+17 °С
Болытлы
Гәзиткә язылуVKOKTelegram
Барлык яңалыклар
Җәмгыять
26 гыйнвар 2021, 12:39

Гүзәлләр тудырган гүзәллек

“Ак калфак” Башкортстан төбәк иҗтимагый татар хатын-кызлары берләшмәсе оештырган виртуаль бәйге нәкъ шулай дип аталды. Ул гүзәл затларыбыз арасында кул эшләре осталарын ачыклау һәм башка күркәм йолаларны тергезү максатын куйды. Татарның чигүле сөлгесе, бизәкләп сугылган паласы, энҗе-сәйләннәр тезеп укаланган калфак-түбәтәйләре күз явын алырлык иде!

“Ак калфак” Башкортстан төбәк иҗтимагый татар хатын-кызлары берләшмәсе оештырган виртуаль бәйге нәкъ шулай дип аталды. Ул гүзәл затларыбыз арасында кул эшләре осталарын ачыклау һәм башка күркәм йолаларны тергезү максатын куйды. Татарның чигүле сөлгесе, бизәкләп сугылган паласы, энҗе-сәйләннәр тезеп укаланган калфак-түбәтәйләре күз явын алырлык иде!

Бәйге ике турда үтте. Беренчесе район үзәкләрендә, авылларда, шәһәрләрдә оештырылды. Анда җиңеп чыгучылар икенче турда көч сынашты.
Гүзәл затларыбыз арасында кул эшләрен онытмаучылар, алай гына да түгел, аны искитмәле итеп башкаручылар бихисап икән! Традицион чигелгән сөлге, кулъяулык, алъяпкыч, мендәр тышлыклары, ашъяулыклардан тыш, бәйгедә катнашучылар хөкем­дарлар игътибарына төрле алым һәм материаллар кулланып төшерел­гән картиналар, бәйләнгән киемнәр һәм башка әйберләр тәкъдим итте.
Бәйгедә катнашучылар бихисап булды. Аларның барысына да республикабызның “Ак калфак” татар хатын-кызлары берләшмәсе җитәк­чесе, “Гүзәлләр тудырган гүзәллек” бәйгесенең оештыру комитеты рәисе Люция Вафина ихлас рәхмәтен җиткерде.
Бәйге җиңүчеләре арасында Дүрт­өйле шәһәрендә гомер ки­черүче Флидә Янгирова да бар иде. Шушы көннәрдә аның үзе белән танышып, иҗат җимешләрен күрү насыйп булды.
Флидә апаның чигүле сөлге­ләре, мендәр тышлыклары, картиналары беркемне дә битараф калдырмас: алар­ның һәркайсы гүзәл бер сәнгать әсәре дәрәҗәсенә җиткерелеп башкарылган. Аларда халкыбызның гасырлардан-гасырларга күчеп килүче бизәкләре, чигү оста­сының күңел дәрьясыннан тү­гелгән моң-кичерешләр белән баетылып, соклангыч бер әсәргә әверелгән. Диварда эленеп торган картинада, мисал өчен, җәйге матур көн тас­вирлана: кояш нурлары барлык хәятне нурга күмгән, яшел шәлләрен бөркәнгән агачлар янында кечкенә бер матур йорт. Картинага карагач, күңелне ниндидер тынычлык били, анда сурәтләнгән сихри аклан сине үз эченә “тартып ала”, бер мизгелгә булса да тормыш ыгы-зыгысыннан аерылып торасың.
Чакмагыш районының Рапат авылы кызы Флидә кул эшләре белән яшьтән шөгыль­ләнә. Чигү, тегү, бәйләүдән тыш, ул хикәяләр, шигырьләр язу белән дә мавыга. Үзнәшер ысулы белән чыккан китап­лары да бар.
– Без гаиләдә алты бала үстек, – дип сөйләде ул. – Әтиебез – сугыш инвалиды, әниебез гади колхозчы иде. Мин гомер буе сәүдә өлкә­сендә эшләсәм дә, күңелем белән һәрчак сәнгатькә, иҗат­ка тартылдым. Үзешчән сәнгать түгәрәкләрендә бик теләп шөгыль­ләндем.
Язмышым шулай булды инде: яшьли ялгыз калып, өч кызымны берүзем тәрбияләп үстерергә туры килде. Тик сынаулар моның белән генә бетмәде, кызым Эльвира вакытсыз бакыйлыкка күчкәч, 10 яшьлек оныгымны үз тәрбиямә алып үстердем, белем алырга ярдәм иттем. Оныгым хәзер, югары уку йортын тәмамлап, республикабыз башкаласында тикшерүче булып хезмәт сала.
Балаларга, оныкларга күлмәк, костюмнарны һәрчак үзем тегеп кидердем, әле дә барысына да йон оекбаш һәм бияләйләр бәйләп кенә торам.
Тормыш катлаулыкларына карамастан, дөнья матур! Кул эшләремдә дә мин аның иң чагу мизгелләрен тотып алырга, сурәт­ләргә омтылам. Ә шигырь­ләремә күңелемне биләгән уй-фикер­ләремне, йөрәгемә генә сыймаган хис-тойгыларымны салам.
75 яшен тутырган хезмәт ветераны Флидә Насыйбулла кызы бүген дә районның мәдәни тормышында актив катнаша. Дүртөй­ленең данлыклы “Әллүки” фольклор ансамблендә җырлый. Шигырь-хикәяләре дә яңа җыентыкка тупланып килә.

Миләүшә Латыйпова,
“Кызыл таң”ның үз хәбәрчесе.
Дүртөйле районы.
Фото: Миләүшә Латыйпова.
Читайте нас: