Урман - гомумхалык байлыгы ул!

Һәм, әлбәттә, соңгы унъеллыкларда республика урман­нарының бер өлешен инвесторлар кулына тапшыру да эзсез калмады. Рәсми мәгъ­лүматларга караганда, гомум инвестиция күләме 50 миллиард сумлык утыздан артык “урман проекты” тормышка ашырыла. Ул тулысынча гамәлгә кергәннән соң, өстәмә рәвештә 3,5 мең яңа эш урыны булачак. Һәрхәлдә, берничә ел элек инвесторлар килешүгә шундый шарт белән кул куйды. Әйткәндәй, алар арасында федераль дәрәҗәдәге инвестиция проектлары да бар.
Әйтергә кирәк, республиканың урман хуҗа­лыгы эшчәнлегенә бәя биргәндә, инвесторларның иң эреләре — “Башлеспром” hәм “Селена” компанияләрен читтә калдырып булмый. Дөресен әйтергә кирәк, республиканың урман байлыклары килешүгә ярашлы ышанып тап­шырылган әлеге ике предприятие эшчәнлеге соңгы елларда тармакта гына түгел, Хөкүмәт дәрәҗәсендә зур ризасызлык тудырды. Бу турыда “Кызыл таң” гәзитендә берничә мәкалә дә дөнья күргән иде.
Күптән түгел Башкортстан Баш­лыгы Рөстәм Хәмитов Хөкүмәтнең чираттагы утырышында урман тармагында ашыгыч рәвештә тәртип булдыруны таләп итте. Рөстәм Зәки улы, төп инвесторларның рес­публика мәнфәгатьләрен санга сукмыйча эшләвенә ризасызлык белдерде, урман байлыгын урлауга чик куюны таләп итте hәм урманнарны тергезү, инвесторлар тарафыннан агач эшкәртү бизнесына җавап­лылыкны күтәрү бурычларын билгеләде.
Башкорстанның урман ху­җалыгы бүген нинди үзгәрешләр кичерә? Инвесторлар, арендаторлар белән эшлекле мөнәсәбәтләр ничек тормышка ашырыла? Шушы hәм башка сораулар белән без республиканың урман хуҗалыгы министры Динир Әхмәтҗановка мөрәҗәгать иттек.