Янә дә халык җилкәсендә...

Әйтик, “Эксперт” рейтинг агентлыгы генеральный директоры Павел Сәмиев белдерүенчә, ОСАГОга хакларны 40-50 процентка күтәрү әлеге базарның 1,5 ел дәвамында тотрыклылыгын тәэмин итү мөмкинлеге бирәчәк. Аннары инде чираттагы мониторинг үткәрергә туры киләчәк. Һәм, аңлашылуынча, аның нәтиҗәләре буенча 1,5 елдан соң ОСАГО бәяләренең тагын күтәрелүен көтәргә кирәк. Чөнки Павел Сәмиев аңлатуынча, әлеге хак күтәрелү дә инфляция һәм ав­томобильнең, аңа запас частьләрнең, ремонт эшләре­нең кыйммәтләнүе белән бәйле. Шуңа бәрабәр түләүләр күләме дә арта бара. Һәм, әлеге тенденция дәвам итәчәк икән, һичшиксез, ОСАГО полисы бәясе дә әлеге күрсәткечтә тукталып калмаячак.
Русия Дәүләт думасының Икътисади сәясәт, инновацион үсеш һәм малтабарлык буенча комитеты рәисенең беренче урынбасары Михаил Емельянов та, “хакларны күтәрү кичектергесез” дип исәпли.
— Тарифларны арттыру “гомер һәм сәламәтлек буенча” түләү лимитларының өч тапкыр (160 мең сумнан 500 мең сумга кадәр) артуы белән бәйле. Шулай ук полисларның кыйммәтләнүенә юл хәрәкәте вакыйгасында каза күрүчеләргә исәпләүнең яңа системасы һәм зыянны бәяләүнең бердәм методикасы кертелү, инфляциягә бәйле запас частьләргә бәяләрнең артуы да тәэсир итте. Шушы факторлар түләүләр күләменең кичектергесез үсешенә китерде, бу исә, полисларга хакны арттырмаган очракта, мотлак, ОСАГО базарындагы кризисның тирәнәюен тагын да көчәйтәчәк иде. Узган елда ОСАГО полисларының 23-30 процентка кыйммәтләнүенә килгәндә инфляция аны “ашап” бетерде инде... — диде ул.