“Җан эрозиясе туфрак эрозиясен тудыра”

Башкортстанда уңдырышлы җирләр кимүнең сәбәпләре нәрсәдә?2015 ел Берләшкән Милләтләр Оешмасының Генераль ассамблеясе тарафыннан “Халыкара туфрак елы” дип игълан ителде. Аның максаты — азык-төлек белән тәэмин итүдә һәм мөһим экологик функцияләрдә җәмәгатьчелекнең игътибарын туфракның ни дәрәҗәдә мөһим булуына юнәлтү. Соңгы унъеллыкларда күпчелек илләрдә, шул исәптән, Русиядә, туфракның деградацияләнүе арту күзәтелә. Әлбәттә, алар күп очракта кеше эшчәнлеге һәм табигать факторлары белән бәйле. Галимнәр фикеренчә, кызганычка каршы, туфрак җәмгыятебездә онытылып баручы кыйммәтле ресурска әйләнде. Планетадагы җирләрнең 33 проценттан артыгы деградацияләнгән. Русиядә, мәсәлән, 1990 елдагы белән чагыштырганда, чәчүлекләр 46 процентка, ягъни 42 миллион гектарга кимегән. Шул ук вакытта, бүген дөньяда 800 миллионнан күбрәк кеше ачлыктан җәфалана.Башкортстанда туфракны саклау буенча нинди чаралар күрелә? Республика төбәкләрендә әлеге мәсьәләнең ни дәрәҗәдә мөһим булуын аңлыйлармы? Республика Хөкүмәте, тармак министрлыгы, район хуҗалыклары җитәкчеләре бу юнәлештә ничегрәк эшләргә тиеш? Әлеге язмада шушыларга кагылышлы үз фикерләрем белән уртаклашырга телим.