-19 °С
Болытлы
Гәзиткә язылуVKOKTelegramЯRus
Барлык яңалыклар
Җәмгыять
25 июнь 2016, 02:00

Орден Генералны тапты!

Моңа җиде дистә елдан артык вакыттан соң ил һәм республика җитәкчелеге, Миңнегали Шәйморатовның күпмеңләгән патриот якташлары тырышлыгы белән ирешелде.23 июньдә Республика йортында Башкортстан Башлыгы Рөстәм Хәмитов Русиянең мәдәният министры Владимир Мединский белән очрашты. Очрашуда төбәктә мәдәниятне һәм сәнгатьне үстерүгә бәйле мәсьәләләр тикшерелде.

— Соңгы елларда без мәдәниятне үстерүгә зур игътибар бирәбез, бездә даими рәвештә төрле дәрә­җәдәге фестиваль-конкурс­лар үтеп тора. Болар барысы җәмгыятьтәге гомум мәдәни мохитне булдыра. Шунысы мөһим, мәдәни мохиткә елдан-ел күбрәк халык җәлеп ителә. Шул рәвешле Уфа һәм республика Русия һәм халыкара дәрәҗәдәге мәдәни чаралар­ны үткәрү үзәгенә әверелеп бара, — диде очрашуда Башкортстан Баш­лыгы Рөстәм Хәмитов.

Үз чиратында Владимир Мединский да республикада бу юнәлештә алып барылучы эшчәнлеккә югары бәһа бирде.

— Башкортстанда тормышка ашырылучы проектлар күп яклап ил күләмендә үрнәкле булып тора. Беренче чиратта, мин биредә авыл клубларына ярдәм күрсәтү проектын атап үтәр идем. Кызганычка каршы, узган елда аны ил күләмендә тарату мөмкинлеге булмады, әмма быел моңа, һичшиксез, ирешербез дигән ышанычтамын, — диде атап әйткәндә Владимир Мединский.

Ул, шулай ук, “Симфония төне” чарасына да югары бәя бирде.

—“Симфония төне” елдан-ел яңа сыйфат һәм югарырак дәрәҗә ала бара. Шуңа да без аны федераль финанслауга керттек. Анда хәзер дистә меңләгән шәһәр кешеләре катнаша. Бу җәһәттән Кино төне дә, Музейлар төне, Сәнгать төне, Китапханә төне чаралары кебек үк, илкүләм акциягә әве­релер дигән ышаныч белде­рәбез, — диде Владимир Мединский.

Әйткәндәй, шушы ук көнне Уфа амфитеатрында ачык һавада бу җәйдә тәүге “Симфония төне” концерты тәкъдим ителде. Аның кысаларында баш дирижер Раушан Якупов һәм дирижер Камил Абдуллин җитәкчелегендә Милли симфоник оркестр, күренекле солистлар — курайчы Роберт Юлдашев, кларнетчы Артур Наҗиуллин, җырчы Диляра Идрисова, Фәйзи Гаскәров исемендәге халык биюләре ансамбленең балалар студиясе талантлары, дөнья дәрәҗә­сендә танылу алган яшь артистлар Маша Мирова, Артем Биткулов һәм башкалар чыгыш ясады. Симфония төне Заһир Исмәгыйлевның 100 еллыгына, Сергей Прокофьев­ның — 125 еллыгына, Кино елына һәм популяр классикага багышланды.

Рөстәм Хәмитовның Владимир Мединский белән очрашуында шулай ук 2019 елда билгеләнәчәк БАССР оештырылуга 100 ел тулу чараларына әзерлек мәсьәләләре дә тикшерелде.

— Бу — республика тарихында гына түгел, илкүләм дәрәҗәдә мөһим чара. Башкортстан тәүгеләрдән булып килешү башлангычында Совет республикасы составына керә. Әлбәттә Мәдәният министрлыгы республиканың мәдәни башлангычларын хуплап, аларга ярдәм күрсәтәчәк. 100 еллык кысаларында алар яңа сулыш алыр дип уйлыйм, — диде Владимир Мединский.

Очрашу барышында тагын бер мөһим вакыйга булды. Русия Президентының Дәүләт бүләкләре буенча идарәсе начальнигы урынбасары Рөстәм Латыйпов Башкортстан Башлыгы Рөстәм Хәмитовка генерал-майор Миңнегали Шәймо­ратовның Кызыл Йолдыз орденын, аның һәм 112нче Башкорт кавалерия дивизиясенең данлыклы сугышчан юлы турында архив материалларын тапшырды.

