Хәләл иткә ихтыяҗ зур

Җәмгыять кошчылык белән шөгыль­ләнә. Ачылуына күп вакыт үтмәсә дә, эш күрсәткечләре югары: ай саен 250-260 тонна тавык ите җитештерелә һәм сатуга чыгарыла.
Сату белән өзеклек юк. Дөрес, ел башында тавык итенә хаклар төшкән, их­тыяҗ кимегән. Әмма предприятие бу авыр вакытларны үткәреп җибәргән. Хәлнең вакытлыча икәнен аңлап, кош-корт санын киметүгә, эшче­ләрне кыскартуга юл куелмаган.
— Итнең килограммы өчен 65 сум тәкъдим итәләр иде. Исәпләсәң, аның үзкыйммәте 70 сумга төшә. Мондый адымга бармадык, әлеге хәлдән чыгуның төрле юлларын эзләдек. Шөкер, язга таба хәлләр үзгәрә башлады, хәзер исә барысы да җайга салынды, итне күпләп алып китәләр. Екатеринбург, Самара өлкәләре белән яхшы элемтә булдырылган. Ай саен 150-160 тон­налап продукция читкә озатыла, калган 100 тоннасы үзе­безнең төбәктә сатыла. Безнең итнең “Хәләл” билгесенә ия булуы да, санкцияләр нәти­җәсендә чит илдән ит кертүне тыю да үз ролен уйнагандыр. Хәзер бик күп колбаса җитештерүчеләр дуңгыз ите урынына тавык итен куллана, шул да безнең товарга ихтыяҗ артуга булышлык иткән­дер, — ди Рөстәм Марат улы.
Йомырканы Саратовтан кайтарталар. Әлбәттә, үзебезнең төбәктә йомыркалар булмау бер­никадәр кыенлык тудыра. Ай саен берничә тапкыр аларны мең чакрымнан диярлек кайтартырга туры килә.
— Аның каравы, сыйфаттан бик канәгатьбез. Йомыркалар 70-80 процент чыгышлы булса, бу яхшы күрсәткеч санала. Безнең инкубаторлар берьюлы 480 мең йомырка сыйдырышлы, шуңа күрә чималны еш сатып алырга туры килә, — ди Рөстәм Марат улы.
— Бүген предприятиедә якынча 200 кеше эшли, уртача хезмәт хакы — 15 мең сум. Махсус бүленгән автобус эшчеләрне иртән алып килә, кичен кайтарып куя. Көненә уртача 8000-8500 тавык чалына. Әйтүебезчә, әлеге җәмгыятьнең продукциясе “Хә­ләл” билгесенә ия. Диния нәза­рәте тарафыннан еш үткәрелүче тикшерүләр барышында шелтә­ләр булганы юк, бу юнәлештә бик намуслы эшлиләр. Сигез корпуста 250 мең кош-корт асрала. Кайсында – яңа чыккан чебиләр, кайсында – тавыклар. Әйткән­дәй, “чимал”ның товарга “әйләнә” торган вакыты – 40-42 көн. Нәкъ шушы вакыт эчендә тавыклар 2,2 килограмм авырлыкка кадәр җитеп, чалу цехына озатыла.
— Тавык түшкәсенең авырлыгы — уртача 1,6 килограмм. Азык витаминлаштырылган. Биналарда температураны компьютер билгели, — ди ветеринария табибы Артур Галиев.
— Эшебез җылыда, яктыда. Хезмәт хакын вакытында алабыз. Бик канәгать­без. Халык та безнең продукцияне яратып сатып ала, — дип сүзгә кушыла кош караучы Нина Нургалиева.
Биредә каклау һәм эшкәр­тү цехларында 60 төрдән артык продукция җитештерелә. Туң­дырылган һәм суытылган, какланган тавык итен, субпродукцияне халык теләп ала. Предприятие җитештергән продукция “Башкортстан товарлары” маркасы белән бил­геләнгән. Әлеге билге респуб­ликаның иң яхшы оешмаларына гына бирелә һәм товар­ның югары сыйфаты турында сөйли.
Кош-корт өчен азыкны да үзләре җитештерә. Баштарак катнашазыкны сатып алганнар, әмма моңа бик зур чыгымнар киткән. Шуңа да җитәк­челек, кирәкле җиһаз­лар сатып алып, катнашазык цехы төзү һәм кош-кортларга “сый”ны үзләре җитештерү турында карар кабул итә. Бу бик вакытлы һәм дөрес юнәлеш була, чөнки сатып алган катнашазыкның тоннасы 20 мең сумга басса, үзләрендә җитеште­релгәне 12-13 мең сумга төшә. Моның өчен җәмгыять 2000 гектар җирне арендага ала, комбайн, чәчү комплекслары һәм башка техника юнәтә. Әйткән­дәй, сатып алынган җиһазлар, техника, орлык өчен республика программасы аша субсидия алынган. Киләчәктә “УралАгро” җәмгыяте район хуҗалыклары белән коопера­циягә кереп эшләмәкче, алдагы язда, әйтик, “Восход” хуҗалыгы базасын­да 80 гектар мәйданда бәрәңге үстер­мәкчеләр.
— Безнең мәйданнар 1 миллион кош-корт асрарга мөмкин­лек бирә. Алга таба да продукциягә ихтыяҗ булса, бүгенге күләмнәрдә генә тукталып калмаска исәп бар. Моның өчен барлык шартлар да тудырылган, республика Хөкүмәте ярдәм кулы суза, район җи­тәк­челеге килеп туган мәсьә­ләләрне уңай хәл итә, эшче куллар, кирәкле бел­геч­ләр бар. Эш­лә дә эшлә генә! — ди Рөстәм Мусин.