Заман белән бергә

— Ирек Миңневәлиевич, шушы көннәрдә 2016 елның икенче яртысына матбугатка язылу кампаниясе тәмам­лан­ды. Аның нәтиҗәләре нинди? Бу кампаниядә ниндидер яңалыклар, үзенчә­лекләр булдымы?
— Республика буенча гәзит-журналларның гомум тиражы 1,2 миллион данә тәшкил итте. Статистика күрсәтүенчә, Башкортстанның һәр дүртенче кешесе вакытлы басмага языла. Бер басманы бөтен гаи­лә­гә алдыруларын исәпкә алганда исә, гәзит һәм журналларны безнең халык яратып укый, дияргә була. Әйткән­дәй, тиражның 10 проценты май аенда үткән Бөтенрусия матбугатка язылу ункөнлеге барышында җыел­ды. Анда аеруча шәһәр һәм район киңкү­ләм мәгълүмат чаралары яхшы нәтиҗә күрсәтте — ункөнлек барышында җыелган гомум тиражның 60 проценты “районка”лар өлеше­нә туры килә. Форсаттан файдаланып, гәзит редакцияләренә һәм муниципаль берәмлекләр хаки­мият­ләренә язылу кампаниясен оештыруда актив эшчән­леклә­ре өчен рәхмәт бел­дерәм.
Республика халкына ярдәм күрсәтү максатында Русия почтасы матбугат чараларын тараткан өчен өстәмә ташламаны Бөтенрусия матбугатка язылу ункөнлекләрен үткәргән вакытта гына бирә иде. Быел исә беренче тапкыр Русия Элемтә һәм киңкүләм комму­никация­ләр министрлыгы белән киле­шү нигезендә язылу кампаниясе дәвамында бер­ничә социа­ль әһәмиятле басмага (алар исемлегенә Баш­кортстанның кайбер район гәзитләре дә керде) даими рәвештә 15 процентлы ташлама булдырылды. Русия почтасыннан тради­цион ташламаларны Бөтенру­сия матбугатка язылу ункөн­лек­ләрендә катнашучы басмалар алды. Шул рәвешле, Русия почтасы тарафыннан бирелүче ташла­маларның гомум күләме 30 процентка кадәр җитә.
Гәзит-журналларга язылу уңайлы булсын өчен барлык почта бүлекчәләрендә дә язылуның бердәм автоматлаштырылган системасы кертелде. Аның ярдәмендә клиент бөтен язылу агентлыклары каталог­лары буенча үзен кызыксындырган басмага иң аз хак куел­ганын сайлап языла ала. Бу гражданнарның вакытын һәм акчасын янда калдыра.
— Почта хезмәткәре көне якынлаша. Һөнәри бәйрә­мегезне нинди күрсәткечләр белән каршылыйсыз?

— Әгәр дә саннардан башласак, республиканың почта элемтәсе күрсәткән хезмәт­ләрнең гомум күләме йөзгә якынлаша. Аларны 1277 элемтә бүлекчәсе һәм 10 мең хезмәткәр, шул исәптән йортларга көн саен хатлар, матбугат басмалары, социаль түләү квитанцияләре илтүче һәм элемтә бүлекчәсендә алырга мөмкин булган бөтен хезмәт­ләрне күрсәтүче 5 мең почтальон тормышка ашыра. Көн саен Русия почтасының республика филиалы хезмәткәр­ләре 250 мең хат һәм посылка ала, эшкәртә һәм адресатларга илтеп тапшыра, 56 мең түләү кабул итә.
Безнең эшчәнлектә төп өстенлек — клиентлар өчен уңайлы шартлар тудыру. Поч­та­ның теге яки бу хезмәтеннән файдаланучы һәр кеше үзе өчен уңайлырагын сайлый ала. Бүгенге көндә өч төрле форматта хезмәт күрсәтелә. Алар — элемтә бүлекчәсенә үзең бару, йортка почта хезмәткәре килеп хезмәт күрсәтү һәм Русия почтасының интернет-порталы аша ярдәм алу. Күрсә­телгән хезмәтнең сыйфаты моңа бәйле үзгрәми, ул шәһәр­дә дә, авылда да югары дәрә­җәдә кала.

— Бүген республика халкында сез санап үткән хез­мәтләрнең кайсы аеруча зур сорау белән файдалана?

— Халыкта почта аша түләүләр киң кулланыла. Банк бүлекчәләре аз булган район җирендә бу хезмәт аеруча популяр. Былтыр Русия почтасы аша республикада коммуналь хезмәт­ләр өчен 20 миллионнан артык түләүләр һәм 400 меңгә якын салым түләүләре кабул ителде. Республика халкы газ һәм электр энергиясе өчен башкарган түләүләрнең 40 проценты элемтә бүлекчәләре аша тормышка ашырыла.

— Сез бу хезмәткә аеруча район җирендә ихтыяҗ зур дидегез. Почта бүлекчәләре республиканың эре шәһәр­лә­реннән читтә җитәрлекме?

— Безнең республикада Русия почтасы бүлекчәләренең 80 проценты авылларда урнашкан. Бер яктан, без эшчән­легебезне планлаштырганда моны исәпкә алырга, икенче яктан, кайда урнашуына карамастан, һәр бүлекчәнең югары дәрәҗәдә хезмәт күрсәтүен тәэмин итәргә тиешбез. Шул сәбәпле, почта эшчәнлегендә пенсия һәм пособиеләр тарату иң социаль әһәмиятле хезмәт булып кала. Пенсионер ника­дәр генә ерак яшәсә дә, түләү­ләр вакытында китерелергә тиеш.

