Быелгы бәйрәм — олы юбилейга репитиция!

Аның каравы, бәйрәм ал­ды көннәре республика һәм башкала тормышында чын-чыннан гомум Башкортстан халкы өчен әһәмиятле яңа объектларны ачу һәм эшкә кушу тантаналары парады белән билге­лән­де. Аерым алганда, 7 октябрь­дә Уфа­ның Затон бистәсенә илтүче юлда Агыйдел елгасы аша яңа күпер ачылды. Тантанада Русиянең транспорт министры Максим Соколов һәм республика Башлыгы Рөстәм Хәмитов катнаштылар.

— Без бу күперне 2018 елда гына файдалануга тапшырырга ниятли идек. Ил Хөкүмәтенең агымдагы ел­ның 18 июлендәге “Платон” системасы акчалары исәбенә әлеге күпер төзелешенә өс­тәмә рәвештә 1,5 миллиард сум бүлү турында карары эшләрне шушы рәвешле ике елга тизләтү мөмкинлеге бирде. Башкортстан тормышында гаять мөһим әһәмияткә ия әлеге объект өчен федераль Хөкү­мәткә дә, төзүче­ләргә дә, гому­мән, күпер төзелешенә катнашлыгы булган һәркемгә чиксез рәхмәт белдерәм. Хәзер ул республика башкаласына килеп-китүне күпкә уңайлаш­тырып, гомум төбәк икътисады үсе­шенә хезмәт итәчәк, — диде тантанада Рөстәм Хәмитов.

Гомумән, Русиянең транспорт министры Максим Соколов белдерүенчә, күптән түгел эшкә кушылган “Платон” системасы илнең юл челтә­рен үстерүгә мөһим өлеш кертә. Былтыр Русия­нең Юл фонды аның исә­бенә 12 миллиард сумга тулыланган. Бу исә илнең 19 төбәгендә 31 күпер төзү эшләрен башлау яки тәмам­лау мөмкинлеге биргән.

Янә дә шул: Максим Юрьевич билгеләвенчә, республикадагы тагын ике юл төзе­леше проекты “Платон” системасы буенча җыелучы акчаларга дәгъва итә ала.

— Болар — яңа күперне дә үз эченә алып, башкалада тоннель төзелешен тәмамлау һәм Стәрлетамак — Магнитогорск арасында яңа автомобиль юлы салу. Әлеге эшләр М-5 һәм М-7 трассаларындагы автомобильләр агымын берни­кадәр киметү мөмкинлеге бирүче мөһим юл челтәренә әвереләчәк. Шуңа да без бу башлангыч­ларны һәрьяклы хуплыйбыз, — диде атап әйткән­дә Максим Соколов.

Башкаладагы Затон бис­тә­сенә илтүче юлда Агыйдел елгасы аша төзелгән күпергә килгәндә исә, аның озынлыгы — 836, киңлеге 14 метр тәшкил итә. Аның буйлап өч рәт машина үтә ала. Күперне төзүгә барлыгы 5 миллиард сумга якын акча тотынылган. Аның каравы М-7 юлыннан Уфага килүчеләр хәзер тыгыннарда иза чикмәячәк. Башкортстан Башлыгы бил­ге­ләвенчә, шулай ук, иске күперне дә нигез­дән төзек­ләндерү мәсьәләсе карала. Аны проектлау быел ук башланырга мөмкин. Ул очракта инде әлеге юнәлештә хәрәкәт итү тагын да җиңел­ләшәчәк һәм уңайлырак булачак!

Шушы ук көнне башкалада яшәүчеләр тормышында янә бер мөһим вакыйга булды — Интернациональ урамы озынайды. Бу исә Уфа­ның төньяк районнары урамнарын транспорт тыгыннарыннан арындырып, шә­һәрнең әлеге географик үзә­ген Уфа — Шакша трас­сасы белән тоташтыру, шул рә­веш­­ле Чиләбе юлына уңай­лы кереп-чыгып йөрү мөмкин­леге бирә.

Әйтергә кирәк, әлеге проектны тормышка ашыру максатында гаять зур эш башкарырга туры килгән. Аерым алганда 630 тимер гараж алынган, канализация эшлән­гән, инженерлык челтәрләре үзгәр­теп корылган. Барлык комму­никацияләр дә юл чи­тенә чыгарылган, ягъни аларны төзек­ләндерү эшләре юлдагы хәрә­кәткә комачаулык итмәя­чәк. Болардан тыш, әлеге терри­торияләрдә яшәү­челәр өчен ихаталарга кереп-чыгып йөрү өчен дә юл төзелгән. Төп трассада һәм әлеге юлда яктырткыч лампалар урнаштырылган. Килә­чәктә биредә шулай ук велосипед юлы һәм газоннар да булачак.

