+24 °С
Болытлы
Гәзиткә язылуVKOKTelegram
Барлык яңалыклар
Җәмгыять
22 сентябрь 2016, 02:00

Баш белән эшләү кирәк!

“Акыллы икътисад”ны үстерү республикада халык хуҗалыгының барлык өлкәләрендә дә мөһим өстенлек буларак билгеләнә.Мәгълүм булуынча, сентябрь башында Башкортстан юлдаш телеви­дение­сендә “Власть җавап бирә” дигән яңа тапшыру старт алды. Тәүге тапшырулар­да күпчелек социаль өлкәгә кагылышлы мәсьәләләр үзәккә чыгарылса һәм гражданнар сорауларына әлеге тармак өчен җаваплы министрлык һәм ведомстволар җитәкчеләре җавап бирсә, соңгылары икътисади үсеш мәсьәләлә­ренә багышланды. Аерым алганда, 7 сентябрьдә республиканың табигатьтән файдалану һәм экология министры Илдар Һадыев, 16 сентябрьдә исә Премьер-министр урынбасары Дмитрий Шаронов тапшыру кунагы булды. Түбәндә аларның чыгышларыннан безнең карашка иң көнүзәк һәм әһәмиятле өлешләрне гәзит укучылар игътибарына да тәкъдим итәбез.

Мәсәлән, Илдар Һадыев быел табигать шартларының экология өчен дә, авыл хуҗалыгы өчен дә ярыйсы ук уңай булуын сызык өстенә алды. Атап әйткәндә, соңгы 8-9 елда беренче тапкыр елга-күлләр язын җитәрлек күләмдә су алган. Шул рәвешле елгаларның саегу­ының иң югары ноктасы үтелгән.

Җәйге айларның кояшлы һәм эссе торуы, эчке туризмны үстерү юнәле­шендә республикада күрелүче колачлы чаралар быел туристлар агымын да сизелерлек арттырган. Шул ук вакытта, Илдар Рим улы белдерүенчә, сезонга 150 мең кеше кабул итү генә чик булырга тиеш түгел. Башкортстанның табигать паркы күпкә зуррак туристлар агымын кабул итәргә сәләтле һәм бу юнәлештә эшне киңко­лачлы дәвам итү көн таләбе булып тора. Икенче мәсьәлә — туристлар төбәк табигатенә зыян салырга тиеш түгел. Кызганычка каршы, әлегә бу юнәлештә дә хәл итәсе мәсьәләләр юк түгел.

Үз чиратында, табигатькә зыян салып, законсыз нигездә табигать байлыклары чыгаручылар, алардан файдаланучылар, аны үз бизнесы иткән хо­­кук бозучыларга каршы Илдар Һа­дыев төрле ведомстволар белән бер­лектә җитди көрәш алып барылуын сы­зык өстенә алды. Һәм, аның билге­ләвенчә, алдагы чорда көрәш алымна­ры тагы җитдирәк, хокук бозулар өчен җаваплылык исә катгыйрак булачак.

Янә бер яңалык, бүген федераль законнарга ярашлы, республикада да калдыкларны эшкәртүне бизнес өлкә­сенә тапшыру юнәлешендә эш бара. Бу җәһәттән ел эчендә төбәк операторлары сайлап алыначак. Үз чиратында, яңа системага күчү калдыкларны эшкәртүдә югарырак нәтиҗәлелек һәм республика­ның чүп-чардан арынуы белән билге­ләнергә тиеш.

Илдар Һадыев ышандыруынча, республика халкына эчәр суга кытлык кичермәбезме дип, борчылырга да урын юк.

— Елга-күлләрдә су күләме тотрыклы кала. Моннан тыш, җир асты чыганаклары да җитәрлек. Шуңа су запасы азрак булган Благовар, Чакмагыш, Авыргазы, Стәрлетамак, Чишмә районнарында да суга кытлык булмаячак, — диде ул.

Сунарга һәм балык тотуга рөхсәт темасы да тамашачылар игътибарыннан читтә калмады. Бу җәһәттән Илдар Һадыев сәнәгать максатларында булмаган балык тоту, су нормативларына ярашлы, түләүсез булуын билгеләде.

— Бездә су объектларына ирекле үтеп керү һәм ирекле балык тоту хокукы бар. Сунарчылыкка килгәндә, анда 650 сум күләмендә җыемнар каралган. Җәнлекләрне ауларга рөхсәт алу өчен, мәсәлән, аюга, 3 мең сум түләргә кирәк, — диде министр.

Төлке һәм бүреләрне аулау мәсьә­ләсе дә министрлыкның җитди конт­роленә алынган.

