“Француз”ны иярләгән тракторчы

Без барганда Рамил ындыр табагындагы иң зур ан­гарларның берсендә көн­багыш өемен тәртипкә китерә иде. Монда “кара алтын” тау-тау булып ята. Көн­багышны эрегә-вакка аерып, шунда ук капчыкларга тутыралар. Кайсы — сатуга, кайсы — хуҗалыкның май сыгу цехына озатыла. Әлеге шул “Манитов” ярдә­мендә инде.

— Рамил Мәҗит улы тәҗ­рибәле тракторчы, һәр эшне яратып, җиренә җиткереп башкара, — дип, мактау сүзләре белән генә телгә ала уңган тракторчыны җәмгыять дирек­торы Фәнзил Идрисов.

Рамил эштә генә түгел, тормышта да үрнәкле егет. Авыл мәктәбендә техник хезмәткәр булып эшләүче хатыны Мәрфүзә Шаһидулла кызы белән тату гаиләдә өч бала тәрбияләп үстергәннәр. Аларның инде “башлы-күзле” булганнары да бар. Иң мөһиме — әти-әниләре кебек эшчәннәр, кечелеклеләр.

Рамил Әхмәдиевка шактый катлаулы чит ил техникасын ышанып тапшыру очраклы түгел. Ул моннан 25 ел элек Бәләбәй авыл хуҗалыгы техникумының механизация бүлеген тәмамлаган, авылда техник яктан белемле егет­ләрнең берсе. Француз “атын” иярли белгәне өчен генә абруй яуламаган шул инде ул. Авылда ул бер көндә генә барлыкка килми — һәр адымыңнан, кылыгыңнан, сүзеңнән һәм һәр яшәгән көнеңнән җыела.