+21 °С
Болытлы
Гәзиткә язылуVKOKTelegram
Барлык яңалыклар
Төрлесеннән
17 июль 2015, 00:58

Үзе уңган, үзе тырыш, үзе шундый сөйкемле!

Хезмәттәшләре һәм якыннары Земфира Фәхруллина хакында шулай ди.Бу һәрвакыт мөлаем карашлы, йомшак тавышлы, килешле итеп киенгән зифа буй-сынлы ханымга карап, аның кайсыбер имәндәй ир-егетләрне дә сындырырлык авыр язмыш сынауларын кичергән кеше дип уйламассың да. Ә бит аңа алма кебек чагында ике баласын кочаклап тол калырга, күз яшьләрен сөртә-сөртә, бөтен тормыш авырлыкларын үзенең нәфис иңнәрендә күтәрергә, улы белән кызын кеше арасында ким-хур итмәс өчен барлык тырышлыгын, ихтыяр көчен туплап эшләргә туры килә. — Бүген, яшәлгән еллар биеклегеннән карап, үткәннәрем үкенечле түгеллеген аңлыйм, — ди ул. — Газиз балаларым, туганнарым, хезмәттәшләрем алдында йөзем якты, намусым саф. Һәр яңа туган таңга шатланып, яраткан эшемнән ямь табып яшим.

Земфира Шакир кызы бүген 50 яшьлек матур гомер бәйрәмен билгели. Дүртөйле районы һәм шәһәре ветеринария станциясендә бухгалтер-кассир вазыйфасында хезмәт салучы ханымның коллективта абруе зур. Басынкы, күркәм холкы, ярдәмчел, әдәпле булуы, уңганлыгы, тирән белеме, үз эшенең бөтен нечкәлекләрен белүе өчен хөрмәт итә аны хезмәттәшләре.
— Земфира Шакир кызы турында бары тик мактау сүзләре генә әйтергә мөмкин, — ди ветеринария станциясе җитәкчесе Илдар Сафуан улы Казыйханов. — Исәп-хисап эше төгәллекне, намуслы булуны таләп итә. Бу күзлектән караганда да Земфира Шакир кызы үз урынындагы кеше. Коллективыбызда хезмәт салу чорында аның хәтта бер генә җитешсезлек, хата җибәргәне булмады. Хезмәт­тәшебезне, юбилее белән ихлас тәбрикләп, күңел түребездәге иң изге теләкләребезне җиткерәбез. Сәламәт булсын, һәрчак көчле рухлы, сөйкемле булып калуын телибез!


Земфира Шакир кызы Фәхрул­лина чыгышы белән Дүртөйле районының Коралачык авылыннан. Тату, матур гаи­ләдә төпчек кыз булып дөньяга аваз сала ул. Әти-әнисе, абыйсы һәм ике апасы сөю-назга чорнап үстерә аны. Кешенең бик күп сыйфатлары геннардан килә ди бит га­лимнәр. Земфирада да уңган­лык, тырышлык, максатчанлык кебек күркәм сыйфатлар кечкенәдән күренә: ул бик иртә кул арасына керә башлый, әнисеннән тегү, чигү, бәйләү сыман кул эшләренә өйрәнә. Мәктәптә тә тик яхшы бил­геләргә генә укый. Өлгер­гәнлек аттестаты алгач, Кушнаренко авыл хуҗалыгы техникумында бухгалтер һөнәрен үзләштерә. Әйткәндәй, ике апасы да исәп-хисап эшен сайлаган.
Күрше Манчар авылы егете Ришат белән яратышып өйлә­нешәләр. Яшь гаилә Сургут шәһәренә күченеп китә. Тырыш пар чит-ят җирләрдә дә югалып калмый: менә дигән эш урыннары да, фатирлары да барлыкка килә. Дөнья­ларына ямь өстәп, уллары Ринат һәм кызлары Регина туа.
— Себер ягы климатының үзен­чәлекләрен өйрәнеп, матур итеп бакча, җиләк-җимеш үстереп яшәдек, — ди еллар артында калган кадерле дә, моңсу да хатирәләрен барлап, Земфира Шакир кызы. — Ирем шулкадәр күңел җылысын биреп тәрбияли иде бакчабызны! Үзе һәлак булган елны алмагачлары шау чәчәктә иде...
Бер баласына — 10, икен­чесенә 7 яшь булганда Земфи­ра тол кала. Ире эш урынында фаҗигале рәвештә һәлак була.
— Дөм караңгылыкта калгандай булдым. Яшәү дәртем сүнде, бу дөнья белән мине бары тик балаларым гына бәйләгәндәй тоелды. Алар хакына үз-үземне кулга алдым, бөтен көчемне туплап яшәдем, эшләдем, —­­ ди мәкаләбез герое. — Сургуттагы фатирыбызны, бакчабызны сатып туган якка кайттык. Дүр­төйле шә­һәреннән торак алдым, һөнә­рем буенча эшкә кердем.
— Улым Башкортстан дәү­ләт университетының юридик, кызым философия факультетын уңышлы тәмамлады. Икесенең дә яхшы эш урыннары, фатирлары бар. Алар өчен сөенеп яшим. Яныма кунакка да еш кайта кадерлеләрем, — ди әңгәмәдәшем.
Сөекле тормыш иптәшен югалтуга инде 20 ел, ә ул аны бүген дә сагынып, юксынып яши.
— Тормышымда урын алырга теләгән ир-егетләр булса да, берсе дә Ришатымны алыштыра алмас дип уйладым, — ди ул. — Ялгыз канат кагу читен булса да, мин үземне бәхетле кешеләр исәбенә кертәм: “әни” дип өзелеп торучы балаларым, яраткан эшем, һәрвакыт ярдәмгә килергә әзер туганнарым, хезмәт­тәшләрем бар.
Читайте нас: