Сарайсада нигә эшсезләр юк?

“Бу әле көтүдә йөргәннәре генә”, — ди өч бала әнисе Рима Әхмәдиева. Ире Ишбирде белән алар үз хуҗалыгында өч сыер сава (башка елларда бишәү булган), өч бозау һәм 6 үгез си­мер­тә. Күптән түгел суеп саткан бер башмактан 59 мең сум керем алганнар. Урамдагы матур йортларны, төзек коймаларны, бизәк­ле капкаларны күреп, күңел куана. Капка төбе саен автомобиль, йөк машинасы. Барлык тагылма кирәк-ярагы, арбалары булган “Беларус” тракторлары гына да биредә 30 берәмлек исәпләнә.

Әхмәдиевларның ут күрше­ләре Зәрия белән Рамил Сангу­җиннар да —тырыш, үрнәкле гаиләләрнең берсе. Алар 24 гектардагы пай җирләрендә эш итәләр икән.

— Мал азыгы белән проблема юк. Хәзер бөтен эш техника ярдәмендә башкарыла. Биш сыерны да аппарат белән савам. Җәйге айларда сөт көн саен 9-10 чиләк чамасы була. Дөрес, соңгы вакытта савым кимеде. Шулай да, көн аралаш Салават базарына барып, сөтен, маен, каймагын, эремчеген 3-4 мең сумлык сатам. Аена ул 40-45 мең сумга җыела, — дип елмая Зәрия ханым.

Әлбәттә, терлекчелек зур тырышлык таләп итә. Мал-туар белән шөгыльләнәсең икән, ди­мәк, ел буе ал-ял белми эшләргә тиешсең. Авыл җирендә, гадәттә, бу эшләрне башкаруда кул арасына кергән балалар да ярдәм­ләшә. Сангуҗиннар, мәсә­лән, үзләре кебек уңган өч бала үстергән. Яшьли физик эшкә өйрәнгән балалар туган йортка кайткан саен өс-башын алмаштырып, абзарга, мал-туар янына ашыга. Уллары Айнур Уфа нефть техник университетын һәм эчке эшләр министрлыгы мәктәбен тәмамлаган, Салават шәһәрендә эшли. Игезәк­ләр Юлия белән Галия дә Уфа нефть техник университеты студентлары.

Сарайсада мондый уңган, үз тырышлыгы белән мул тормышта яшәүче гаиләләр күп. Мәсәлән, Илгиз белән Альбина, Зөлфия бе­лән Фәнис Аканаевлар — нәкъ шундыйлар. Дүрт ул тәрбия­ләп үстергән Альбина белән Рөстәм Хәй­рул­линнар да — тынгысыз җан­нар. Аларның ишегалды тулы терлек, бакча башында — 200 баш умарта, урамда — үз кибет­ләре. Болар — тырышлык нәти­җә­се. Сарайса уңганнары бү­ген­ге мул һәм бәхетле тормышка үзләре ирешкән.