— Былтыр 300ләп төлке, 13 бүре ауланды. Бу аларның санын көйләү максатында башкарыла. Безгә гражданнардан, муниципалитетлардан төлке-бүреләрнең йорт хайваннарына һөҗүм итүе турында хәбәрләр килә. Бу очракта инде әлеге эшкә, аучылардан тыш, егерлар составын да җәлеп итәбез. Гомумән, әлеге мәсьәләдә ветеринария хезмәтләре белән дә, муниципалитетлар белән дә тыгыз бәйлә­нештә эшлибез, — диде Илдар Һадыев.
Хөкүмәт Премьер-министры урынбасары Дмитрий Шаронов исә “Власть җавап бирә” тапшыруында нигездә сәнәгатьтә импортны алыштыру, геопаркны үстерү, кече бизнес һәм электрон белем бирү мәсьәләләренә кагылды.

Тапшыруда билгеләнүенчә, ел башыннан республика казнасына 74 миллиард сумлык салым һәм салым булмаган керемнәр алынган. Бу узган елның шул чорына карата 2,6 процентка күбрәк. Биредә, әлбәттә, иң зур өлешне, тәү чиратта, “Башнефть”, “Уфаоргсинтез”, “УМПО” кебек җитештерү гигантлары керткән. Үз чиратында, икътисади яктан дөньякүләм катлаулы хәл-шартларда да республика предприя­тиеләренең шушы рәвешле нәтиҗәле эшләвен Дмитрий Шаронов аларга булышлык итү юнә­лешендә дәүләт дәрә­җәсендә күрелүче чаралар, компания­ләр мәнфәгатьләрен яклап Башкортстан Башлыгы Рөстәм Хәмитов җитәк­челегендә олы бер команда шөгыль­ләнүе белән бәйләде. Премьер-министр урынбасары белдерүенчә, республикада җитештерү тармагының арытаба үсешенә, Башкортстан пред­приятие­ләренең дөнья базарына чыгуына ноябрьдә үтәчәк ШОС һәм БРИКС ил­ләренең икенче кече бизнес форумы да булышлык итәргә тиеш.

Кайсы инвесторга өстенлек бирәсез — чит илнекенәме, үзебезнекенәме дигән сорауга, Дмитрий Шаронов, тәү чиратта, сыйфатка дип җавап бирде. Ә менә чын-чыннан сыйфатлы проектларны тормышка ашыруга булышлык итү, моның өчен уңай шартлар тудыру республикада мөһим өстенлек итеп билгеләнгән.

Тагын бер мөһим өстенлек — республикадан акыл ияләренең агымын туктату.

— Безнең максат – акыл ияләренең китүен туктату гына түгел, республикада элек киткәннәре дә кире кайтырлык һәм үз белемнәрен тиешле дәрәҗәдә эшкә кушарлык шартлар тудыру. Республикада дәүләт дәрәҗәсендә алып барылучы эш, булдырылган грантлар барысы да шушы максатка юнәлтелгән, — диде Дмитрий Шаронов.
Премьер-министр урынбасары “электрон Хөкүмәт” төшенчәсенә, аның ничек эшләвенә дә тулы ачыклык кертте.

— Элек граждан кайсыдыр ведомстводан ниндидер хезмәт алу өчен анда документларын тапшырырга тиеш иде. Моның өчен әлеге ведомство аңа бу хезмәтне алу өчен кирәк булган белешмәләр, башка документлар исемлеген бирә һәм аларны граждан тиешле вакытка җыеп китерергә тиеш иде. Шул рәвешле гражданнарга бер хезмәт алу өчен әллә күпме ведомство бусагасын таптарга туры килде. Хәзер исә граждан күпфункцияле үзәккә килеп, андагы “бердәм тәрәзә”гә мөрә­җәгать итә һәм белешмәгә заказ бирә. Әлеге белешмәне бирү өчен башка ведомстволардан кирәк булган мәгълүмат тәгаен бер урында туплана. Ахыр чиктә граждан үзенә кирәкле документны, белешмәне Күпфункцияле үзәктән килеп ала, — дип аңлатма бирде Дмитрий Шаронов.

“20 елдан Башкортстанны ничек итеп күрергә телисез?” — дигән сорауга да Премьер-министр урынбасарының җавабы кыска һәм анык булды.

— Чимал республикасы итеп түгел, ә инженер, инжиниринг, машиналар эшләү тармагы ныклы үсеш алган, ке­ше­ләр күбрәк баш, акыл белән эшләгән республика итеп. Без нәкъ шушы максатта эшлибез дә! — диде Дмитрий Шаронов.
Читайте нас: