Без көчле һәм үзебезгә ышанабыз

— Бүгенге Юллама без яшәгән вакытка да, шартларга да, алдыбызда торган бурычларга да туры киләчәк, әмма, барыннан элек, илебез язмы­шындагы хәлиткеч чорда ярдәм, бердәмлек, теләктәшлек күрсәткән өчен сезнең бары­гызга да рәхмәт белдерәсем килә. Быел без җитлеккән, бердәм милләт, чын суверен һәм көчле дәүләт кенә күтәрә алырлык сынаулар уздык. Русия үзенең ватандашларын, дөреслекне һәм гаделлекне намус белән якларлык сәләтен гамәлдә раслады, илебез моны сезнең белән бергә башкарып чыкты, — диде Владимир Путин.

Кырым

— Русия өчен Кырым зур әһәмияткә ия. Моңа кадәр һәм моннан соң да русиялеләр өчен ул шулай булып калачак. Нәкъ Кырымдагы борынгы Херсонеста (элекке Корсуньдә) кенәз Владимир христиан динен кабул иткән, — диде Владимир Путин. Пре­зидент сүзләренә караганда, урыс милләтенең һәм Русия дәүләтенең чишмә башы нәкъ шунда.

Украина

— Һәр халыкның үз үсеш юлына хокукы бар. Русия моңа һәрвакыт ихтирам белән карый. Бу Украинага да кагыла, — диде Владимир Владимирович. — Кеше хокуклары ту­рында сөйләп, Украинада законсыз рәвештә власть алмаштыруны яшерергә тырышу — икейөзлелек. Политиканлыкны онытып торып, рефор­малар үткәрү өчен Украинага ярдәм күрсәтергә кирәк, ләкин Көнбатыштагы коллегаларыбыз ярдәм итәргә ашыкмый. Соңгы чорда гына Русия Украина икътисадына 33,5 миллиард дол­лар күләмендә кредит бүлде.
Президент фикеренчә, санкцияләр аларны кабул итүчеләр өчен дә зарарлы.

Көч позициясендә сөйләшү мөмкин түгел

— Без никадәр күбрәк юл куябыз һәм акланабыз, оппонентларыбыз үзен шулкадәр агрессиврак тота... Югославияне таркату сценариен Русиягә карата да кулланырга ниятләгәннәр иде. Килеп чыкмады! Без моңа юл куймадык! — диде Президент Владимир Путин. — Санкцияләр — АКШ­ның һәм аларның союз­дашларының Русиягә карата нервлы реакциясе Украинадагы вакыйгаларга һәм Кырымга гына бәйле түгел. Әгәр алар булмаса, Русиянең үсеш мөмкинлекләрен тоткарлау, моңа йогынты ясау, ә бәлки үз мәнфәгатьләрендә файдалану өчен башка сәбәп уйлап чыгарырлар иде. Тоткарлау сәясәте кичә генә уйлап табылган әйбер түгел. Ул безнең илгә карата дистәләгән, бәлки, йөзләгән еллар үткәрелә. Кем дә кем Русия артык көчле, мөстә­кыйльгә әйләнде дип уйлаган һәр очракта, кичекмәстән, шушы кораллар эшкә җигелә.
Президент ассызыклавынча, халыкара мәйданда барлык катнашучыларның за­конлы мәнфәгатьләренә их­тирам белән карарга кирәк.
— Русия белән көч пози­ция­сендә сөйләшү мөмкин түгел, — дип белдерде Владимир Путин. — Без кыйммәтле кораллану ярышына керешергә җыен­мыйбыз, әмма, шул ук вакытта, яңа шартларда илебезнең оборона иминлеген ышанычлы рәвештә тәэмин итәчәкбез. Моңа бернинди шик юк. Бу эшләнәчәк. Русиянең мөмкин­лекләре дә, стандарт булмаган карарлары да бар. Берәү дә Русиягә карата хәрби өстен­леккә ирешә алмаячак. Безнең армия заман таләп­ләренә җавап бирә. Азатлыкны якларга көч тә, ихтыяр да, батырлык та җитәчәк. Русиянең чын йөзен күрсеннәр өчен дөньяның күптөрлелеген яклап чыгачакбыз, гуманитар һәм эшлекле, фәнни, мәдәни һәм мәгариф өлкәсендә элем­тәләрне актив тәкъдим итә­чәкбез. Беркайчан да изо­ляцияләнү юлыннан кит­мәячәкбез, без көчле һәм үз-үзебезгә ышанабыз.

Бизнес

— Ил җитәкчесе ассызыклавынча, бизнес өчен чикләү­ләрне гамәлдән чыгару, малта­барлар өстеннән өзлексез контроль алып бару принцибыннан баш тарту зарур. Президент кече бизнес өчен “күзәт­челек каникуллары”н гамәлгә кертүне тәкъдим итте.
— Әгәр предприятиенең ышанычлы абруе бар, соңгы өч елда җитди хилафлыклары юк икән, алдагы өч елда дәүләт һәм муниципаль контроль кысаларында планлы тикшерү­ләрне бөтенләй уздыр­маска кирәк. Әлбәттә, монда сүз кичектергесез очраклар турында бармый, — дип белдерде Владимир Путин.