Үзгәреш кертеләчәк

Дәүләт җыелышы-Корылтай Рәисе Константин Толкачев законга төзәтмә­ләр кертү, тыюларга карамастан, аз алкогольле эчемлекләр сату дәвам итүгә бәйле булуын ассызыклады.

— Мондый төр эчемлекләрне сатуны тыючы закон кабул ителгәннән соң, депутатлар кибетләргә рейдлар үткәрде һәм күпсанлы хокук бозуларны ачыклады: җитештерүчеләр, продукциянең этикеткасын алыштырып, аны сатуны дәвам итә. Аларны гражданнарның, аеруча үсмерләрнең сәламәтлегеннән бигрәк, күбрәк табыш алу кызыксындыра. Закон төшен­чә­ләренә төрлечә аңлатма бирү мөм­кинлеген кисәтү йөзеннән без аның шушы өлешенә үзгәрешләр кертүне кирәк дип таптык. Бу мәсьәлә күп кенә башка коллегаларның да күз уңында. Мәсәлән, Дәүләт думасында аз алкогольле эчемлекләрне ваклап сатуны чикләү өлешендә федераль законга үзгәрешләр кертү мәсьәләсе карала. Без тәкъдим иткән закон проектында, шулай ук, эчемлекнең милли стандартка туры килергә тиешлегенә басым ясала.

Белешмә өчен. “Аз алкогольле эчемлекләр. Гомум техник шартлар” ГОСТ Р 52845-2007 Русия Федера­циясе дәүләт стандарты махсус тә­гаенләнештәге аз алкогольле, шул исәптән, дәртләндергеч эчемлекләргә (әчетелгәннәреннән тыш) кагыла. Анда продуктның хәвефсезлеген тәэмин итүче, шул исәптән, составындагы агулы элементларны һәм радионук­лид­ларны, азык өстәмәләрен, биологик актив матдәләрнең, кайбер субстрат­ларның һәм энергия алмашын тизләтүче катнаш­мала­рның тәкъдим ителгән микъдарын билгеләүче таләпләр куелган.