Мәдәният — каныбызда!

Чыннан да, авылга нигез салган чордан башлап, аның мәдәниятенә, рухи сафлыгына хезмәт итүче га­иләләребез бар. Хәмитов­лар, Әхмәтовлар, Назаровлар – шундыйлардан.
1924 елда яңа гына төзелә башлаган салага күрше Гомәр авылыннан Файза белән Хәбибнаҗар Назаровлар килеп утыра. Файза апа, алты баласы белән тол калган иргә кияүгә чыгып, янә алты балага гомер биргән, ике оя “кошчык”ларына да җан җылысын бердәй өләшкән. Әлеге көндә аларның җирдәге дәвамы булган дүрт баласы исән.
Авылыбыз белән яшь­тәш Хәкимә акъәбиебез быел вафат булды. Ул өч кы­зының тәрбиясендә картаеп та өлгермәде булса кирәк, яшьләрчә яшьнәп яшәде.
Авылыбызның таянычы, аның тоткасы булырдай Нәзирә һәм Риф Солтановлар кебек гаиләләребез бар. Алар, ата-бабаларыбыз кебек, бер йортта берничә буын вәкилләре дус-тату яши. Һәм барысы да – сәхнәдә!
Роза һәм Рәиф Наза­ровларның да гомере сәхнә белән бәйле. Рәиф абый яшьлегендә М. Горький исе­мендәге колхозның данлыклы бию ансамбле белән Мәскәүнең Кремль сараенда биегән. Роза апаның җыр­лавы исә барыбызга да тансык. Шул ук ансамбльдә биегән Светлана белән Вадим Исхаковлар бүген дә мәдәни тормыш уртасында.
Гомумән, мондый гаи­ләләр күп авылда. “Югары мәдәниятле йорт” хуҗа­лары Нәзирә һәм Дамир Хәмитовлар, “Иң тату гаилә” Лариса һәм Ринат Сираевлар, “Авыл улы” Раданис Мәүлетов... Сәет авылының туган көнен билгеләгәндә әлеге номи­на­цияләрдә бүләкләнү­челәрнең һәрберсе мактауга лаек. Ә иң мөһиме – авыл­ның үткәне сагынып сөйләрлек булса, бүгенгесе матур, киләчәге дә өметле булыр, диясе килә.