“Алтын куллы” эшчеләр җитешми

Гомумән алганда, соңгы өч елда һөнәри белем бирү системасын модернизацияләү буенча чараларны гамәлгә ашыру өчен 558 миллион сум акча юнәлтелгән. Контроль-исәп палатасы утырышында бу сумманың ничек файдаланылуы турында аудитор Елена Петрова чыгыш ясады. Бюджет акчасын бүлүдә һәм файдалануда ачыкланган җитешсез­лекләргә карамастан, программа куелган максатларын, нигездә, үтәгән. Шул ук вакытта студентларны торак мәйдан, компьютер техникасы белән тәэмин итү, укыту корпусларында капиталь ремонт үткәрү буенча проблемалар бар. Бу күрсәткечләр буенча без Идел буе федераль округы төбәкләре арасында 14нче урынны билибез.

Шулай ук урта һөнәри бе­лемне үстерүдә аның про­изводство өлкәсе белән бәйләнешен тәэмин итү мөһим юнәлеш булып кала. Яңа производстволар барлыкка килү белән эш бирүчеләрнең таләп­ләре даими үзгәреп торуы уку йортларында укыту програм­масын үзгәртүне таләп итә.

Чарада мәгариф министры Гөлназ Шәфыйкова катнашты. Ул, тикшерү нәтиҗәсендә ачык­ланган җитешсез­лекләрнең күпчелеге бетерелде, дип белдерде.

— Республикада мәгариф өлкәсенә бюджетның 38 про­центы юнәлтелә. Акчаның күпчелек өлеше педагогларга хезмәт хакы, аз тәэмин ителгән гаиләдә тәрбияләнүче балаларга социаль түләүләр рә­вешендә бирелә. Шул ук вакытта акчаның 7-8 про­центы мәгариф системасын модерни­зацияләүгә юнәлтелә, — диде министр.

Контроль-исәп палатасы рәисе Салават Харасов, эшче һөнәрләрнең абруен күтәрергә, яшьләрне шунда җәлеп итәргә кирәк, дигән фикердә. Бүген бик күп предприятиеләр югары квалификацияле, ягъни, гади итеп кенә әйткәндә, “алтын куллы” эшчеләргә кытлык кичерә. Завод һәм фабрикалар белән хезмәттәшлекне киңәй­тергә кирәк. Әле, республикада һәм, гомумән, илдә Төркия белгечләре кимегән вакытта югары квалификацияләре эш­челәрне күбрәк әзерләү зарур. Хезмәт кешесе турында язарга, фильмнар төшерергә, җырлар иҗат итәргә кирәк. Һәм, әлбәттә, һөнәри белем бирү системасы яңартуны таләп итә, ахыр чиктә рес­публиканың үсеше шушыңа да бәйле, диелде утырышта.