+13 °С
Болытлы
Гәзиткә язылуVKOKTelegram
Барлык яңалыклар
Җәмгыять
26 апрель 2016, 02:00

Фән казанышларының урыны — производствода!

Бу өлкәдә дә илдә әйдәүче төбәк булыйк.Узган атнада Уфа берничә көнгә илнең яшьләр фәне үзәгенә әверелде. Республика башкаласында “Яшьләр күзе белән интеллектуаль милек өлкәсендә төбәк программалары һәм проектлары” дигән темага Бөтенрусия яшьләр фәнни-гамәли конференциясе үтте. Әлеге форумның илнең киләчәк үсешендә ни дәрәҗәдә мөһим әһәмияткә ия булуы турында шул да сөйли: конференция эшендә Русиянең Федерация Советы Рәисе Валентина Матвиенко катнашты.

Конференцияне ачып, Башкортстан Башлыгы Рөс-тәм Хәмитов мондый форумнарны республика җир­ле­гендә оештыру соңгы елларда даими күренешкә әве­ре­лүен һәм бездә бу юнәлеш­тәге эшкә зур әһәмият бире­лүен сызык өстенә алды.

— Мондый чараларны кабул итү безнең өчен бик әһә­миятле, чөнки шул рәвешле ил­дә, дөньяда киңрәк танылу максаты куябыз. Ә инде кон­ференциянең эчтәлегенә килгәндә, ул көнүзәк темага багышлана. Илдә иҗади процесс өзеклекләрсез, даими алып барылырга тиеш. Аның үсеш алуы, гыйльми держа­ваның тагы да көчлерәк һәм куәтлерәк була баруы мөһим. Бу җәһәттән әлеге форум да, һичшиксез, нәтиҗәле булыр дип ышанам, — диде конфе­ренциядә катнашучыларга мөрәҗәгать итеп Рөстәм Зәки улы.

Әйтергә кирәк, конферен­циягә чын-чыннан Русия фә­не­­нең киләчәге җыелды. Алар — үзләренең уйлап табу казанышларына патент алган яисә аңа заявка биргән, гыйльми журналларда мәка­ләләре дөнья күргән 14-30 яшьтәге укучылар, студентлар, яшь галимнәр һәм уйлап табучылар. Җәмгысы илнең 29 төбәгеннән 262 проект килгән. Алар белән Валентина Матвиенко һәм Рөстәм Хә­митов фәнни-гамәли конференция башланыр алдыннан Конгресс-холл бинасында оештырылган күргәзмәдә танышты. Үзәк урынны биредә, әлбәттә, Башкортстан югары уку йортлары студентлары, мәктәп укучылары эшләгән һәм Уфа моторлар төзү производство берләшмәсе каршындагы “Авиация техноло­гияләре технопаркы” фәнни-производство ассоциа­ция­сендә уйлап табылган эшлән-мәләр алды. Мобиль аэродинамик торба, вакуум нигезен­дә эшләүче күпфункцияле станок, сәламәтлеге чикле кешеләр өчен юл күрсәтүче робот, интеллектуаль көзге, дымлылыкны үлчәүче СВЧ, атмосфера составын конт­роль­дә тотучы сенсор һәм баш­калар — болар барысы җитәкче­лектә генә түгел, конференция эшендә катнашучыларда да зур кызыксыну тудырды. Һәм алар киң үсеш алачак икән, тәү чиратта, Башкортстанның фән казанышлары буларак тарихка керәчәк!

Әйтергә кирәк, Федерация Советы Рәисе Валентина Матвиенко да республикада фән өлкәсенең, бигрәк тә яшьләр фәненең нәтиҗәле үсешүен мактап телгә алды, Башкортстан тәҗрибәсен башкаларга үрнәк итеп куйды.

— Башкортстан Республикасы — куәтле интеллектуаль һәм сәнәгать үсешкән төбәк. Икътисадны инновацион үстерү һәм интеллектуаль милек өлкәсендәге проектларны тормышка ашыру буенча сездәге бай тәҗрибә башка төбәкләр өчен дә бик файдалы булачак дип ышанам, — диде атап әйткәндә Валентина Матвиенко конфе­ренциядәге чыгышында.

Федерация Советы Рәисе илдә һәр уйлап табучы аның хезмәтенә ихтыяҗ булуын һәм интеллектуаль милекнең ышанычлы саклануын тоярга тиешлеген сызык өстенә ал­ды. Ул шулай ук һәр уйлап табучы янында аның гыйльми ачышын потенциаль файдаланучы торырга тиешлеген билгеләде.

— Фәнни нигездәге производстволарга ярдәм күрсә­түнең мөһим шарты булып стратегик планлаштыру элементларын кертү тора. Күп кенә төбәкләрдә, шул исәп­тән Башкортстанда да социаль-икътисади үсеш стратегиясен тормышка ашыруда уңай тәҗрибә бар. Аларда инновацион бизнес файдаланырга мөмкин булган үсеш юнәлеш­ләре һәм өстенлек­ләр ачык итеп күрсәтелгән. Бу тәҗрибәне арытаба да үстерергә кирәк, — диде Валентина Матвиенко.

Федерация Советы Рәисе шулай ук конференциягә иң күп һәм сыйфат ягыннан иң яхшы проектлар тәкъдим иткән төбәк җитәкчесе буларак, Башкортстан Башлыгы Рөстәм Хәмитовны Рәхмәт хаты белән бүләкләде.

— Республикадан 116 проект тәкъдим ителде. Баш­кортстанның яшь галимнәрен һәм шундый инновацион республика җитәкчесен ихлас котлыйбыз, — диде Валентина Матвиенко.

