Асыл гөлләр – гүзәл затларга

Туым буенча Башкортстанда күрсәткечләр, уртача Русиядәге белән чагыштырганда, тотрыклы, күпбалалы гаиләләр саны буенча да республика алдынгы урыннарда. Алар торак, транспорт өчен һәм башка түләүләргә ташламалардан файдалана. Сигез һәм аннан да күбрәк бала тәрбияләүче гаиләләргә микроавтобус тапшырылу – Башкортстан үрнәге. 1998 елдан башлап бездә биш һәм аннан да күбрәк бала тудырган һәм аларга яхшы тәрбия бирүче гүзәл затларга “Ана даны” медале тапшырыла. Бүген ул 7 меңнән артык ананың күкрәген бизи. Күптән түгел республика Башлыгы Рөстәм Хәмитов гаиләдә беренче бала туган очракта торак шартларын яхшырту өчен 300 мең сум күләмендә социаль ярдәм күрсәтү башлангычы белән чыкты.

Ана йөрәгендә бер генә теләк – балалар бәхете. ә бу төшенчәгә аларның матди хәле дә, рухи үсеше, ил иминлеге дә сыйган. Уфа шәһәрендә яшәүче Севара һәм Марат Хәсәновлар гаиләсе өчен дә ул барлык дөнья алтыннарыннан да кыйммәт. Монда ике кыз бала – Камилла һәм Эмилия үсә. Әтиләре нефть чыгару өлкәсендә хезмәт сала, әниләре – матурлык индустриясендә. Ул күбрәк кызлар янында. Ике үсмер күп игътибар сорый, Хәсәновлар аларның барлык яктан да килгән, камил шәхесләр булып үсүе өчен бөтен көчен сала. Бу көннәрдә Марат Рамил улы иң яраткан кызларын бер түгел, өч бүләк белән сөендерде. Аның өчен иң кадерле күзләрдә бәхет очкыннары кабыну – иң зур сөенеч.