— Интернациональ урамындагы әлеге участок төзеле­шенә 240 миллион сум салынды. Иң мөһиме анда хәзер тыгыннарсыз, уңайлы хәрәкәт итү мөмкинлеге барлыкка килде. Киләчәктә исә без аны шушы рәвештә Агый­­дел елгасына кадәр җиткерү бурычы куябыз. Шул урында елга аша яңа күпер төзеләчәк һәм башкаланы М-7 трассасы белән тоташтырачак. Кыскасы, алда зур эшләр көтә, — диде башкала халкын яңа объект ачылу уңаеннан котлап Башкортстан Башлыгы.

Югарыда телгә алынган төзелешләр башкаланың һәм республиканың автомобиль юлы челтәрен үстерүдә һәм тагын да уңайлырак итүдә мө­һим объектлар булса, төбәктә һава юлы транспорты да алгарышлы адымнар белән үсешә. “Уфа” халыкара аэропортында булганда моны илнең транспорт министры Максим Соколов та сызык өстенә алды.

Федераль министрны һәм төбәк Башлыгын аэровокзал комплексын реконструк­ция­ләү барышы белән таныштырып, “Уфа” халыкара аэ­ропортының генеральный директоры Александр Андреев узган елда яңа эчке авиа­линияләр терминалын проектлау башлануы турында хәбәр итте. Ул ике этапта тормышка ашырылачак. Тәү­гесендә — очып төшү, икен­чесендә очып китү зоналары реконструк­ция­ләнәчәк. Яңа терминалны 2019 елда файдалануга тапшыру күздә тотыла. Ул аэро­портның пассажирлар кабул итү мөмкин­леген сәгатенә әлеге 600дән 1,2 мең кешегә җиткерү һәм хез­мәтләндерү сыйфатын бер­мәбер күтәрү мөмкинлеге бирәчәк. Эчке авиалинияләр терминалын реконструк­цияләү 2 миллиард сумга төшәчәк, дип көте­лә.

Реконструкция эшләре тә­мам­ланганнан соң эчке һәм халыкара терминаллар сәга­тенә 2 мең пассажирны кабул итү мөмкинлеген бирүче бердәм архитектура комплексына берләштереләчәк.

Әлеге вакытта аэродром комплексын реконструк­ция­ләү­нең икенче этабы тәмам­лан­ган. Ул очу-төшү полосасын реконструк­ция­ләүне, перронны, радиомаяк урнашкан участокны ныгытуны, ут-сигнал корылмаларын мо­дер­ни­за­цияләүне үз эченә алган.

Рөстәм Хәмитов һәм Максим Соколов аэропортта шу­шы көннәрдә генә реконст­рукция­дән соң файдалануга тапшырылган очу-төшү полосасын карады. Аңа армобетон белән ныгытылган яңа өслек түшәл­гән, өстәмә элементлар белән яңа яктырту корылмалары урнаштырыл­ган. Бу исә хәзер аэропортка “Воеing-747”, “Воеing-777”, “Руслан”, “Airвus-330” төрен­дәге барлык очкычларны да кабул итү мөм­кинлеге бирә.

Бәйрәм алды көннәре рес­публиканың сәнәгать тармагында да мөһим объект белән билгеләнде. 7 октябрь­дә Уфа­ның Дим районында “Уфимкабель” заводының яңа производство комплексы файдалануга тапшырылды. Тан­тана­да билгеләнүенчә, яңа җитеш­терү комплексын файдалануга тапшыру пред­прия­тиегә кабель производствосындагы яңалыклар исәбенә продукция төрләрен һәм күләмен арттыру, яңа югары квалификацияле эш урыннары булдыру мөм­кинлеге бирәчәк.

Йомгаклап нәрсә әйтергә була? Күренүенчә, соңгы елларда республикада һәртөр­ле шау-шоуга корылган күңел ачу чараларыннан акрынлап чит­ләшеп, истәлекле даталарны гомум төбәк үсешенә һәм халык файдасына хезмәт итүче яңа объектларны, җи­тештерү куәтләрен эшкә кушу белән билгеләүгә юнәлеш алынды. Һәм югарыда телгә алынган, башкалада булып үткән мөһим хәл-вакыйгалар да, республика районнарында бу көннәрдә файдалануга тапшырылган күпсанлы социаль объектлар да моның ачык мисалы булып тора. Үз чиратында боларны алда торган зур юбилей — Баш­кортстанның 100 еллыгына әзерлек чаралары буларак та кабул итәргә кирәк. Мәгъ-лүм булуынча, юбилейга әзерлек кысаларында республика Башлыгы Рөстәм Хәмитов башлангычы белән “Башкорт­станның 100 еллыгына — 100 объект” проекты җәелдерел­де. Аның барышында 2019 елга кадәр республиканың һәр шәһәр-районында төбәк үсе­шендә мөһим әһәмияткә ия 100 объектны сафка бастыру бурычы куелды. Моннан чыгып әйтә­се килгән фикер, димәк, алдагы чорда мондый әһә­мият­ле объектлар, төзелешләр тагын да күбрәк булачак. Дө­рес, моның өчен һәркай­сыбызның җиңнәре сызганулы булырга тиеш. Һәрхәлдә, республика җитәкчелегенеке кебек!