Гыйлемле мең яши

— Туймазы районы һәм шәһәре мәктәпләре менә берничә ел инде уку-укытуны модуль системасы буенча оештыра, ягъни каникуллар гадәттәге вакытка туры килми. Бу күчеш нәр­сәгә бәйле? Әлеге систе­маның уңай яклары нинди?

— Чыннан да, безнең мәк­тәпләрдә укыту процессы алты модульгә бүленгән, ягъни 5-6 атнадан соң укучылар каникулга туктый. Иң элек, бу аларга йөкләнешне ел дәвамында тигез бүлү зарурлыгына бәйле. Модульләрнең өстенлеге – каникул еш булу арыганлык туплану мөмкинлеге бирми, укучылар тулы кыйммәтле ял ала.

— Бүген күп кенә гомуми белем бирү учреждениеләре уку-укытуның ысул-төр­ләрен, эчтәлеген, чараларын яңартуга юнәлтелгән педагогик башлангычларны сынау мәйданчыклары булып тора. Туймазы районы һәм шәһәре мәктәпләре бу уңайдан активлык күрсә­тәме?

— Район мәктәпләрендә 18 терәк-методик мәйданчык эшли. Собханкулда күп еллар инде башлангыч сыйныфларда укыту-тәрбия бирүдә уен төрендәге сәламәтләндерү технологияләре кулланыла. Спорт юнәлешендә эш алып барганнар берничә: Туймазыдагы 1нче гимназиядә балалар спорты үзәге оештырылган, 4нче мәктәп, шулай ук, бад­минтонны үстерүгә өлеш кертә, 2нче мәктәптәге “Тор­мыш — хәрәкәт” гимнастика клубына ата-аналар, укытучылар, микрорайонда яшәүчеләр йөри. Серафимовкадагы 3нче мәк­тәптә өченче ел инде “Русия патриоты тәрбияләү” мәйдан­чыгы эшләп килә, кадетлар сыйныфы ачылды. Нөркәй мәктәбе экология юнәлешендә эш алып бара. Шәһәрнең 8нче мәктәбе “Ватанга каләм белән хезмәт итәм” инновацион проектын сайлаган. 2нче мәктәптә “Лидерлар мәктәбе”, “Мин + мин = гаилә”, “Яңа чынбарлык” мәйданчыклары, ата-аналар клубы гамәлдә, анда һәм шулай ук 4нче мәктәптә яшь тик­шеренүчеләр клублары актив эшчәнлек җәелдергән. 6нчы, 7нче һәм Нөркәй мәктәп­лә­рендә укытучылар һәм укучылар өчен консультация-методика үзәкләре эшли. 6нчы һәм 7нче мәктәпләрдә сәләтле балаларны ачыклау, үстерү, аларга ярдәм күрсәтү буенча федераль һәм республика мәйданчыклары гамәлдә. Атап үтелгән белем бирү учреж­дениеләренең беренчесе — Башкортстан мәгарифне үстерү институты сәләтне үстерү фән­ни-методик үзәгенең тәҗрибә-сынау мәйданчыгы.