Самолетлар да җитештереләчәк!

Предприятие президенты Олег Әминев әйтүенчә, монда уникаль продукция җитештерелә, инженерлар аларны һәр заказ өчен аерым эшли. Әлеге вакытта предприятиедә илнең ягулык-энергетика комплексы өчен импортны алыштыру буенча берничә проект гамәлгә ашырыла. Продукциянең кайбер төрләре чит илнекеләрдән ике-өч тапкыр арзанрак. Предприятиенең төп продукцияләре исәбендә — блоклы насос станцияләре, нефть, ягулык газы әзерләү установкалары һәм нефть-газ чыганаклары корылмалары өчен башка җиһазлар.

“Уралтехнострой”ның тарихы 1994 елда зур булмаган цехтан башлана. Бүген ул үз юнәлешендә эре пред­приятиеләрдән санала, аңа Русия һәм чит илләр нефть-газ тармагының әйдәүче компанияләре заказ бирә. Алар арасында “Газпром”, “Лукойл”, “Новатэк” һәм башкалар бар. Корпорация заводларында 1800 кеше эшли.

Көннең икенче яртысында Конгресс-холлда Рөстәм Хәмитов Русия ягулык-энергетика комплексының чит ил җиһазларына, комплектлаучы һәм запас частьләргә, чит ил компанияләре хезмәтләренә һәм чит ил программа­ларына бәйлелеген киметү, шулай ук, илнең нефть-газ комплексын үстерү буенча ведомствоара эшче төркем утырышында катнашты. Аның алдыннан җыелучылар Башкортстанның ягулык-энергетика комплексы өчен про­дукция җитештерүче сәнәгать пред­приятиеләре күргәзмәсе белән танышты. Анда “КВАНТ” сәнәгать кластеры, Уфа компрессорлар заводы, “Пакер” фәнни-җитештерү фирмасы һәм башкаларның эшләнмәләре куелган иде.

Денис Мантуров белән Михаил Бабичны аеруча “Полигон” фәнни-җи­тештерү предприятиесе продукциясе, атап әйткәндә, “ИнЗер” сәнәгать коммутаторлары кызыксындырды, нефть һәм газ сәнәгате өчен югары технологияле эре насос җиһазы эшләү белән шөгыльләнүче Нефтекама машиналар төзү заводы продукциясе дә кунак­ларның игътибарын җәлеп ите.

Утырышны Денис Мантуров алып барды.

— Быел Уфа дәүләт нефть техник университетында авыр табылучы нефтьне чыгаруның нәтиҗәлелеген күтәрү өчен инновацион җиһазлар җитеш­терүне үзләштерүче үзәк төзүгә ярдәм итү турында карар кабул ителде. Мондый проектлар Русия ягулык-энергетика комплексының импортка бәйлелеген киметү бурычына тулысынча җавап бирә. Моны без фәнни-техник совет форматында хәл итәбез. Аның эксперт төркеме барлык юнәлешләр буенча тиешле эш башкарды. Нефть-газ җиһазларын җитештерү буенча 70тән артык инвестиция проектын гамәлгә ашыруның юл карталары әзерләнгән. Бу — якынча 170 миллиард сум, — дип билгеләде Денис Мантуров.

Аның сүзләренә караганда, бүген төбәкләр нәтиҗәле проектларга ярдәм итәргә әзер. Утырышта Русия ком­панияләренең ихтыяҗ зур булган продукцияләрне һәм технологияләрне генә җитештерүендә кызыксынучы ягулык-энергетика комплексы структуралары арасында тыгыз бәйләнеш булдыру турында да әйтелде.