Барлык яңалыклар
Җәмгыять
4 октябрь 2016, 02:00

Утта янган, суда баткан...

Милекне тергезергә аны страховкалау гына ярдәм итәчәк.Ел саен янгыннар һәм башка табигать казалары нәтиҗәсендә бик күп кеше тораксыз кала. Быел гынa да республикада 2911 янгын чыгып, аларда 191 кеше һәлак булган, 183е имгәнгән. Матди зыян 200 миллион сум тәшкил итә. Табигать казалары арасында халыкка зур зыян китерүче күренешләрдән су басуны, давыл чыгуны да атарга мөмкин. Шушылар нәтиҗәсендә йорт-каралтысыз калучылар да байтак. Көннәрдән бер көнне гомере буе җыйган мөлкәтеннән язган кешенең хәле аңлашыладыр. Шундый чакларда аларга кем ярдәмгә килә? Туганнары, күрше-тирәләре, миһербанлы кешеләр булдыра алганча ярдәм итә анысы. Дәүләтнең ярдәме исә зур түгел — җан башына унар мең сум. Болар күпмегә һәм нәрсәгә генә җитә соң?

Менә шундый очраклар азрак, ягъни ярдәм тоемлырак булсын өчен милекне ирекле страховкалау кирәк, җәмәгать. Ләкин күпләр моны эшләми, ә бәла ишек каккач, соң була. Күп илләрдә торакны ирекле страховкалау гомум нормага әверелгән. Мәсәлән, Аме­рикада аның — 90, Европада 95 проценты страховкалана. Русиядә исә 20 проценттан кимрәк йорт турында гына шушындый хәс­тәрлек күрелгән. Ни өчен? Республиканың Гадәттән тыш хәлләр буенча дәүләт комитеты рәисе Фәрит Гомәров халыкның аңсыз­лык күрсәтүенең сәбәпләрен атады.

— Алар икәү. Беренчесе — янгын яисә табигать афәте нәтиҗәсендә күрелгән каза өчен дәүләт болай да түләргә тиеш, дип исәпләү. Икенчесе — бәла мине урап үтәчәк, йортым беркайчан да янмаячак та, батмаячак та, дип инану, — диде ул.

Янгыннарның, су басуларның, давылларның елдан-ел ешрак булуын исәпкә алып, әлеге комитет “юл картасы” булдырган, ул торакны страховкаларга кирәклеген аңлату эшләрен оештыруны күздә тота. Акция республика халкын торакларын шул рәвешле сакларга этәрергә тиеш. Мисал өчен, бер компаниядә стра­хов­ка­лауның 2500 сумлык еллык пакетын сатып алырга мөмкин. Бу — аның иң түбән бәясе.

— Страховка акчасы 600 мең сум булачак. Теләгән кеше пакетны 7500 сумга сатып алырга мөмкин, бу очракта ул 2 миллион сум страховка акчасы алачак. Бер елдан соң бу пакетны озайтырга мөмкин, — диде оешма вәкиле Юлия Кузьмина.

Исегездә булса, СССР вакытында торакны стра­ховкалау мәҗбүри иде. Йорты янса да, батса да, кеше яңасын күтәреп куярлык акча алды. Шәхси йортларны мотлак страховкалау 1998 елда бетерелде. Гражданнар кодексына кертелгән үзгәреш­ләр мәҗбүри страховкалау системасына чик куйды.

Ләкин безнең илдә су басулар, урман янгыннары еш булып тора. Шул чакта ил җитәкчелеге торакны мотлак страховкалау ту­рында исенә төшерә һәм моның өчен законнарны үзгәртү кирәклегенә басым ясый. Дәүләт думасына торак биналарны мәҗбүри страховкалау турында проектлар да кертелде. Ләкин әлегә бернинди үзгәреш юк. Югыйсә, безнең илдә гражданнарның үз ирке белән милкен страховкалавы икеле, закон нигезендә мәҗбүр итсәң генә инде.
Читайте нас в