— Бу безнең республика өчен зур һәм тарихи вакыйга, Башкортстан символы булган кешенең Бөек Ватан сугышында яулаган ордены республикага кайтты. Бу вакыйга тарихи хакыйкатьне тергезү җәһә­теннән дә, яшь буында ватан­пәрвәрлек хисен тәрбияләү ягыннан да бәяләп бетергесез зур әһәмияткә ия, — диде Рөстәм Хәмитов.
Башкортстан Башлыгы билгеләвенчә, бу гомум тырышлык нәтиҗәсе булып тора.

— Русия Президенты Хакимияте, Мәдәният министрлыгы, республиканың власть структуралары һәм, әлбәттә, Бөек Ватан сугышына бәйле тарихи хәтерне тергезү буенча мең­нәр­чә кешеләр алып барган колачлы эшчәнлек нәтиҗә­сендә Башкортстанның асыл улы генерал Шәйморатовның мөһим мирасы республикага кайтты, — диде ул.

— Мине шунысы аптыратты: бүгенге көнгә кадәр генерал Шәйморатовның хәтта һәлак булган көне дә төгәл генә билгеле түгел. Гомумән, аның био­графиясендә “ак таплар” бик күп. Бу җәһәттән әлеге “ак тап­лар”ны җуеп, генералның чын биографиясен тергезү Башкортстан тарихчыларының мө­һим эше булырга тиеш. Бәхеткә, орденнар сакланган урында генералның ордены табылды. Бу сирәк күренеш, чөнки 90нчы елларда СССР­ның күп кенә дәүләт наградалары үтильләштерү һәм Русиянең яңа дәүләт наградаларын эшләү өчен җибәрел­гән. Ә менә Шәйморатовның ордены сакланган, — диде бу уңайдан Рөстәм Латыйпов.

Үз чиратында Владимир Мединский да генерал-майор Шәйморатовның мирасы республикага кайтарылуга зур канәгатьлек белдерде һәм бу җәһәттән ил Президентының Дәүләт наградалары буенча идарәсе һәм Башкортстан ягы тарафыннан башкарылган кү­ләм­ле эш өчен рәхмәт сүзлә­рен җиткерде.

Шушы ук көнне Владимир Мединский Конгресс-холлда Русиянең Мәдәният министрлыгы каршында Мәдәният буенча Координацион советның ХХIII утырышын үткәрде.

— Бүгенге көн тәртибенә ике мәсьәлә чыгарылды. Аларның берсе Русия киносы елы чараларын тормышка ашы­руга бәйле. Бу җәһәттән күпсанлы чаралар үтә. Әйтик, бүген Мәскәү халыкара кинофестивале ачыла. 27 августта беренче тапкыр бөтенрусия “Кино төне” фестивале үтәчәк. Бу чара да даимигә һәм халык тарафыннан көтеп алынганга әверелер дип ышанам, — диде Владимир Мединский.

Шул ук вакытта илнең мә­дә­ният министры билгелә­венчә, бөтен төбәкләр дә Русия киносы елы чараларын тор­мыш­ка ашыруга тиешенчә алынмаган. Андыйлар алдында Владимир Мединский тиз арада хәлне төзәтү бурычы куйды.

Икенче мәсьәлә авыл җи­рендә мәдәният учрежде­ниеләре челтәрен үстерү мәсьәләләренә кагылды. Бу җәһәттән Владимир Мединский Башкортстанны үрнәкле төбәк итеп куйды.

— Былтыр Башкортстанда булганда миңа яңа үрнәктәге клубны күрсәттеләр. Шушы үрнәктә илнең һәр төбәгендә дә авыл клублары челтәрен үстереп буладыр, дип уйлыйм. Башкортстанда исә ел азагына кадәр шундый 15 клуб ачылачак, — диде ул.

Утырышта мәдәният министры шулай ук Бөек Җиңү­нең 70 еллыгына әзер­лек һәм үткәрү барышында республика мәдәният хезмәткәрләренең фидакарь эшчәнлегенә рәхмәт белдереп, алар арасыннан берничә кешегә дәүләт бүләк­ләре тапшырды.

23 июньдә “Симфония төне” концертын караганнан соң, кичә Координацион совет эшендә катнашучылар Кырмыскалы районының Илтерәк авылында күпфункцияле авыл клубы эше белән танышты, арытаба “Звени, коса” республика фольклор бәйрәмендә булды. Шул ук көнне Кырмыскалы районында Авыл җирен­дә мәдәниятне үстерү буенча бөтенрусия семинар-конференциясе узды.

Бүген исә Хөсәен Әхмәтов исемендәге Башкортстан дәү­ләт филармониясендә Бөтен­русия виртуаль концерт залы­ның презентациясе үтәчәк.
Читайте нас в