Башкортстан Башлыгы Рөстәм Хәмитов билгеләвен­чә, 2010 ел белән чагыштыр­ганда, республикада фәнни-техник эшләр өлеше ике тапкыр артып, 11 миллиард сум­га җиткән.

— Без бүген киләчәк нигезен салабыз, алар 15-30 елдан республиканың, илнең чәчәк атуын тәэмин итәчәк. Бу яшь кешеләр Башкортстанны, илне алга әйдиячәк, — диде моңа бәйле Рөстәм Зәки улы.

Үз чиратында, Валентина Матвиенко кыска гына чорда Башкортстанның әлеге юнә­леш­тә зур сикереш ясавын төбәк җитәкчесенең фән өлкәсенә шәхсән иң җитди игътибар юнәлтүе белән бәйләде.

— Башкортстан Башлыгы — техник фәннәр докторы, Бауман училищесын тәмам-лаган. Гомум инновацион үсешкә генә түгел, яшь талантларга — мәктәп укучыла­рына, студентларга, яшь га­лимнәргә — аларның инновацион уйлап табу эшчән­ле­генә ярдәм итүгә дә ул шәх­сән игътибар бирә. Бу бик мө­һим, — диде Валентина Матвиенко.

Валентина Матвиенконың һәм Рөстәм Хәмитовның эшлекле очрашуы барышында да инновацион фәнне һәм интеллектуаль милекне үстерү мәсьәләләре үзәккә чыгарылды. Уфа моторлар төзү производство берләшмәсендә исә җитәкчеләр авиация тех-нологияләре технопаркы эше, биредә уйлап табылган һәм эшкә кушылган фән казанышлары, заманча техно­ло­гияләр белән танышты. Пред­прия-тие коллективы белән аралашканда исә Валентина Матвиенко эш шартлары, аларны борчыган мәсьәләләр белән кызыксынды.

— Федерация Советы исе­меннән илкүләм шундый мөһим чараны югары дәрәҗә­дә оештырганыгыз өчен тагын бер тапкыр рәхмәт бел­дерәм. Конференция бик югары дәрәҗәдә оештырыл­ган. Анда катнашучылар санының ике тапкыр артуы да Башкортстанда, шәхсән Сезнең тарафтан моңа кызыксыну гаять зур булуы турында сөйли. Сезнең уртаклашыр тәҗри­бәгез бар. Һәм бу тәҗрибә Федерациянең башка субъектларында да киң таралыш алырга тиеш. Без шушы максатны алга куябыз, — диде ахырда Уфада үткән чарадан зур канәгатьлек белдереп Валентина Матвиенко.

Йомгаклап нәрсә әйтергә була? Тәүге ике елда Русия­нең Федерация Советы базасында үткәрелгән чараның быел башка бер төбәккә түгел, нәкъ Башкортстанга күченүе, өстәвенә икеләтә күб­рәк катнашучыларны җыюы, анда 262 инновацион проект тәкъдим ителүе, әлбәт­тә, республикадагы фәнни даирә-нең дә, җитәк­че­лек-нең дә югары казанышы дияргә ки­рәк. Бездә яшьләр фәненең һәм интеллектуаль милекне саклауга бәйле өлкәнең нәти-җәле үсе­шүен һәм биредә ил күлә­мендә таратырлык алдынгы тәҗрибә булуын чыгышларында Федерация Советы Рәисе Валентина Матвиенко да бер­ничә тапкыр телгә алды. Ди­мәк, хәзер максат — ирешелгәннәрдә тукталып калмыйча, яңа дәрә­җәгә чыгу булырга тиеш. Һәм, безнең карашка, монда гыйльми ачышлар ясау, яңадан-яңа уйлап табулар белән дөньяны таң калдыру гына җитми, аларны оешкан төстә, киртә-каршылыкларсыз производствога кертү, шул рә­вешле гомум икътисад һәм җәм­гыять, ахыр чиктә төбәк һәм ил файдасына эшкә кушу да көн таләбе булып тора. Шул очракта гына инновацион фән, бүгенге яшь галимнәр, республика Башлыгы Рөстәм Хәмитов билге­ләгәнчә, 15-30 елдан Башкортстанны, Русияне әйдәп баручы көчкә әвереләчәк һәм аларның энә белән кое казуга тиң авыр хезмәтләре илебез үсешенә чын-чыннан файда китерәчәк. Шушы эшне оештыруда да илдә үрнәк төбәк булыйк, шуңа омтылыйк!

Әйткәндәй...

Уфа шәһәре иң яхшы муниципаль практикага Бөтенрусия конкурсында берьюлы ике дипломга лаек булды. Аерым алганда, “Уфа шәһәренең Гадәттән тыш фонды” проекты өчен башкала хакимияте — икенче дәрәҗә диплом, “Җәмәгать хәвефсезлеге үзәге” проекты өчен Рәхмәт хаты белән бүләкләнде. Җиңүчеләрне бүләкләү тантанасы узган атнада Мәскәүдә Федерация Советы каршында Урындагы үзидарә буенча советның һәм Дәүләт думасы каршындагы Урындагы үзидарә буенча Советның берлектәге утырышында үтте.

Җәмгысы исә конкурста 60 төбәктән 607 проект катнашкан. Җиңүчеләр 12 номина­циядә билгеләнгән. Шушы кадәр эш арасында Уфаның берьюлы ике дипломга лаек булуы, әлбәттә, куанычлы хәл һәм республика башкаласының нәтиҗәле үсешүе турында сөйли.
Читайте нас: