Алдынгылар һәрчак әйдәп бара!

– Быел чәчү эшләрен 3546 гектар мәйданда башкарып чыгу бурычы тора. 840 гектарда – бодай, 805 гектарда – арпа, 120 гектарда – солы, 189 гектарда вика чәчелде дә инде. 200 гектарда кукуруз чәчәсе калды. Сыйфатлы, югары репродукцияле орлык җи­тәрлек күләмдә тупланды, ягулык-майлау материал­ла­рына кытлык юк, – ди баш агроном, җитеш­те­рү буенча директор урынбасары Олег Го­рошко.
Чәчүне кыска вакыт эчендә, оешкан төстә башкарып чыгу өчен җәмгыятьтә зур тырышлык салына. Заһир Идиятов – 369 гектар, Равил Җәмгыев 241 гектар мәйданда күпьеллык үләннәрне тырмалаган. Дым каплатуга җәлеп ителгән механизаторлар Мияссәр Гәрәев, Вячеслав Гәрәев һәм Александр Кузне­цовны җитәкчелек мактап телгә алды. Җир эшкәртүдә Наил Әхмәтшин, Александр Стариков, Николай Рыков уңганлык күрсәткән. Чәчү алдыннан “нольдәге технология” буенча химик утау үткәрелгән. Аны 871 гектарда Фәвис Ямалиев башкарган. Вячеслав Гәрәев – 611 гектарда, Павел Царьков – 282 гектарда, Евгений Плаксин 414 гектарда иген чәчкән. Чит илдә җитештерелгән яңа “Амазоне” чәчү агрегатында Хәлил Садриев 865 гектар мәйданда шулай ук бөртек­леләр чәчкән.
– ­Эшче көчләр сынатмый, егетләребез вакыт белән исәп­ләшми, көн-төн диярлек басуда. Баш агроном Олег Горошко барлык эшләрне җитди контрольдә тота, баш инженер Зинур Хәмидуллин техниканың һәрвакыт төзек булуы өчен җаваплы, икътисад буенча директор урынбасары Иван Петров – һәр башлангычның оештыручысы. “Шаранагрогаз” җәмгыяте менә шундый тырыш, булдыклы хезмәткәрләргә таянып эшли, – ди Тимергали Мәгъдән улы.
Язгы чәчүне басу уңганнары бүген-иртәгә тәмамларга исәп тота. Алдынгы предприятиенең хезмәт батырларына мул уңыш үстереп алырга насыйп булсын!