Юлны кар каплый, ФАПта дару юк

Юлларны тазартуны оештыру – авыл хакимият­ләре башлыклары бурычы. Зуррак предприятиеләре, оешмалары булган авылларда эшләр көйле барса, хуҗа­лыгы калмаган, көчлерәк фермеры булмаган, район үзәгеннән ерак урнашкан кечкенә авыллар өчен юлларны чистарту мең бәлагә әверелә. Ә юл, хәрби термин белән әйткәндә – стратегик объект. Балаларга мәктәпкә барырга кирәк, кемгә-дер – эшкә, кемнеңдер авырып китүе, бәбигә чирләве бар... Юл белән янгын хәвефсезлеге дә бәйле.

Әлеге мәсьә­ләгә ачыклык кертүне сорап Стәрлета­мак районының Бүре­каз­ган авылы хакимияте башлыгы Фәнүс Солтановка мөрәҗәгать иттек.

– Авыл хакимияте балансында җиңел машинадан башка, техника юк. Юлларны чистарту өчен шәхси тракторы булган кешеләргә мөрәҗәгать итәргә туры килә. Ә алар бушка эшләми, әлбәттә, – ди Фәнүс Барый улы.

Хакимият башлыгы халыкны борчыган тагын бер мәсьәлә белән бүлеште:
– Безнең авыл биләмәсенә караган Бүреказган, Садовка авылларында фельдшер-акушерлык пунктлары бар, ләкин алар халыкка дару сата алмый, чөнки моның өчен махсус лицензия кирәк. Дару сатуны көйләүче оешмалар кечкенә авыллар мәнфәгатьләрен һәм ихтыяҗларын, аларның чикләнгән мөм­кинлекләрен исәпкә алсын иде, әлбәттә. Һичьюгы, иң кирәкле даруларны сату рөх­сәт ителсен иде. Авыл халкының картаюын, яшьләрнең азаюын да истә тотарга кирәк, мәсәлән, безнең биләмәдә яшәүче 2232 кешенең 600е пенсионерлар, – ди ул.

Бүген хәл болай тора: кемдер авырып китсә, фельдшерга бара, ул дарулар язып бирә, ләкин алар биредә сатылмый. Авыру кеше даруны ниндидер ысуллар белән 40-50 чакрымдагы район үзәгеннән кайтарта. Һәм, дару юллап чыгып киткән­че, авыру әбиебез, я бабаебыз иң тәүдә тәрәзәгә карарга мәҗбүр – буран чыкмаганмы, юлларны кар басып китмәгән­ме?..