгынга каршы тору чаралары оештырылган. 1649 елда хәлле кешеләр ихатасында су сиптерү өчен җиз торбалар һәм агач чиләкләр, урта хәллеләр биш йортка бер торба һәм һәрберсендә чиләкләр тотарга тиеш була. Мәскәү шәһәренең барлык урамнары да янгын хәвефсезлеген саклау буенча өлеш­ләргә бүленә, анда яшәүчеләрнең исемлеге төзелеп, янгын очрагына, һәрберсенең бурычлары билгеләнә.
Ә бүген, әйтик, авылда янгын чыкса, кем ярдәмгә килә? Кайчандыр һәр җирдә булган “пожарка”лар юк, ә район үзәгеннән кайчан килеп җитәләр? Анда да бармы әле ул янгынга каршы хезмәт?! Республикада бүген янгынга каршы хезмәтнең нибары 12 подразделениесе эшли. Шул ук вакытта, Удмурт Республикасында алар — 126, Татарстанда — 99. Әлеге шартларда янгынга каршы ирекле дружиналар оештыру — көн таләбе.
Күптән түгел Дәүләт җыелышы-Корыл­тай­ның берничә коми­теты шушы мәсьәләгә багыш­ланган “түгәрәк өстәл” оештырды. Анда Башкортстан Хөкүмәте Премьер-министры урынбасары Марат Мәһәдиев, Бө­тен­русия янгынга кар­шы ирекле җәм­гыять­нең Башкортстан төбәк бүлекчәсе Советы рәи­се Радик Гарданов, хакимият башлыклары, Татарстан һәм Сверд­ловск өлкәсе вәкилләре катнашты. Чараны Дәүләт җыелышы-Ко­рыл­тайның Сәнәгать, инновацияләр үсеше һәм эшкуарлык буенча комитеты рәисе Рәшит Хәйруллин алып барды. Ул муниципаль берәмлекләрне янгынга каршы ирекле подразделениеләр төзүдә активлашырга чакырды.
Әлбәттә, аларны төзү матди чы­гымнар таләп итә. Әмма бөтен нәрсәне дә акча бизмәненә салып булмый. Әйтик, ирекле подразделение әгъза­ларының балаларына укырга кергәндә ташламалар булса, яки авылда яшә­гәннәр өчен өстәмә печәнлек бүленсә, башкача ярдәм күрсәтелсә, бирегә килүчеләр күбрәк булыр иде. Моннан тыш та аларга ниндидер игъ­тибар күрсәтү һәр муниципаль берәм­лекнең кулыннан килерлек.



Премьер-министр урынбасары республикада ирекле янгын хезмәте карамагындагы техниканың бик начар сыйфатлы булуын ассызыклады һәм әлеге авыр, хәвефле хезмәт өчен түләү мәсьәләсен күтәрде.
Дәүләт җыелышы-Корылтай коми­теты рәисе Рәшит Хәйруллин фи­керенчә, республикада янгын очрак­ларын киметү башка мөһим социаль-икътисади мәсьәләләр белән бер югарылыкта хәл ителергә тиеш. Ел саен 4000гә кадәр янгын 300дән артык кешенең гомерен өзә, ә матди югалтулар турында сөйләп тә торасы түгел — уттан бернәрсә дә калмый. Шуңа да, бу мәсьәләләрне хәл итүдә республиканың кайбер норматив актларын үзгәртү сорала икән, бу кичекмәстән эшләнергә тиеш.
Урман янгыннары чоры аеруча хәвефле. Әлеге вакытта республиканың 172 торак пункты, 62 бакчачылык ширкәте, 100 икътисади һәм 44 җәйге ял объектларына шушы хәвеф яный. Аны булдырмас өчен ирекле дружиналар эшчәнлеген киңрәк җәелдерү көн таләбе булып тора.