Югары исем — Илеш фермерында!

Туксанынчы еллар башында республикада тәүге фермерлар эшли башлады. 1991 елда безнең районда да өч фермер хуҗалыгы оешты. Алар арасында гомер буе җаваплы вазыйфаларда эшләгән Мөҗәһит Ялалов та бар иде. Улы Флүн, кияве Камил белән һәркайсы иллешәр гектар җир алып, эшне башлап җибәрде­ләр. Алар, нигездә, иген үстерү һәм орлык сату белән шөгыльләнде. Тик Мөҗәһит абыйга бу эшне биш ел гына башкарырга насыйп булды: җитмеше тулырга берничә ай кала ул якты дөньядан китеп барды.

Әтисен җирләгән көннең икенчесендә үк район авыл хуҗалыгы идарәсендә баш агроном булып эшләүче Фирдәвис миңа (мин ул вакытта идарә начальнигы вазыйфасында идем), эштән җибәрүемне сорап, гариза тотып керде. Яхшы белгеч булса да, “Әтинең эшен дәвам итәсем килә”, — дигәч, аның теләгенә каршы килә алмадым. Бу 1997 ел иде.

Шушы 18 ел вакыт эчендә Фирдәвис үзен чын мәгънәсендә булдыклы фермер итеп танытты. Әтисе карамагында булган 150 гектар җирне 1027 гектарга җиткерде, элита һәм оригиналь орлык үрчетүдә һәм сатуда махсуслашты. Быел ул, мисалга, бодайның 9 төрле сортына сы­нау үткәрде. Аларны Ульяновск, Самара өлкәләреннән һәм Казаннан шул сортлар­ның авторларыннан алып кайтты. Сүз уңаеннан шунысын да әйтим, галимнәр чыгарган яңа сортларны үз хуҗалыгында сынау һәм үрчетү белән шөгыльләнүче Фирдәвис Ялалов Башкортстан, Татарстан, Ульяновск, Чиләбе, Белгород шә­һәр­­ләре авыл хуҗалыгы фәнни-тик­ше­ренү институтлары белән дә тыгыз бәй­ләнештә эшли.

Бүген Фирдәвис Ялаловның фермер хуҗалыгында җитештерелгән оригиналь һәм элита орлыкларны Татарстаннан, Ырынбур, Чиләбе өлкәләреннән генә тү­­гел, Самарадан, Курганнан ук килеп ала­­лар. Шунысы да аерым игътибарга лаек, Фирдәвис, туган җиренең чын пат­­риоты буларак, яхшы сыйфатлы орлык белән, беренче чиратта, район, республика хуҗалыкларын тәэмин итә, алардан артканын гына читкә сата.

Илеш фермерының тагын бер мактаулы эше бар. Ул ел да авыл хуҗалыгы тармагын модернизацияләүгә 1,5-2 миллион сум инвестицияләр сала. Мисалга, соңгы вакытта гына Йонны авылы янындагы ашлык саклау складын тулысынча яңартты.

“Тырыш хезмәт китерер җимеш” диелә халык мәка­лендә. Шушы көннәрдә Фир­дә­вис Ялаловка “Русиянең атказанган авыл хуҗа­лыгы хезмәткәре” дигән мактаулы исем бирелде. Тантанада таныклыкны Русия Хөкүмәте Рәисе Дмитрий Ме­дведев тапшырган. Әйт­кәндәй, фер­мерның тырыш хезмәте моңа кадәр дә Хөкүмәтебез тарафыннан лаеклы бәһа­ланып, 1999 елда аңа “Баш­кортстан­ның атказанган авыл хуҗа­лыгы хез­мәт­кәре” исеме би­релгән иде. 2012 елда XIII “Алтын көз” Бө­тен­русия агросәнәгать күргәз­мәсеннән көмеш медаль алып кайттылар, 2011, 2013 елларда ул җитәкләгән “Рассвет” крестьян-фермер хуҗалыгы “Рес­публика­ның иң яхшы элита орлык җи­тештерүче хуҗалыгы” булып танылган иде.

Кайчандыр Фирдәвис әтисенең эшен дәвам иткән булса, бүген инде ул үзе өлкән улы Илдар белән фермер хуҗалыгы эшчәнлеген алып бара. Димәк, буыннар бәйләнеше югалмый. Кем белә, бәлки, киләчәктә Илдарның улы Заһир да баба­ларының һөнәрен дәвам итәр дә, алар кебек үк “Илеш игенчесе” данын еракларга таратыр.
Фирдәвис Мөҗәһит улын югары исем алуы уңаеннан барлык якташлар исемен­нән ихлас күңелдән котлыйбыз һәм килә­чәктә дә эшендә һәм шәхси тормы­шын­да тик уңышлар гына теләп калабыз.