Сусадым, сулар бирегез, яшәгән җиремне күрегез...

“Туры элемтә” ил Хөкүмәте Рәисе, “Бердәм Русия” партиясе җитәкчесенең Уфадагы иҗтимагый кабул итү бүлмәсендә оештырылды. Әйткәндәй, бирегә сигез ел дәвамында 12 мең кеше мөрәҗәгать иткән. Шуларның өч меңе – язма рәвештә. Төбәк халкын, башлыча, торак, суд-башкару системасы, социаль тәэминат, торак-коммуналь хуҗалык, авыл хуҗалыгы һәм җир мөнәсәбәтләре мәсьәләләре борчый. “Туры элемтә” бу юлы да “кызу” барды. Депутатлар Раил Әсәдуллин, Рамил Хәкимов, Румиль Азнабаев, Елена Родина, Рәсүл Госманов, Эльвира Аеткулова, Альбина Бурангулова, Рузалия Хисмәтуллина һәм Рәшит Хәйруллин ике бүлмәдә телефон аша халык сорауларына җавап бирде.

– Власть халыкны ишетергә һәм аларны борчыган көнүзәк мәсьәләләргә һәрвакыт игътибарлы булырга тиеш, – диде Раил Әсә­дуллин. – Бүгенге чара нәкъ шушы мак­сатка хезмәт итә. Республика халкына – активлык, депутатларга нә­тиҗәле эш телим.

Иң беренче булып Яңавыл шә­һәреннән Рим Арсланов шалтыратты. Пролетарская урамында шәхси йортларда яшәүчеләр газ кертү мәсь­әләсен күтәрде.

– Башкортстан “зәңгәр ягулык” белән тәэмин ителү күрсәткече буенча ил төбәк­ләре арасында алдынгы урыннарны били, – дип җавап бирде Дәүләт җыелышы-Корыл­тайның Урындагы үзидарә, гражданлык җәмгыяте институтлары үсеше һәм киң мәгъ­лүмат чаралары буенча комитеты рәисе Румиль Азнабаев. – Газ үткәрү эше республикада бүген дә дәвам итә. Мәсьәлә көн эчендә генә хәл итәрлек түгел. Бу юнәлештәге эш барышы белән танышып, урамнарны мөмкин кадәр тизрәк газ тәэминаты планына кертү чарасын күрәчәкбез.

Бу юлы да торак-коммуналь хуҗалык игътибар үзәгендә булды. Уфаның Рига урамында урнашкан тулай торакта яшәүче Надежда Ильина күптән ремонт үт­кәрелмәвенә зарланды. Тулай торакта 84 бүлмә бар. Ул элек фанера комбинатыныкы бул­ган. Шәһәр карамагына тапшырылгач, бинаны Уфаның 14нче торак-файдалану ида­рәсе хезмәтләндерә икән.

– Сезнең очракта мәсьәлә торак хуҗаларына бәйле, – дип җавап бирде Торак сәясәте һәм инфраструктура үсеше буенча комитет рәисе Елена Родина. – Иң элек тулай торакны карау-тоту тарифын ачыкларга кирәк. Диварларны ремонтлату һәм буяту өчен бер елга булса да тарифны ике сумга арттырырга кирәк. Бу торак хуҗа­лары җыелышында хәл ителә. Бурычлылар белән дә эш алып барыгыз. Мин мәсьәләне өйрәнеп, берничә көннән сез­нең белән бәйләнешкә чыгып, ярдәм кулы сузармын.

“Туры элемтә” барышында шушы ук тулай торактан шул ук мәсьәлә белән янә бер ханым мөрәҗәгать итте. Күрәсең, анда яшәү шартлары ха­лыкның үзәгенә үткәндер.

Уфа районының Черкассы авылыннан шалтыраткан ханым эчәр суның начар сыйфатлы булуын әйтте.

– Мөрәҗәгать язма рә­вештә дә килгәнлектән, мәсь­әләне өйрәнергә тырыштым, – дип җавап бирде Елена Родина. – Минем кул астында булган мәгълүмат буенча, авылдагы сусаклагычка 40 ел. 2004 елда бурычлар 800 мең сумнан артканга, су белән тәэмин итү килешүе өзелгән. 2004 елда авылда скважина казылып, искергән суүт­кәр­гечләр яңага алыштырылган. Шул ук вакытта, халыкка бирелүче суның сыйфаты санитар нормаларга туры килми. Уфа районы хакимияте башлыгы белән сөйләштем. Хакимият бу хакта хәбәрдар һәм үз өстеннән җавап­лылыкны төшерми. Хәл итү юллары төрлечә. Икътисади яктан акланганы – Черкассы авылы халкын “Уфаводоканал” чел­тәрләре аша су белән тәэмин итү. Бу юнәлештә эш башланды.

Башка депутатлар да күпсанлы сорауларга җавап бирде һәм мөрәҗәгать итүче­ләргә үзләренең кесә телефоннарына кадәр әйтеп яздырды. Моннан чыгып, “туры элемтә”нең власть белән халыкны тоташтыручы ышаныч­лы күпер икәнлеге, Башкортстан халкын борчыган көнүзәк мәсьәләләрне хәл итүгә зур өлеш кертүе ачык күренә.