“Ашкадар” алга ашкына

Аннары бәйрәм Сухаревка авылы янындагы акланда дәвам итте. Сабантуй мәйда­нына кергән юлда “Ашкадар” хуҗалыгының заманча техникасы — “Барго” чәчү комплексы, Русиядә һәм чит илдә җитештерелгән комбайннар, тракторлар тезеп куелган иде.
Ашкадарлылар бәйрәмен зур уңышлар белән каршылый. Җыелучыларны, иң элек, хуҗалык җитәкчесе Илдус Халитов сәламләде. Ул пред­приятиенең икътисади үсеш күрсәткечләре турында җен­текле сөйләде. Даими корылыкны исәпкә алып, 2013 елда авыл хуҗалыгы культураларын яңа “ноу-тилл” технологиясе белән эшкәртүгә күчәргә карар ителгән. Моның өчен тиешле техника сатып алынган. Былтырдан “Ашкадар” һәм “Сухайла” хуҗалыкларында чәчүлек­ләр шушы технология буенча эшкәртелә. Соңгы биш елда хуҗалык сөт җитештерүне — 50, ит җитештерүне 40 процентка арттырган.
— Сезнең алтын юбилеегыз быел 85 еллыгын бил­геләячәк Мәләвез районының барлык халкы өчен зур бәйрәм. Совхоз 1965 елдан бүгенге көнгәчә район икътисадына һәм агросәнәгать комплексы үсешенә лаеклы өлеш кертә. Үсемлекчелектә һәм терлек­челектә алдынгы инновацион технологияләр кертү, заманча техника һәм токымлы терлек сатып алу исәбенә югары нәтиҗәләргә ирешелә, — диде Малик Вахитов.
Ашкадарлыларның төп байлыгы — хезмәт кешеләре, хезмәт династияләр һәм ветераннар. Сабантуйда фидакарь хезмәте белән Мәләвез тө­бәген данлаучыларга бүләкләр тапшырылды. Хуҗалыкның орден кавалерлары Тәлгать Көсәпкулов белән Петр Головинга “Мәләвез районы һәм шәһәренең шәрәфле шәхесе” исеме бирелде.
Тантаналы өлештән соң ат чабышлары башланды. Ха­лыкның күпчелеген милли көрәш җәлеп итте. Балалар өчен төрле аттракционнар һәм мавыктыргыч уеннар оештырылды. Күңелле җырлар, курай моңы, дәртле биюләр кичкә кадәр яңгырап торды.