“Тикшерелгәнне сайла!”

Соңгы ике елда сатып алучылар “Башкортстан продукты” маркасы куелган товар­ларга күбрәк өстенлек бирә. Израильдә үскән кишердән Иглиндә үскәне яхшырак икәнен аңламаган кеше калмады диярлек. Моңа әлеге брендны халыкка таныту буенча эшчән­лек тә ярдәм итә, кибет киш­тәләрендә аңа аерым урын бирелә. “Җитештерүче – дистрибьютер – сәүдә челтәре” чылбырының ныклыгы да зур әһәмияткә ия. Әйтик, зур булмаган хуҗалыкка эре сәүдә челтәрләре белән хезмәттәш­лек итү авыр, чөнки аның өчен җитештерү күләме бәләкәй. Ә кечерәк сәүдә нокталары белән турыдан-туры сөйләшүләр алып бару кыенлык тудыра. Шуңа да җитештерелгән продукция арзан хакка күмәртәләп алучыларга эләгә һәм арытабангы хакларны алар билгели. “Башкортстан продукты” проектында катнашучы хуҗа­лык һәм предприятиеләр исә җитештерелгән продукцияне турыдан-туры кибет киштәлә­ренә җиткерү мөмкин­легенә ия. Шунысы да мөһим – аларның сыйфаты һәрдаим күзәтү астында.
– Җитештерелгән продук­ция­нең сыйфаты аерым күзәтү астында, – ди “Башкортстан продукты” проекты җитәкчесе Александр Ковтуненко. – Чөнки аның бер төре сатып алучыга ошамаса, шушы марка астында чыккан башкаларның сыйфатына да ышаныч кими.
Тикшерүләр һәр квартал саен үткәрелә. Моның өчен махсус лаборатория хезмәт­кәрләре җәлеп ителә. Алар тик әлеге бренд астында чыккан продукциягә генә кагыла.
“Башкортстан продукты” проектына ярашлы, сәүдә челтәрләре генә түгел, ә кафе-рестораннар да үзебездә үстерелгән яшелчә-җимешкә игътибарны арттыра. Бәрәң­генең генә дистәләгән төре бар, ди белгечләр. Аларның һәрберсе аерым ризык төренә ярый – измә өчен бер төрле, кыздырырга – башкасы. Кишер, кәбестә, кабак һәм башкалар да шулай. Фермерлар аларның кайсына ихтыяҗ зуррак буласын алдан чамалап кына түгел, ә төгәл исәпләнгән заявкаларга таянып эшне планлаштыра ала.
– Республика җитештерү­челәренә сәүдә итү юлларын ачу максатында без сатып алучылар конференцияләре, рестораторлар белән очрашулар, консультацияләр оештырабыз, – ди Александр Ковтуненко.– Моннан тыш, алар сату техникасы буенча тренинг, коммерциягә кагылышлы тәкъ­дим­нәр төзү тәртибе буенча түләүсез укуларга кушыла.
Җитештерелгән продукция­нең сыйфатын квартал саен тикшереп тору, аның үрнәк­ләрен кибет киштәләреннән алып карау җитештерүчегә ничек тәэсир итә соң? Бу хакта без соңгы чорда билгелелек ала барган “Дәүләкән ит ярымфабрикатлары” пред­прия­тиесенең про­изводство җи­тәкчесе Жанна Дунюшкинадан белештек:
– “Башкортстан продукты” проектына кушылу эшкә җитди карауны таләп итә, әлбәттә, – ди ул. – Әмма кайчандыр район чикләреннән чыгып сәүдә итү дә кыенлык тудырса, бүген билгеле брендка эшләү безгә эре сәүдә нокталары белән хез­мәттәшлеккә мөмкинлек бирә, безгә ышанып, икелән­мичә килешүләр төзиләр.
Тагын шунысы бар, фермерлар нинди генә сыйфатлы продукция җитештерсә дә, аны саклау, төргәкләү мәшәкатьләр тудыра. Авыл хуҗалыгы продукциясенең саклау вакыты кыска, ә җитеш­терүченең, гадәттә, склад биналары юк дәрәҗәсендә.
– Чыннан да, республикада буш склад хуҗалары да, җитештерелгән продукцияне кайда сакларга белмәгән фермерлар да бар, – ди бу хакта Башкортстан Сәүдә ассоци­ация­се җитәкчесе Виталий Черевков. – Аларның мәнфә­гатьләре тәңгәл килгәндә, безнең фермерлар товарны алдан би­релгән заказ буенча җитештерү мөмкинлеге дә алачак.
Елдан-ел киңрәк җәел­дерелгән “Башкортстан продукты” проектындагы янә бер яңалык – сыйфатка тагын да зуррак игътибар бирү. Әлеге бренд билгесе куелган то­варның төргәгендә хәзер “Башкортстан Рес­публи­ка­сында җитештерелгән. Кирәкле техно­логияләр һәм санитар таләп­ләргә ярашлы эш­ләнгән. Бәйсез лабораториядә тикшерелеп тора”, дип язылган. Ә бу чыннан да ышандыра.