— Элемтә бүлекчәлә­рен­дә күрсәтелүче тагын нинди хезмәтләргә халыкта ихтыяҗ зур?

— Районнарда почта бүлек­чәләрендә сатылган товарларга ихтыяҗ зур. Аеруча бу район үзәкләреннән еракта урнашкан, кибетләре дә булмаган торак пунктларына кагыла. Билгеләп үтүемчә, без авылдагы элемтә бүлекчәләре эшенең үзенчә­леген исәпкә алырга тиеш. Еш кына төпкел авыллардагы почта бүлекчәсе бердәнбер дәүләт институты гына булып калмыйча, тышкы дөнья белән бәйләүче ролен дә үти.

— Сезнең карашка, Русия почтасы эшчәнлегендә кайсы юнәлешләр өстенлекле булырга тиеш?

— Бүген бөтен дөньяда интернет аша сәүдә популярлашты, бу безнең республикада да күзәтелә. Төбәктә яшәү­челәр тарафыннан чит ил интернет-кибетләрендә ясалган заказлар саны елдан-ел арта. Былтыр Русия почтасы башкортстанлыларга чит ил интернет-кибетләреннән җибә­релгән 1,8 миллионга якын посылка тапшырды. Бу аннан алдагы ел күрсәткеченнән 30 процентка күбрәк.

— Заказ буенча җибә­релгән товарлар, нигездә, кайдан килә?

— Төп заказлар Кытайдан килә. Халыкара посылка-лар­ның 80 проценты шушы илгә һәм Көньяк-Көнчыгыш Азия дәүләтләренә туры килә. Дөнья­ның иң эре интернет-ки­бетләре нәкъ шунда урнашкан. Калган посылкалар республикага Европа илләреннән һәм АКШтан килә.

— Посылканы ничә көн көтәргә кирәк?

— Әгәр дә элек Башкортстанда яшәүче чит ил интернет-кибетеннән заказын ике айга кадәр көтсә, бүген бу вакыт 15-20 көн тәшкил итә.

— Ә икътисадтагы киеренкелекне почта тойдымы?

— Заказларның гомум күләме артуга карамастан, бер заказның уртача бәясе кимеде. Шул рәвешле, бүгенге хәл-шартлар безне нәтиҗәлерәк эшләргә этәрә.

— Посылкалар агымы арткан. Ә бүлекчәләр саны шул килеш калган...

— Әйе, һәм бу без күр-сәткән хезмәтләрнең сыйфатын күтәрү турында уйланырга сәбәп булды. Бу максатта Русия почтасы хезмәтләндерүнең яңа төрен — посылкаларны тапшыру һәм кабул итү хезмә­тен булдырды. Үзәк бер генә хезмәт күрсәтә — посылкаларны тапшыра һәм кабул итә. Шул рәвешле хезмәт­ләндерү тизлеге күпкә арта. Бер посылканы алу өчен өч минутлап вакыт үтә. Һәр үзәк элек 10-15 почта бүлекчә­сенә туры килгән эш күләмен башкара. Былтыр республикада шундый алты үзәк эшли башлады, быел аларга тагын бишәү өстә­ләчәк. Беренче үзәкләр Уфа һәм Стәрлетамак кебек эре шәһәрләрдә ачылса, хәзер алар Салаватта, Нефтекамада һәм Октябрьскийда да эшли башлаячак. Киләчәктә башка торак пунктларда да ачылачак.

— Почта бүлекчәсе республика шәһәрләре һәм районнары үсешендә нинди роль уйный?

— Почта челтәрен киңәй­теп, без шушы территориядәге икътисадны үстерәбез. Почта эш урыннары булдыра, бюджетны тулыландыра, сатып алучылар ихтыяҗын канәгать­ләндерә. Шул исәптән — урындагы җитештерүчеләр эшләп чыгарган уникаль товарларга да.

Моның өчен Русия почтасы почта хезмәтенең яңа төрен — хатларны адреслы җибә­рүне гамәлгә кертте. Ул товарлар турында мәгълүматны фәкать алар белән кызыксынган кеше­ләргә җиткерү мөмкин­леге би­рә. Үзенең клиентлары — район, республика һәм бөтен ил кешеләре турында мәгъ­лү­матлар банкына ия булган почта мондый хезмәт­ләрне күр­сәтә ала. Тиешле бәйләнеш бул­дырылганнан соң почта товарны теләсә кайсы адрес буенча илтеп тапшырырга мөм­кин. Бу эшкуарларга яңа базар­ларга чыгу, бизнесларын киңәйтү, шул рәвешле төбәк икътисадын үстерүдә катнашу мөмкинлеге бирүче почта һәм логистика хезмәт­ләренең әзер комплексы.

— Почтаның яңа хезмәт­ләреннән почта банкы эшли башлавын да телгә алырга кирәк. Бу проект нидән гыйбарәт?

— Чыннан да, шушы елның апрелендә республикада, бөтен илдәге кебек үк, Почта банкы эшли башлады. Хәзер элемтә бүлекчәләрендә банк хезмәтләре алырга да мөмкин. Бүгенге Почта банкының клиент үзәкләре республикада 12 почта бүлекчәсендә эшли.

— Һөнәри бәйрәм алдыннан хезмәттәшләрегезгә ни­ләр теләр идегез?

— Барлык хезмәткәрләргә дә намуслы һәм авыр хезмәт­ләре өчен рәхмәт белдерәм. Аерым рәхмәт сүзләрен ветераннарга җиткерәм. Алар хезмәтеннән башка бүгенге уңышларга ирешеп булмас иде. Сезгә бәхет, ныклы сәла­мәтлек һәм иртәгәсе көнгә ышаныч белән каравыгызны телим.