Үсеш ноктасы Уфадан башлана

Форумда 600дән артык делегат катнашты. Русиянең һәм чит илләрнең әйдәүче нефть-газ-химия комплексы җитәкче­ләре, бизнес-ассоциация һәм дәүләт власте органнары вә­килләре, билгеле галимнәр, гомумән, дөньяның һәм илебезнең тышкы һәм эчке базарында тармакның көндәшлек шартларында эшли алу мөмкин­лекләре буенча фикер алышты. Биредә, шулай ук, Иран, Әфганстан, Кытай, Һиндстан, Бөек Британия, Казахстан, Кыргызстан, Беларусь һәм Венесуэладан эшлекле партнерлар­ның да катнашуы әлеге чараның мәртәбәсен күтәрде.
— Нигездә, тармакта үсеш динамикасы уңай, — диде пленар утырыштагы чыгышында Аркадий Дворкович. — Бу нефть һәм газ сә­нәгатендә яңа системалар­ның уңышлы кулланылуына да, техник модер­низацияләү юнәлешендә дә ачык күренә. Без бүгенге чарада тармак продукцияләрен төрләндерү турында гына түгел, ә моңа кадәр чит илдән кертел­гәннәрен алыштырырлык дәрәҗәдә җитештерү турын­да да сөйләшәбез. Әлбәттә, без, шулай ук, икътисадның әлеге мөһим юнәлешенә дәүләт ярдәмен арттыру мөмкинлеген дә караячакбыз. Алга киткән илләрдә ул шулай. Гомумән, илебездә нефть-газ-химия тармагын үстерү позицияләре билгеләнде. Хәзер инде аның өстенлекле юнәлешләрен ачыклыйсы һәм аларны тормышка ашыру юлларын билгелисе калды. Уфада узган әлеге форум моңа яңа этәргеч бирер дигән өмет­тәбез.
Аркадий Дворкович сүзлә­ренә караганда, моңа кадәр дәүләт компанияләре партнер­лары белән уртак телне авыррак тапты. Аны көйләү — дәүләт эше. Икенче проблема — тармакны чимал белән тәэмин итү. Премьер-министр урынбасары фикеренчә, ресурсларны балансларга вакыт җитте. Урал һәм Идел буе федераль округларының да мөмкинлекләре зур. Илебездә икътисади хәлләр яхшыга үзгәрә, валюта базарында тотрыклылык күзәтелә, сумның бәясе ныгый һәм федераль бюджет үтәлеше контрольдә тотыла. Димәк, болар нефть-газ-химия сәнәгатен нәтиҗәле үзгәртеп коруга ышанычлы “старт” бирелүен дәлилли.
Михаил Бабич та Башкортстан башкаласында үткән быелгы форумның үзенчәлеген һәм бер үк вакытта җаваплы булуын ассызыклады.
— Форумның мөһимлеге шунда: июльдә Уфада ШОС һәм БРИКС саммитлары үтәчәк. Әйтергә кирәк, мөһим икъти­сади, шул исәптән, нефть химиясе белән бәйле берлек­тәге проектларда катнашучы дәүләтләрнең күбесе — безнең бүгенге партнерларыбыз,— диде ул. — Федераль округта мөһим проектлар тормышка ашырыла. Әйткәндәй, илдәге нефть химиясендә җитештере­лүче продукциянең 45 про­центы безнең округ төбәклә­ренә туры килә. Бишенче тапкыр үткәрелүче Башкортстан форумы тармактагы проблема­ларны дәүләт дәрәҗә­сендә күтәрергә мөмкинлек бирә.
Михаил Бабич, тармактагы проблемаларга тукталып, сәнәгатьтәге кредитлау күлә­менең кимүенә зур борчылу белдерде. Аерым төр продук­ция җитештерүчеләрнең базар таләпләренә тиз генә ярак­лашып китә алмавы да эшкә комачаулады, диде ул.
Башкортстан Башлыгы Рөстәм Хәмитовның чыгышы форумда катнашучыларда зур кызыксыну тудырды.
— Әлеге тармак республика икътисадын үстерүдә төп юнәлеш булып тора һәм шуңа күрә без нефть-газ-химия комплексын модерниза­цияләү буенча анык бурычлар куеп эшлибез, — диде Рөстәм Зәки улы. — Кызганычка каршы, илебездә нефть, газ, химия тармагын бүгенге базар шартлары юлына чыгару өчен байтак проблеманы хәл итәсе бар. Дөньядагы нефть бай­лы­гының 20 проценты Русия­гә туры килә. Илебез чимал белән тулы­сынча тәэмин ителүгә карамас­тан, дөньяда җитеш­терелгән нефть-газ продукциясе күрсәт­кече буенча без 20нче урында.