+19 °С
Болытлы
Гәзиткә язылуVKOKTelegram
Барлык яңалыклар
Җәмгыять
9 сентябрь 2015, 21:52

Эшләсәң — эш карышмый!

Бакалы районының Иске Маты авылында мини-пекарня ачкан Лилия һәм Альберт Фәттаховлар шулай ди.Без еш кына “Авыллар бетә, яшьләр саланы түгел, каланы сайлый”, дип зарланырга яратабыз. Бакалы районының Иске Маты авылында моның нәкъ киресен күрергә мөмкин.

Фәттаховлар ике ел элек Октябрьский шәһәреннән Альберт­ның туган авылына — Иске Матыга кайтып төп­ләнгәннәр. Бирегә кайтуга тәрбиягә алган улла­рының йөрәк чире белән авыруы, табибларның: “Балага авыл һавасы кирәк”, — диюе сә­бәпче булган. Иң куанычлысы шул, авылга кайтып яшәү­ләренә ярты ел дигәндә баланың чире юкка чыккан. Ләкин моңа карап кына Фәттаховлар туган җирләрен ташлап кире шәһәргә китмәгәннәр.
— Ирем озак еллар Себергә йөреп эшләгәнлектән, акча белән беркайчан да авырлык булмады. Шул ук вакытта өйдә эшсез дә ятасы килмәде. Һөнәрем буенча ашнакчы буларак, өйдә төрле камыр ризыклары пешереп, икмәк салып саттым. Бакалы районы үзәгендәге кайбер оешма-предприятие эшчеләренә төшке­леккә җылы аш пешереп илттем. Ә инде заказлар көннән-көн күбәя башлагач, мини-пекарня ачу уе белән яна башладым. Ирем дә бу баш­лангычымны күтәреп алды. Авылның нәкъ уртасында буш торган бина да табылды. Июнь аенда шуны сатып алып зурайттык һәм кирәкле җиһаз-корылмаларны сатып алдык та, берничә көн элек кенә икмәк һәм икмәк-күмәч җитештерү белән шөгыльләнә башладык.
— Элек-электән Иске Маты үзенең пекарьнясы белән дан тотты. Биредә пешкән хуш исле икмәкне тирә-як авыллардан һәм район үзәгеннән үк килеп алалар иде. Бүген килеп әнә шул традициянең киредән әйләнеп кайтуын без бик хуплап каршы алдык. Яңа пекарьняны һәм шул ук бина эчендәге кибетне ачып, Лилия үзен һәм тагын өч кешене эшле итте. Бүгенге кризис заманында бу мактауга лаек,— диде яңа объектны ачу тантанасында чыгыш ясап, Яңа Маты авылы хакимияте башлыгы Ирина Максимова.
Читайте нас: