+14 °С
Болытлы
Гәзиткә язылуVKOKTelegram
Барлык яңалыклар
Җәмгыять
10 гыйнвар 2017, 02:00

Быел да кар “көтелмәгәндә” яуды...

Башкаланың коммуналь хезмәтләре көчәйтелгән режимда эшли.Яңа ел каникуллары башкаланың коммуналь хуҗалыгы хезмәткәрләре өчен аеруча көчергәнешле булды. Синоптиклар хәбәр итүенә караганда, елның беренче 8 көнендә 4 айлык кар яуган. Шул сәбәпле, Уфада торак-коммуналь хезмәтләр көчәйтелгән эш режимына күчерелде, алар әле дә түлек әйләнәсенә эшли. Башкала урам-ихаталарын кардан тазартырга 400дән артык техника чыгарылган. Сәнәгать, юл һәм төзелеш комплексы предприятиеләре 100дән артык үзбушаткыч автомобиль, грейдер һәм трактор бүлгән.

Соңгы тәүлекләрдә шәһәр урамнарыннан 27 мең кубометрдан (кыш башыннан 1 миллион 10 мең кубометрдан) артык кар чыгарылган. Былтыр февраль башына гына бу кадәр кар чыгарылган иде.

Беренче чиратта җәмә­гать транспорты хәрәкәте магистральләре тазартыла. Шулай ук, йорт яны территорияләре һәм тротуарлар да кардан чистартыла. Коммуналь хезмәтләр бу эшкә өстәмә техника җәлеп итә. Йорт яны территорияләрен кардан тазартуда 150 техника эшли.

Кайбер уфалылар торак-коммуналь хуҗалык хезмәт­кәрләренә ярдәмгә чыкты. Бу эштә аеруча Дим районында яшәүчеләр активлык күрсәтте, алар йорт яны территорияләрен кардан тазарту буенча “шимбә”дә катнашты. Нәтиҗәдә, күп кенә йорт яны, 13нче балалар бакчасы территорияләре тәртипкә китерелде.

Башкала районнарында йорт яны территорияләрен комплекслы чистарту гра­фигы эшләнде. Уфалылар кар чистартылмаган урыннар турында Уфа шәһәре торак хуҗалыгы ида­рәсенең бердәм дис­петчерлык хезмәтенә (347) 235-50-33 телефоны буенча хәбәр итә ала.

Башкортстан гидро­метеорология һәм тирә-як мохитне мони­торинглау идарәсе мәгъ­лүматларына караганда, алдагы берничә көндә республикада суытачак, кар яву, буран чыгу, юлларда бозлавык булуы көтелә.

Юллардагы кар астында бозлавык. Шуңа күрә хәвефсезлеккә зур игътибар бирү мөһим. Юл хәрәкәте хәвефсезлеге дәүләт инспекциясе хезмәткәрләре мондый көннәрдә водитель­ләргә тизлекне киметергә, кискен хәрәкәтләр ясамаска, бозлавык вакытта ерак юлларга чыгудан тыелып торырга киңәш итә.

Кышкы юллардагы хәл аеруча куркыныч тудыра: бозлавыклы көннәрдә машиналарның тормоз юлы озыная, ә бураннар һәм кар яву аркасында күз күреме начарая. Русия Гадәттән тыш хәлләр министр­лыгының республика буенча идарәсе водительләрне юлда игътибарлы булырга, хәвефсез тизлек режимын үтәргә чакыра.

Шул ук вакытта

Яллардан соң тәүге эш көнендә, ягъни кичә, иртән Уфада тугыз баллы тыгыннар барлыкка килде. Машиналар күп йөргән урамнарда иртән ава­рияләр күп иде. Шәһәрнең кайбер урамнарында транспортның тизлеге сәгатенә
3-5 километрдан артмады.


Юл хәрәкәте кагыйдәләре буенча, сезонара һәм “пеләш” тәгәрмәчләр белән кышкы чорда йөрү, бер үк вакытта “кышкы” һәм “җәйге”, төрле сырлы тәгәрмәчләр урнаштыру катгый тыела. Шина протекторларының тирәнлеге 4 миллиметрдан да азрак булса, хәвефсезлек таләпләре үтәлми, дигән сүз. Русиянең Административ хокук бозулар турында кодексы буенча, бу таләпләр үтәлмәгән очракта 500 сум штраф каралган.

Кышның үзенә генә хас күңелле мизгелләре дә күп. Бигрәк тә балалар кышкы уеннарны ярата. Алар чана шуа, чаңгыда йөри, хоккей уйный. Балаларга урамда яки юлга якын урыннарда хәвефсезлек кагыйдәләре турында аңлатыгыз.

Әгәр сез юл-транспорт һәлакәте шаһиты булсагыз, йорт-бина түбәсеннән кар һәм боз төшү ихтималлыгын күрсәгез, Уфаның коткару хезмәтенә хәбәр итегез, мәгълүмати-диспетчерлык хезмәте “112” номеры буенча шалтыратулар кабул итә.

“112” – кичектергесез хезмәтләрне чакыру буенча бердәм телефон номеры. Аның буенча полиция, янгын сүндерүчеләрне, коткаручыларны, “ашыгыч ярдәм”, башка хезмәтләрне чакырырга, консультация һәм психологик ярдәм алырга мөмкин. “112” номерына стационар һәм кесә телефоныннан (сим-картасыз, исәбеңдә акчаң булмаса да, аппаратның клавиатурасы блокировкага куелган очракта да) шалтыратырга мөмкин.
Читайте нас: