-30 °С
Болытлы
Гәзиткә язылуVKOKTelegramЯRus
Барлык яңалыклар
Җәмгыять
5 декабрь 2015, 23:45

Яраткан эш кенә күңелгә ята

Тырышкан – табар, дип халык юкка гына әйтмәгән.Егерме-утыз ел элек авылларыбызда колхозлар гөрләп торды, яшьләр, балалар күп иде. Хәзер хәлләр башкача: колхозлар юк, яшьләр авылдан китә, балалар аз... Кемнән сорама, бу хәлне авылда эш юклык белән аңлаталар. Шулай да авылны яратучы кешегә тормышын җайларга төрле юллар бар. Эштән курыкмаган, уңган кешеләр кайда да гөрләтеп, матур итеп яши белә.

Мәсәлән, Шаран районы­ның Зәет авылында яшәүче Ләйлә һәм Фирдәвис Әхмәтов­ларны күпләргә үрнәк итеп куярлык. Савучы булып эшләү­че Ләйлә, тракторчы һөнәрен үз иткән Фирдәвис колхоз таралгач югалып калмаганнар. Кайберәүләр эш юклыкка зарланып ятканда алар... пима басарга керешкән. Хәер, “ке­реш­кән” дию бик дөрес булмас, керешкәнче озак кына өйрә­нер­гә туры килгән әле.

— Шаранда элек пима баса торган цех бар иде. Ирем иртән “попутка” белән китә дә көн буе шунда эшкә өйрәнә иде, — дип сөйли Ләйлә ханым.

— Башта начаррак пималар чыкты инде, — ди Фирдә­вис. — Бер-ике ел ныклап өй­рән­гәч, эшләр көйләнеп китте. Әле һаман өйрәнәм, остара барам. Җиңел хезмәт түгел.

— Ничек уйлыйсыз, теләгән һәркем бу һөнәрне үзләштерә аламы?

— Юктыр. Зур түземлек та­ләп итә бу шөгыль. Көнендә үк акчасын түләп, эшләшергә кешеләр чакырып карадым, барысы да азрак булашып карый да китә...

Шулай итеп, барлык эшне Фирдәвис үзе башкара. Иң якын ярдәмчесе — хатыны Ләйлә.

Пима басу серләренә кил­гән­дә, аңа көзге йон гына ярый икән. Аны халыктан җыялар, буяуны Кукмарадан алып кайталар. Башта йонны чистарталар, Ярмәкәйгә тетәргә алып баралар, аннан соң түшиләр, шуннан итек формасына кертә­ләр... Бер пима эшләү өчен якынча дүрт сәгать кирәк.

Фирдәвис илле яшен бил­ге­ләгән, Ләйлә әлегә “алтын”га җитмәгән. Шуңа карамастан, аларның инде алты оныгы бар. Уллары, килене һәм аларның дүрт баласы белән бергә яши­ләр. Бу өйдә эшсез утырырга беркемнең дә вакыты юк. Күп эшне бер-берсенә ярдәмлә­шеп, күмәкләшеп башкаралар. Ләйлә ханым килене белән матур-матур чәчәкләр дә бәйләп саталар.

— Пима басу ошыймы соң? — дип сорыйм Фирдәвис Әх­мәтовтан. — Күренүенчә, җиңел эш түгел...

— Яратмаган эшне күңел биреп башкарып булмый, — дип җаваплый ул. — Бу шө­гыльне үзләштерүемә сөенәм. Аллаһка шөкер, сатып алучыларыбыз бар, кереме дә дөнья­га җитә.

Хезмәт сөючән кеше, телә­сә һәм тырышса, авыр булса да, күңеленә якын эш таба ала шул.
Читайте нас в