+11 °С
Яңгыр
Гәзиткә язылуVKOKTelegram
Барлык яңалыклар
Төрлесеннән
18 октябрь 2016, 02:00

Урта гасырлар сәламе

Туймазы районында яшь археологлар гадәти булмаган табышка юлыккан.“Патриот” тарих-археология лагерена йөрүче мәктәп укучылары Туймазы районының Кандра авылы янында эзләнүләр үткәргәндә гадәти булмаган табышка юлыккан. Алар тапкан “байлык” X-XIII гасырларда кулланылган укларның очлары булып чыккан.

Туган якны өйрәнүче Юрий Бирюзов белән укучылар 35 данә шундый ядкәрне Русия Фәннәр академиясе Уфа гыйльми үзәгенең Тарих, тел һәм әдәбият институты археология бүлеге хезмәткәрләренә күрсәткән. Археолог­лар Владимир Овсянников белән Вячеслав Котов Кандрага килгән һәм эзләнүләр үткән урынны җентекләп өйрәнгән. Шушындый ук ядкәрләр республиканың Гафури районында да табылган булган. Галимнәр, бу урында мәҗүси йола үтәлгән, дип фаразлый. Борынгы кешеләр, тау-кыяга атып, үзләренең укларын аллаларга корбан иткән. Бу яугиргә һәм сунарчыга уңыш китерә дип ышанганннар.

Әлеге йола Уралда киң таралган булган. Свердловск өлкәсендә “Камень дыроватый” дип аталган кыя билгеле. Галимнәр аның кәсеп-һөнәргә кагылышлы тылсым башкарылучы изге урын булуын билгели. Бу урында мезолит чорыннан урта гасырлар ахырына кадәр кыяга ук ату йоласы үтәлгән. Анда 21 меңнән артык шундый ук очы табылган. Әлеге кыяга тиң урын дөньяда бүтән юк. Таш, бронза һәм тимер очлардан тыш, анда кургаш пулялар да табылган. Бу әлеге тради­циянең утлы корал уйлап табылгач та дәвам итүе турында сөйли.

Районда яшь археологлар хәрәкә­тен җитәкләүче Юрий Бирюзов быел яз “Кандракүл серләре” дип аталган китап чыгарган. Анда урындагы мәктәп укучыларының Уфа археологлары белән “Кандара” дип аталган кальга урынын эзләве мавыктыргыч итеп тасвирлана. Галимнәр фикеренчә, әлеге крепость XVIII гасырда Кандракүл буенда урнашкан булган.

Юрий Бирюзов, шулай ук, күп еллар Х. Солтанов исемендәге эзтабарлар бер­ләшмәсенә җитәкчелек итә, Бөек Ватан сугышы батырларының исем­нәрен мәңгеләштерү эшенә зур өлеш кертә.
Кандрада эзләнүләр дәвам итәчәк. Анда укучылар һәм студентлар катнашлыгында археологик экспедиция оештыру планлаштырылган.
Читайте нас: