-14 °С
Болытлы
Гәзиткә язылуVKOKTikTokINSTAGRAM
Барлык яңалыклар
Сәясәт
18 апрель 2015, 22:32

“Санкцияләрдән файдаланырга кирәк!”

Русия Президенты Владимир Путин ил халкы сорауларына җавап бирде.16 апрельдә ел саен үткәрелүче “Владимир Путин белән туры элемтә” тапшыруы “Беренче канал”, “Россия 1”, “Россия 24” телеканалларында, “Маяк”, “Вести FM” һәм “Радио России” радиостанцияләрендә туры эфирга чыкты. Дәүләт башлыгы Русия һәм якын чит илләрдә яшәүчеләрнең сорауларына җавап бирде.

“Туры элемтә”

Президентның ил граж­даннары белән теле- һәм радиоканаллар эфиры аша аралашуы беренче тапкыр 2001 елның 24 декабрендә оештырылган иде. Арытаба “туры элемтә”ләр ел саен узды, 2004 һәм 2012 еллар гына искәрмә булды. Владимир Владимирович 8 тапкыр — ил Пре­зиденты һәм 4есендә Хөкүмәт Рәисе сыйфатында 12 тапшыруда катнашты.
Быел 9 апрельдә сорауларны кабул итүнең бердәм үзәге эшли башлады. Президентка сорауларын Мәскәүдәге студиягә чакырылган кунаклар да, туры тоташтырулар оеш­тырылган шәһәрләрдә яшәү­челәр дә бирде.

Илнең социаль-икътисади хәле

Владимир Путин 2014 елдагы һәм шушы ел башындагы социаль-икътисади хәл белән таныштырып үтте. Президент ассызыклавынча, Русия былтыр тышкы чикләүләргә дучар булды һәм бу икътисад торышында чагылыш тапты. “Хәзер сум ныгый, фонд базарлары үсешә, без инфляция спи­раленең алга таба сүтелә баруына юл куймадык. Тулай төбәк продукты күләме — 0,6 процентка үсте, сәнәгать җитештерүе — 1,7 процентка артты. Нефть чыгару күләме 525 миллион тоннага җитте. Ашлык уңышы 105,3 миллион тонна тәшкил итте. Гомумән алганда, авыл хуҗалыгы тармагы яхшы нәтиҗә күрсәтте, быел беренче кварталда шулай ук үсеш күзәтелә. Төзүчеләр горурланырга хаклы: иң зур нәтиҗәгә ирешелде — 82 миллион квадрат метр торак файдалануга тапшырылды. Мартта инфляция темп­лары өч тапкыр кимеде. Инфляциягә бәйле рәвештә, халыкның кереме 1 процентка кимеп, хезмәт хакы 1,3 процентка артты”, — диде ул.

Санкцияләр

Владимир Путин фикерен­чә, Русия икътисадын тергезү өчен ике елга якын вакыт кирәк булачак. “Санк­цияләргә түзеп яшәргә түгел, ә алардан файдаланырга кирәк. Әмма эш санк­ция­ләрдә генә түгел, безгә ил эчендә икътисади про­цесслар белән идарә итүнең тагын да камилрәк ысулларына күчәргә кирәк. Соңгы елларда эш хакы үсеше хезмәт җи­тештерүчәнлеге темп­ларыннан югарырак булды, шуңа күрә моны төзәтү зарур иде. Безгә икътисади хәлне эзмә-эзлекле төзәтергә кирәк. Илдә мондый шартларда хәлне тотрыклыландыру буенча план кабул итү — бик катлаулы бу­рыч. Хөкүмәткә ничек эш­ләргә кирәклеген аңлар өчен бер­никадәр вакыт таләп ителде. Кризиска каршы план узган елның декабрь азагында кабул ителде”, — диде ул.

Импортны алмаштыру

“Импортны алмаштыру турында сүз барса да, чынында исә чит илдән товар кертелү дәвам итә. Эмбаргога карамастан, Польшадан кертелгән алма һәм кәбестәне ашавы­бызны дәвам итәбез”, — дип белдерделәр Президентка. Владимир Путин илгә кертү чикләнгән товар­ларны үткәргән таможня хезмәт­кәрләрен тән­кыйть­ләде. “Бу — үз бурыч­ларыңа җавапсыз карау нәтиҗәсе. Иң мөһиме — чит ил товарларын кертүгә каршы көрәшү түгел, ә үзебезнең авыл хуҗалыгы тармагы үсешенә ярдәм итү һәм, шул рәвешле, чит ил товарларын киштә­ләрдән кысрыклап чыгару. Үзебездә җитештерелгән товарлар базарда лаеклы урын алырга тиеш”, — дип җавап бирде ул.

Немцов турында

Владимир Путин сәясәтче Борис Немцовның шәхсән үзенә һәм хаки­мияткә каршы булуын билгеләп үтте, шул ук вакытта үзара мөнәсәбәт­лә­ренең начар булмавы турында белдерде.
“Борис Немцовны үтерү — бик фаҗигале күренеш. Фа­җигадән соң көн-көн ярым узуга Федераль иминлек хезмәте һәм Эчке эшләр министрлыгы тикшерүчеләренә җинаять кылучылар­ның исеме билгеле булды. Махсус органнар бик яхшы һәм оператив эшләде. Үтерүгә заказ бирүчеләр табылырмы — монысын әлегә әйтә алмыйм”, — диде Владимир Путин.

Украина

“Украинада Русия гас­кәрләре юк”, — диде Владимир Путин Ирина Хакама­даның соравына җавап биреп.
Русия Президенты фи­керенчә, Украина җитәкчелеге үз куллары белән үзен Донбасстан аера. Бүген Донбасс финанс яклап, социаль һәм пенсия түләүләре буенча тулысынча блокадада. “Минскта узган очрашуда Донбассның икътисадын, социаль өлкәсен тергезүгә бәйле мәсьәләләр күтәрелде. Килешү­ләргә Украина тарафыннан кул куелган булса да, бүген берни дә эшләнми. Украинага үз-үзен ничек тотарга өйрәтү — безнең эш түгел. Без тыкшынырга җы­енмыйбыз, ләкин үз фикеребезне әй­тергә хакыбыз бар. Украина җитәк­челеге нык ялгыша, хаталар­ның нәтиҗәсе бик аяныч булачак”, — дип белдерде Владимир Путин.