Чит илдә уку мөмкинлеге киңәя

БДПУның Шанхай хезмәт­тәшлек оешмасы университеты челтәре составына керүе 2013-14 елларда халыкара укыту программалары өлкәсен­дә иң мөһим вакыйга булып тора. Әлеге университет Казахстан, Кытай, Кыргызстан, Русия, Таҗикстан, Үзбәкстан кебек ШОС илләре һәм Һиндстан, Иран, Монголия, Пакистан кебек күзәтүче илләрнең югары уку йортлары кергән челтәр буларак эшләп килә. ШОС университеты кысаларында укыту оешма илләре-катнашучыларның мәдәни, фәнни һәм икътисади хезмәт­тәшлек өлкәсе буенча алып барыла. БДПУ “Педагогика” юнәлеше буенча укыту программасын тормышка ашыра. Әйтергә кирәк, әлеге югары уку йортының бу юнәлеш буенча магистр программасы ШОС университеты өчен нигез буларак бил­геләнде. Узган елда ШОС илләре әгъ­заларын­нан торган делегация дәрәҗә­сендә ул рәсми рәвештә теркәлде.
Бүген М. Акмулла исемен­дәге педагогия университеты Казахстандагы — 10, Кыргызстандагы һәм Таҗик­стандагы — 5әр, Кытайдагы 2 югары уку йорты белән партнерлык килешүе төзегән. Әлеге вакытта БДПУның хезмәттәшлек турындагы килешүләре кысаларында “Педагогика” юнәлеше буенча Л. Гумилев исемендәге Евразия милли, С. Торайгыров исемендәге Павлодар дәүләт, Абылай Хана исемендәге КазУМОиМЯ, К. Карасаев исемендәге Бишкәк гуманитар, Н. Исанов исемендә­ге Төзе­леш, транспорт һәм архитектура дәүләт, С. Айни исемен­дәге Таҗикстан дәүләт педагогия, Кытай Төньяк-көнчыгыш педагогия университетлары белән бергәләп магистрантлар әзерләү турында да сөйлә­шенгән.
ШОС университеты белән бәйле хезмәтләрдән тыш, БДПУ башка халыкара укыту программаларын тормышка ашыру буенча да актив эш алып бара. Мәсәлән, преподаватель­ләрнең һәм студентларның академик мобильлеген, ЮНЕСКО кафедрасы кысасында мәдәни һәм белем бирү хезмәттәшлеген киңәйтү һәм башка юнәлешләр буенча.
Академик мобильлек программасы буенча узган елда университетның 32 студенты халыкара стажировкада катнашкан. Шуларның бишесе Кытай университетында тел буенча тәҗрибә туплаган. Узган елда БДПУ үзенең укыту программасына стажировка үтү өчен чит илдән 12 студент кабул иткән.
Чит илдә урыс телен укытуга юнәлтелгән “Русский мир” фонды проектын тормышка ашыруга БДПУ да үз өлешен кертте. Университетның 8 педагогы Казахстан, Кыргызстан, Таҗикстан, Кытай һәм Лаос Республи­касының югары уку йортларында урыс телендә лекцияләр укыды.
М. Акмулла исемендәге педагогия университетының халыкара мөнәсә­бәт­ләр бүлеге белгечләре белде­рүенчә, яңа уку елында ШОС һәм БРИКС илләреннән 12 студент квота буенча (Шанхай хезмәттәшлек оешмасы университеты кысасында федераль бюджеттан бүленгән акча исәбенә) укырга кабул ителәчәк. Болар — Таҗикстан педагогия, Бишкәк гуманитар, Евразия милли, Кытай Төньяк-Көнчыгыш педагогия университетларында белем алучы яшьләр. Шулай ук, безнең өч студент квота буенча ШОС илләренә укырга юнә­ләчәк.