“Йолдызлы шәһәр”дә тормыш кайный

Ямьле Кандракүл буенда урнашкан күпсанлы ял үзәклә­ренең берсе – Гайдар исемен­дәге лагерьга беренче сменага 387 бала килгән. “Кандракүл” лагеренда “Яшь журналист” сменасы бара. Анда республи­ка­ның күренекле журналистлары осталык дәресләре үткәрә­. Биредә барлык өч смена да юнәлешле булачак. Авыр тормыш хәлендә калган үсмер­ләрне “Ровесник” кабул итә. Палаткалар шәһәрчеге “Ватан”да җәй дәвамында турист серләренә төшенгән үсмерләр озайлы походларга йөри. Алексеевка авылындагы элекке мәктәптә ике ел элек ачылган “Яшьлек” лагеренда беренче-икенче смена – гадәти, өченче­се авыр тормыш хә­лендә калган, аз тәэмин ител­гән гаилә­ләр­дәге балалар өчен булса, дүртенчегә республикадан яшь спортчылар киләчәк.

Быел социаль якланмаган, аз тәэмин ителгән гаиләләр­дәге балаларның ялын оештыруга федераль һәм республика бюджетларыннан тоемлы акча бүленгән. Алар Түбән Троицкий авылында урнашкан “Таллыкүл” һәм Әлшәй районындагы Чехов исемендәге шифаханәләрдә ял итәчәк. Шәһәрдәге “Изумруд” шифа­ханә-профилакторие да ата-ана тәрбиясеннән калган, опекага алынган балаларны кабул иткән.

Укуда, иҗатта, спортта уңышларга ирешкән укучыларны Кырымга җибәрү тради­циягә әверелгән. Быел июль ахырында 13 бала Евпаторий шәһәрендәге “Салют” лагерена китәчәк.

Теләге булган үсмерләр апрель урталарыннан ук эшли башлаган. Җәй дәвамында 500гә якын укучы бала, шәһәр­не төзекләндерүдә катнашып, акча эшли алачак. Балигъ булмаганнарны эшкә урнаштыруны республика һәм шәһәр биләмәсе финанслый.

Мәктәпләр каршындагы җәйге хезмәт берләшмәләре эшен тәмамлаган. Аларда уку­чылар 14 көн дәвамында мәк­тәп яны участокларында эш­ләгән.

Ялны оештыруның иң популяр төре исә – мәктәпләр­дәге көндезге үзәкләр. Районда алар ел әйләнәсенә, һәр каникул саен эшли. Җәй дәва­мында исә 31 мәктәптә һәм 2 өстәмә белем бирү учрежде­ниесендәге шундый үзәкләрдә 1445 кеше ял итә. Аларда балаларны ике тапкыр ашату каралган.

Шәһәрнең Балалар-үсмер­ләр иҗат йорты каршындагы шундый үзәккә йөрүчеләр “Йолдызлы шәһәр” гражданнары булып китә. Әлеге һөнәрмән­нәр шәһәрчегендә һәркемнең паспорты бар. Алар бик кызыклы һәм мавыктыргыч про­фессияләр белән таныша. Моның өчен теге яки бу һөнәр ияләре балалар янына үзләре килә. Кунакларның иң беренчесе – үзәк район дәваханә­сеннән медицина хезмәткәр­ләре була. Кызыксынучан кызлар һәм малайлар “Ашыгыч ярдәм” машинасын уратып ала, һәр җиһазны күреп калырга тырыша. Ә 48нче янгын сүндерү бүлегеннән берьюлы ике машинада килгәннәр. Утны буйсындыручылар җиһазлар­ны эшләтеп күрсәткәндә һавага көчле су ташкыны ургылгач, балалар таң кала. Тугыз катлы йорт биеклегендәге күтәрткеч­тән үзләренә таныш йөзү буенча тренер Андрей Старков кул болгагач, барысы да аһ итә. Шундый биеклектә эшләү өчен янгын сүндерүчеләр махсус әзерлек үтә, әлбәттә. Әлегә малайлар аларның махсус киемнәрен генә киеп караган.

Чираттагы кунаклар исә юл-патруль хезмәте машинасына утырып килгән иде. ЮХХДИнең юл хәрәкәте хәвефсезлеген пропагандалау буенча инспекторы, полициянең өлкән лейтенанты Алсу Хәлиуллина балаларның юл кагыйдәләрен яхшы белүеннән канәгать калды. Арытаба отрядлар якында гына урнашкан паркта көтелмә­гән урыннарда яшерелгән кайбер юл билгеләрен табарга һәм аларның нәрсә аңлатуын әйтергә тиеш иде. Балалар күмәкләп моны бик тиз башкарып чыккач, кәефләре тагын да күтәрелде.

“Йолдызлы шәһәр”дә акча эшләүнең төрле юлларын сынап карарга мөмкин. Шунда ук “банк” эшли, кемдер “чәчта­раш­­ханә” ачкан, хәтта тылсым бүлмәсе дә бар. Һәр көн өчен “чек кенәгәсе”нә виртуаль акча күчерелә. Ә смена ахырында лагерь хакимияте оештырган кибеттән аларга чын тәмле бүләкләр алырга була.

— Икенче ел инде лагерь сменасы дәвамында балаларга менә шундый рольле уен тәкъ­дим итәбез. Аларга бик ошый. Тапшырылган 500 гаризадан 200 баланы сайлап алдык. Күпбалалы, аз тәэмин ителгән гаиләләргә өстенлек бирелде, — ди Балалар-үс­мерләр иҗат йорты директоры Гөлзидә Нигъмәтуллина. – Вожатыйлар – шушы ук балалар белән ел дәвамында төрле түгәрәкләрдә, берләшмәләрдә шөгыльләнүче хезмәткәр­ләребез.

Иҗат йортындагы ике бассейн, уку бүлмәләре, остаха­нә­ләр, спорт һәм концерт зал­лары да ял итүче укучылар карамагында.

Районда һәм шәһәрдә балалар җәйне мавыктыргыч һәм файдалы итеп үткәрә алсын өчен барлык шартлар да тудырылган.