+24 °С
Болытлы
Гәзиткә язылуVKOKTelegram
Барлык яңалыклар
Авыл хуҗалыгы
4 июнь 2015, 21:33

Гастарбайтерлар — авылларыбызны, безнең егетләр... Себерне үзләштерә

Аграр тармакны белгечләр белән тәэмин итүгә нинди киртәләр комачаулый?Республиканың агросәнәгать тармагын югары һәм махсус урта белемле кадрлар белән тәэмин итүдәге киеренкелек дәвам итә. Авыл хуҗалыгы министрлыгыннан алынган мәгълүматларга караганда, аграр предприятие һәм хуҗалыкларга 3400гә якын төрле һөнәр иясе җитешми, 770кә якын җитәкче һәм югары махсус белемле белгеч таләп ителә. Шул ук вакытта, Башкортстандагы аграр юнәлештәге белем бирү учреждениеләрен тәмамлап, диплом алганнан соң аларның күпчелеге авылга кайткан очракта, проблеманы ике елда тулысынча хәл итеп булыр иде. Бүген авыл хуҗалыгы нинди һөнәр ияләренә мохтаҗлык кичерә? Кадрлар агымын киметү өчен нинди чаралар күрергә кирәк? Дистәләрчә ел дәвам итүче бу проблеманы хәл итүдә югары һәм махсус һөнәри урта белем бирү учреждениеләре җитәкчелеге нинди тәкъдимнәр кертә? Дәүләт җыелышы-Корылтайның Аграр мәсьәләләр, экология һәм табигатьтән файдалану комитетының чираттагы утырышында сүз шул хакта барды.

— Югары яки урта махсус белем бирү учреждениеләрен тәмамлаучы аграр белгечләрне авыл хуҗалыгы оешмаларында эшкә урнаштыру аеруча авыр, — дигән фикердә тармак министры Николай Коваленко. —Үткән елда авыл хуҗалыгында уртача айлык эш хакы — 12,9 мең, эшкәртү сәнәгатендә 19,4 мең сум тәшкил итте. Бу, башка тармаклар белән чагыштырганда, күпкә түбәнрәк.
Һәм менә шундый шартларда дипломлы яшь белгеч авылга кайтырга теләк белдерер микән? Әлбәттә, студентларны сайлаган һөнәрләренә тугры калдыру максатында тәрбияви чаралар бихисап үткәрелә. Эшче һөнәрләрен пропагандалау юнәлешендә төрле конкурс-бәйгеләр дә аз түгел. Әмма чынбарлык тормыштан чыгып, караш үзгәрә.
2009 елдан башлап республикада авыл хуҗалыгында эшкә урнашучы белгечләргә дәүләт ярдәме күрсәтелә башлады. Югары белемле яшь белгечләрне дәртләндерү максатында — бер тапкыр бирелүче йөзәр мең, урта һөнәри белемле кадрларга алтмышар мең сум күләмендә акча тапшырыла. Шул ук тәртиптә, аларга ай саен хезмәт хакына җидешәр һәм дүртәр мең сум өстәлә. Шушы вакыт эчендә барлыгы 855 яшь белгеч, шул исәптән, югары белемле — 560, урта һөнәри белемле 295 кеше, шушы ярдәмне алды. Ләкин шунысын да истән чыгармыйк: ел саен аграр юнәлештәге уку йортларындагы меңнәрчә егет һәм кызның барысы да дәүләт ярдәменә өмет итә алмый. Дөрес, авылга кайтучы яшь белгечләргә, максатлы федераль программа кысаларында, үзләре эшләгән хуҗалыкта йорт салу яки сатып алу өчен социаль түләүләр каралган. Субсидия күләме торак бәясенең 70 процентына кадәр тәшкил итә. 2003-13 елларда әлеге программа буенча 4442 гаиләгә гомум бәясе 2,5 миллиард сумлык дәүләт ярдәме күрсәтелгән.
Читайте нас: