Сагынырбыз сине...

Җыр сәнгатебездә Хә­ния Фәрхи буларак таныл­ган Хәния Фәрхис­лам кызы Хәлидуллина 1960 елның 30 маенда Тәтешле райо­нының Салай дигән кеч­кенә авылында туган. Күрше­дәге Бәдрәш авылында мәктәп тәмамлаган. Унҗиде яшеннән Мәс­кәүдә укып, эшләп, башкаладагы “Бәйрәм” ан­самблен­дә җырчы биографиясен башлаган.
Хәния Фәрхи — күпмеңнәрчә татар һәм башкорт тамаша­чы­сының яраткан җыр­чысы гына түгел, гади кешенең шатлык-куанычларын, кайгы-хәсрәт­ләрен җырлары аша халыкка түкми-чәчми җиткерүче дә иде. Шуңа күрә милләттәшләребез аны яратты, үз итте. Аның башкаруындагы “Әлдер­мешкә кайтам әле”, “Сагынам сине, Питрәч”, “Үпкәләсәң, әйдә, үпкәлә”, “Онытылыр димә”, “Казан кичләре”, “Кышкы чия”, “Уфа — Казан” кебек җыр­лар, чын мәгънәсендә, халыкныкына әверел­де. Халыкчанлык җырчы эшчән­легенең асылын тәшкил итә иде. Гомумән, аның репертуарында 300дән артык җыр бар иде.
Хәния Фәрхи “Татар җыры” халыкара конкурсында 15 тапкыр “Алтын барс” билгесе белән бүләк­ләнде. Казан шәһәрендәге “Йолдызлар аллеясе”ндә аның исеме язылды.
Җырчыда якташлык хисе көчле иде. Башкортстанга гастрольләргә, һәртөрле мәдәни чараларга канатланып кайтты. Якташ җырчы һәм композиторлар Ризван Хәкимов, Айдар Галимов, Салават Фәтхетдинов, Урал Рә­шитов, Зифа Нагаева һәм башкалар белән тыгыз хезмәттәшлек итте.
“Кызыл таң”чылар бе­лән очрашуга да ул тормыш иптәше, концертларын оештыручы Габделхәй Биктаһиров белән берничә тапкыр килде. Гәзит укучылар өчен интервью бирде. “Кызыл таң” гәзи­тенең 95 еллыгы билгеләнгәндә “Нефтьчеләр” мәдәният сараенда аның ялкынлы котлау сүзләре һәм моңлы җырлавы хәтеребездә әле.
Мәрхүмәнең гаилә­се­нең, туган­нарының, якын­нарының тирән кайгысын ихлас уртаклашабыз. Ходай сезгә сабырлык бирсен! Хәния Фәрхинең исеме күңелләрдә мәңге сакланыр.